ৰঙালী বিহু উদযাপনৰ প্ৰথম দিনটোতে অৰ্থাৎ গৰু বিহুৰ দিনাই প্ৰধানমন্ত্ৰী নৰেন্দ্ৰ মোদীয়ে অসমত এটি ঐতিহাসিক ক্ষণৰ সাক্ষী হয়৷ গুৱাহাটীৰ সৰুসজাই ষ্টেডিয়ামত ১১ হাজাৰোধিক বিহুৱা-বিহুৱতীৰ বিহুনাচৰ অনুপম দৃশ্য দেখি অভিভূত হৈ পৰে প্ৰধানমন্ত্ৰীগৰাকী৷
উল্লেখযোগ্য যে ১৩ এপ্ৰিলত অসমৰ ভিন্ন জিলাৰ ১১,৩০৪গৰাকী নাচনী আৰু ২,৫৪৮গৰাকী ঢুলীয়াই একেটা স্থানতে বিহুনাচ আৰু ঢোলবাদন প্ৰদৰ্শন কৰি গীনিজ বুক অৱ ৱৰ্ল্ড ৰেকৰ্ডছত নাম লিপিবদ্ধকৰণেৰে দুটাকৈ বিশ্ব অভিলেখ গঢ়িলে৷
সৰুসজাইত সমবেত ৰাইজক বিহুৰ শুভেচ্ছা জ্ঞাপন কৰি প্ৰধানমন্ত্ৰীয়ে কয় যে আজি অৰ্থাৎ ১৪ এপ্ৰিল ২০২৩ত এই মনোমোহা দৃশ্য উপভোগ কৰা প্ৰতিগৰাকী ব্যক্তিয়ে নিজৰ জীৱনকালত এই মুহূৰ্তটোৰ কথা কেতিয়াও পাহৰিব নোৱাৰে৷
“এয়া কল্পনাৰো অগোচৰ, ই অভূতপূৰ্ব৷ এয়াই অসম,” প্ৰধানমন্ত্ৰীয়ে কয়৷ “ঢোল, পেঁপা আৰু গগনাৰ মাত আজি সমগ্ৰ ভাৰততে শুনিবলৈ পোৱা গৈছে৷ দেশৰ লগতে সমগ্ৰ বিশ্বই অসমৰ হাজাৰ হাজাৰ শিল্পীৰ সংঘবদ্ধ প্ৰচেষ্টা আৰু সমন্বয়ক দেখিবলৈ পাইছে৷”
বিহুৰ প্ৰতীকীসম্বলিত এখন সুসজ্জিত বেটাৰীচালিত বাহনেৰে সৰুসজাইৰ বাকৰি পৰিদৰ্শন কৰি প্ৰধানমন্ত্ৰীগৰাকীয়ে বিহুৱা-বিহুৱতীৰ লগতে উপস্থিত জনগণক অভিবাদন জনায়৷ সমবেত ৰাইজক সম্বোধন কৰি তেওঁ কয় যে আজিৰ এই বিশেষ অনুষ্ঠানত উপস্থিত থকা তথা টেলিভিশ্যন আৰু সামাজিক মাধ্যমত বিহুনাচৰ প্ৰদৰ্শন উপভোগ কৰাসকলে জীৱনত এই মুহূৰ্তটো কেতিয়াও পাহৰিব নোৱাৰে৷ “এয়া অবিস্মৰণীয়, আশ্বৰ্যকৰ আৰু অপূৰ্ব,” প্ৰধানমন্ত্ৰী মোদীয়ে কয়৷
এই অনুষ্ঠানৰ তাৎপৰ্যৰ বিষয়ে আলোকপাত কৰি প্ৰধানমন্ত্ৰী মোদীয়ে শিল্পীসকলৰ উদ্যম আৰু সৃষ্টিশীলতাক প্ৰশংসা কৰে৷ এই দিনটোৰ সৈতে সংগতি ৰাখি তেখেতে অসমৰ লগতে দেশবাসীলৈ বিহু তথা আন উৎসৱসমূহৰো শুভেচ্ছা জ্ঞাপন কৰে৷ এই অনুষ্ঠানত ‘এক ভাৰত শ্ৰেষ্ঠ ভাৰত’ৰ নিহিতাৰ্থ প্ৰতিফলিত হৈছে বুলিও প্ৰধানমন্ত্ৰীগৰাকীয়ে কয়৷ তদুপৰি অসমৰ মানুহে অতি সন্তৰ্পনে নিজৰ সংস্কৃতি সংৰক্ষণৰ প্ৰয়াস কৰাৰ বাবে প্ৰধানমন্ত্ৰীগৰাকীয়ে অসমবাসীক প্ৰশংসা কৰে৷
“আমাৰ উৎসৱসমূহ কেৱল সংস্কৃতি উদ্যাপন নহয়৷ এই উৎসৱে সকলোৰে মাজত সমন্বয়ৰ সেতু গঢ়িবলৈ আৰু ঐক্যবদ্ধভাৱে আগবাঢ়ি যাবলৈ অনুপ্ৰেৰণা যোগায়৷ ইয়াৰ মাজতেই নিহিত হৈ আছে ব’হাগ বিহুৰ শাশ্বত আত্মা৷ এই উৎসৱ হৈছে অসমবাসীৰ হৃদয়ৰ আপোন কিয়নো ই আমাৰ মাজৰ ব্যৱধান দূৰ কৰে৷ এই উৎসৱ হৈছে মানুহ আৰু প্ৰকৃতিৰ মাজৰ সম্প্ৰীতিৰ সৰ্বশ্ৰেষ্ঠ উদাহৰণ৷ বিহুক হদয়ংগম কৰিবলৈ কিছুমান অনুভূতিৰ প্ৰয়োজন৷ সেই অনুভূতি সৃষ্টি হয় অসমৰ ভনী আৰু জীয়ৰীসকলৰ খোপাত গুজি লোৱা কপৌ ফুলপাহৰপৰা, পাট-মুগা, মেখেলা চাদৰ আৰু ৰিহাৰপৰা৷ বিহু উপলক্ষে ঘৰে ঘৰে প্ৰস্তুত কৰা বিশেষ ব্যঞ্জনসমূহতো এই অনুভূতিক উপলব্ধি কৰিব পাৰি,” প্ৰধানমন্ত্ৰীয়ে কয়৷
ভাৰতৰ বিশেষত্ব দেশৰ স্বকীয় পৰম্পৰাসমূহৰ মাজত নিহিত হৈ থকা বুলিও প্ৰধানমন্ত্ৰীগৰাকীয়ে ব্যক্ত কৰে৷ “হাজাৰ হাজাৰ বছৰ ধৰি প্ৰতিগৰাকী ভাৰতীয়ক এই পৰম্পৰাসমূহেই একতাৰ এনাজৰীৰে বান্ধি আহিছে৷ ভাৰতবাসীয়ে নিজৰ ঐতিহ্য-সংস্কৃতিৰ প্ৰতি ভাবুকিৰ সন্মুখীন হৈছিল আৰু ঐক্যবদ্ধভাৱে পৰাধীনতাৰ অন্ধকাৰৰ বিৰুদ্ধে যুঁজ দিছিল৷ বিভিন্ন সময়ত বিভিন্ন শাসনকাৰী আৰু শক্তিৰ আগ্ৰাসনৰ পাছতো ভাৰতবৰ্ষ এখন স্বাধীন ৰাষ্ট্ৰ হিচাপে অমৰ হৈ আছে৷ দেশৰ পৱিত্ৰ ভূমি আৰু পৰম্পৰাৰদ্বাৰা প্ৰতিগৰাকী ভাৰতীয়ৰ চেতনাশক্তি উজ্জ্বীৱিত হৈছে আৰু ই হৈছে বিকশিত ভাৰতৰ সুদৃঢ় ভেটি,” প্ৰধানমন্ত্ৰী মোদীয়ে কয়৷
এই অনুষ্ঠানতে প্ৰধানমন্ত্ৰীয়ে ৰূপকোঁৱৰ জ্যোতিপ্ৰসাদ আগৰৱালাৰ বিশ্ববিজয়ী নজোৱান গীতটো স্মৰণ কৰি কয় যে এই গীতটো অসমৰ লগতে দেশজুৰি নৱপ্ৰজন্মৰ বাবে প্ৰেৰণাৰ উৎস হৈ পৰিছে৷ সমবেত জনগণৰ ব্যাপক উৎকণ্ঠাৰ মাজত তেখেতে গীতটোৰ বিষয়ে কিছু কথা বৰ্ণনাও কৰে৷ এই গীতটিৰ অৰ্থই দেশৰ যুৱপ্ৰজন্মক ভাৰতমাতাৰ আহ্বানৰ প্ৰতি সঁহাৰি জনাই পৰিৱৰ্তনমুখী হ’বলৈ উদ্বুদ্ধ কৰে বুলি প্ৰধানমন্ত্ৰীয়ে উল্লেখ কৰে৷
“এই গীতটো তেতিয়া লিখা হৈছিল যেতিয়া ভাৰতৰ স্বাধীনতা আছিল সকলোৰে বাবে আটাইতকৈ ডাঙৰ সপোন৷ আজি আমি স্বাধীন হৈছোঁ আৰু এতিয়া আমাৰ বাবে আটাইতকৈ ডাঙৰ সপোন হ’ল বিকশিত ভাৰত,” এনেদৰেই প্ৰধানমন্ত্ৰীয়ে যুৱক-যুৱতীসকলক আগুৱাই যাবলৈ আৰু এখন বিকশিত ভাৰতৰ দুৱাৰ মুকলি কৰিবলৈ আহ্বান জনায়৷
প্ৰধানমন্ত্ৰী মোদীয়ে সাংস্কৃতিক সমন্বয়ৰ নিদৰ্শন দেখুৱাই দিল্লীত অনুষ্ঠিত হৈ যোৱা বীৰযোদ্ধা লাচিত বৰফুকনৰ ৪০০ বছৰীয়া জয়ন্তী উদযাপনৰ বিষয়েও উল্লেখ কৰে৷
“বৰ্তমান প্ৰতিটো চিন্তা আৰু সংস্কৃতিৰ মাজৰ সংহতি নতুন ৰূপত প্ৰাণ পাই উঠিছে,” প্ৰধানমন্ত্ৰীয়ে কয়৷ তেখেতে অসমৰ মুখ্যমন্ত্ৰী ড॰ হিমন্ত বিশ্ব শৰ্মাৰ শেহতীয়া মাধৱপুৰ মেলা ভ্ৰমণৰ কথা উল্লেখ কৰি কয় যে কৃষ্ণ-ৰুক্মিণীৰ এই চিৰযুগমীয়া বান্ধোনে উত্তৰ-পূৰ্বাঞ্চলক পশ্চিম ভাৰতৰ সৈতে সংযোগ কৰিছে৷ মুগা, তেজপুৰৰ লিচু, জহা চাউল, বোকা চাউল, কাজিনেমু আৰু গামোচাই লাভ কৰা জি আই টেগৰ অনন্য স্বীকৃতিৰ বাবেও প্ৰধানমন্ত্ৰীয়ে প্ৰশংসা কৰে৷
সহস্ৰাধিক নাচনী-ঢুলীয়াৰ বিহুনাচ আৰু ঢোলবাদনৰ প্ৰদৰ্শনেৰে বিশ্ব অভিলেখ গঢ়াৰ বাবে এই অনুষ্ঠানতে প্ৰধানমন্ত্ৰীৰ উপস্থিতিত মুখ্যমন্ত্ৰী ড॰ হিমন্ত বিশ্ব শৰ্মাক গীনিজ বুক অৱ ৱৰ্ল্ড ৰেকৰ্ডছৰ কৰ্তৃপক্ষই আনুষ্ঠানিকভাৱে প্ৰমাণপত্ৰ প্ৰদান কৰে৷
