আন্তঃগাঁথনিৰ উন্নীতকৰণেৰে ন্যায় ব্যৱস্থাৰ সবলীকৰণ

নলবাৰীৰ টোপেশ্বৰ দাস পেছাত এগৰাকী অধিবক্তা৷ তেওঁ আক্ষেপ প্ৰকাশ কৰি কয় যে তেওঁ আইন চৰ্চা কৰি অহা নলবাৰী জিলা সত্ৰ ন্যায়ালয়ত ঠাইৰ অভাৱ৷ দেশৰ অন্যান্য প্ৰান্তৰ কিছুসংখ্যক নিম্ন ন্যায়পালিকাৰ দৰেই অধিবক্তা দাসে কৰ্মৰত নলবাৰী ন্যায়ালয়কে ধৰি ৰাজ্যৰ প্ৰায়সংখ্যক নিম্ন আদালতৰে আন্তঃগাঁথনি জৰাজীৰ্ণ হোৱা বাবে ন্যায়ালয়ৰ কাৰ্যসমূহ ফলপ্ৰসূভাৱে সম্পাদন কৰিবলৈ কিছু অসুবিধাৰ সন্মুখীন হ’বলগীয়া হৈছে৷

ৰাজ্যৰ নিম্ন আদালতসমূহত প্ৰতিবছৰে বিচাৰাধীন গোচৰৰ সংখ্যা বৃদ্ধিৰ সমান্তৰালকৈ নিম্ন ন্যায়পালিকাসমূহৰ আন্তঃগাঁথনিৰ উন্নীতকৰণ হোৱা নাই৷ প্ৰযুক্তিৰ সহায়েৰে ন্যায় ব্যৱস্থাৰ উন্নীতকৰণৰ উদ্দেশ্যে ২০০৭ চনত আৰম্ভ কৰা ই-কোৰ্ট ইণ্টিগ্ৰেটেড মিশ্যন মোড প্ৰকল্পটো ৰাজ্যত এতিয়াও সম্পূৰ্ণৰূপে বাস্তৱায়িত হোৱা নাই৷

“আমাৰ আদালতসমূহত ঠাইৰ অভাৱ আছে৷ বৰ্তমান নলবাৰী চহৰৰ কাৰ্যবাহী আৰু ন্যায়পালিকা – এই দুয়োটা বিভাগৰে কাম-কাজসমূহ একেটা ভৱনতে সম্পাদন হৈ আছে৷ জিলা পক্স’ আদালতৰ কাম-কাজসমূহো এটা ভাৰাঘৰৰ পৰাই পৰিচালনা কৰা হৈছে৷ আনকি ফট’ষ্টেট মেচিনৰ দৰে অত্যাৱশ্যকীয় সামগ্ৰীসমূহো আমি নিজৰ সুবিধা অনুযায়ী ৰাখিব পৰা নাই৷ ৰাজ্য চৰকাৰে জিলা আদালতসমূহৰ স্থায়ী আন্তঃগাঁথনিৰ বাবে ভূমি আবণ্টন দিছে যদিও নিৰ্মাণকাৰ্য এতিয়াও সম্পূৰ্ণ হোৱা নাই,” তেওঁ কয়৷

শেহতীয়াকৈ মুখ্যমন্ত্ৰী ড° হিমন্ত বিশ্ব শৰ্মাই ৰাজ্যত ন্যায় ব্যৱস্থাৰ আন্তঃগাঁথনি শক্তিশালী কৰাৰ বাবে ৩০০ কোটি টকা প্ৰদান কৰা হ’ব বুলি ঘোষণা কৰাত অধিবক্তা টোপেশ্বৰ দাসে সন্তুষ্টি প্ৰকাশ কৰিছে৷

“নলবাৰীৰ চি জে এম আদালতত এটা উন্নতমানৰ ভিডিঅ’ কনফাৰেন্সিং কক্ষৰ প্ৰয়োজন৷ আদালতত মালখানাৰ বাবেও পৰ্যাপ্ত ঠাইৰ অভাৱ৷ যিহেতু এতিয়া কেন্দ্ৰ তথা ৰাজ্য চৰকাৰৰ পৰা পুঁজি অনুমোদন কৰা হৈছে, ৰাজ্যৰ নিম্ন ন্যায়পালিকাই ৰাজ্য চৰকাৰৰ পৰা নিশ্চয় সহযোগিতা লাভ কৰিব,” তেওঁ উল্লেখ কৰে৷

অধিবক্তা দাসে লগতে কয় যে নলবাৰী আদালতত ডিজিটেল আন্তঃগাঁথনিৰ অভাৱৰ বাবে ক’ভিড-১৯ মহামাৰীৰ সময়ত আদালতৰ কাম-কাজসমূহ ভাৰ্চুৱেলী সম্পন্ন কৰিবলগীয়া হোৱাত অধিবক্তাসকলে যথেষ্ট প্ৰত্যাহ্বানৰ সন্মুখীন হৈছিল৷

একেদৰেই ৰাজ্যৰ ন্যায়িক আন্তঃগাঁথনি উন্নীতকৰণৰ বাবে প্ৰস্তাৱিত বিনিয়োগৰ সিদ্ধান্তক আদৰণি জনাই যোৰহাট বাৰ এছ’চিয়েশ্যনৰ সম্পাদক শেৱালি গগৈ দত্তই অসম বাৰ্তাক কয়, “জিলা আদালতত ই-লাইব্ৰেৰীৰ সুবিধা নাই৷ আদালতৰ ভৱনত সদায় ঠাইৰ সমস্যা হয়৷ যোৰহাট জিলা আদালতত ৪৫০গৰাকী পঞ্জীয়নভুক্ত অধিবক্তা আছে কিন্তু আদালতত বহিবলৈ মাত্ৰ ২৫০খন আসনহে আছে৷ আদালতত বিচাৰাধীন গোচৰৰ সংখ্যা বৃদ্ধি পাই আহিছে৷ খালী পদসমূহ শীঘ্ৰে পূৰণ কৰি গোচৰসমূহ নিষ্পত্তি কৰাটো প্ৰয়োজন৷ সীমিত কৰ্মচাৰীৰ বাবে এমএচিটি আদালতে সুচাৰুৰূপে কাৰ্যসমূহ সম্পাদন কৰিব পৰা নাই৷”

ৰাজ্যত ন্যায় ব্যৱস্থাৰ আন্তঃগাঁথনি শক্তিশালী কৰাৰ বাবে কেন্দ্ৰীয় চৰকাৰে ৩০০ কোটি টকা প্ৰদান কৰাৰ কথা ঘোষণা কৰিছে৷ ইয়াৰ সমান্তৰালকৈ ৰাজ্য চৰকাৰেও এইক্ষেত্ৰত সম পৰিমাণৰ অতিৰিক্ত পুঁজি প্ৰদান কৰিব বুলি মুখ্যমন্ত্ৰী ড° হিমন্ত বিশ্ব শৰ্মাই ব্যক্ত কৰিছে৷

যোৱা ১০ ছেপ্টেম্বৰত গুৱাহাটীত অনুষ্ঠিত অসম, নাগালেণ্ড, মিজোৰাম, অৰুণাচল প্ৰদেশ আৰু ছিক্কিমৰ বাৰ কাউন্সিলৰ হীৰক জয়ন্তী উদযাপন অনুষ্ঠানত ভাষণ প্ৰদান কৰি মুখ্যমন্ত্ৰী ড° শৰ্মাই কয় যে ৰাজ্যত ন্যায় প্ৰদান প্ৰক্ৰিয়া শক্তিশালী কৰি তোলাৰ লক্ষ্যৰে নিম্ন ন্যায়পালিকাত ১০০টা পদৰ সৃষ্টি কৰা হ’ব৷

ৰাজ্য চৰকাৰে ওকালতিৰ পৰা অৱসৰ গ্ৰহণ কৰা অধিবক্তাসকলৰ বাবেও বিভিন্ন কল্যাণমূলক আঁচনি ৰূপায়ণৰ চিন্তা-চৰ্চা কৰি আছে বুলি তেওঁ উল্লেখ কৰে৷

অনুষ্ঠানটোত কেন্দ্ৰীয় আইন আৰু ন্যায় মন্ত্ৰী কিৰেণ ৰিজিজু, উচ্চতম ন্যায়ালয়ৰ ন্যায়াধীশ সূৰ্য কান্ত, ন্যায়াধীশ হৃষীকেশ ৰয়, ন্যায়াধীশ সুধাংশু ধুলীয়া আৰু গুৱাহাটী উচ্চ ন্যায়ালয়ৰ মুখ্য ন্যায়াধীশ আৰ এম চ্ছায়া উপস্থিত থাকে৷ অনুষ্ঠানত উপস্থিত ব্যক্তিসকলক সম্বোধন কৰি মুখ্যমন্ত্ৰী ড° শৰ্মাই বাৰ কাউন্সিলৰ ৬০ বছৰীয়া যাত্ৰা সফলতাৰে সম্পূৰ্ণ কৰাৰ বাবে অভিনন্দন জ্ঞাপন কৰে ৷

ছত্তীশগড় উচ্চ ন্যায়ালয়ৰ মুখ্য ন্যায়াধীশ অৰূপ কুমাৰ গোস্বামী, তেলেংগানা উচ্চ ন্যায়ালয়ৰ মুখ্য ন্যায়াধীশ উজ্জ্বল কুমাৰ ভূঞা, উচ্চ ন্যায়ালয়ৰ ন্যায়াধীশ তথা প্ৰাক্তন ন্যায়াধীশসকল, ভাৰতৰ ছলিচিটৰ জেনেৰেল তুষাৰ মেহতা, ভাৰতীয় বাৰ কাউন্সিলৰ অধ্যক্ষ মানন কুমাৰ মিশ্ৰ আৰু অসম, নাগালেণ্ড, মিজোৰাম, অৰুণাচল প্ৰদেশ আৰু ছিক্কিমৰ বাৰ কাউন্সিলৰ অধ্যক্ষ জি এন ছাহেৱালাকে আদি কৰি আন বহুকেইগৰাকী বিশিষ্ট ব্যক্তিও অনুষ্ঠানটোত উপস্থিত আছিল৷

“অসমৰ অধিকাংশ নিম্ন আদালতত পৰ্যাপ্ত ঠাইৰ অভাৱ৷ আনকি ন্যায়ালয়তো ইয়াৰ সদস্যসকলে বহিব পৰাকৈ পৰ্যাপ্ত ঠাই নাই৷ নিম্ন ন্যায়পালিকাই সঠিকভাৱে কাম কৰিবলৈ উন্নত আন্তঃগাঁথনিৰ প্ৰয়োজন,” অধ্যক্ষ ছাহেৱালাই কয়৷

মুখ্যমন্ত্ৰী ড° শৰ্মাই একেদিনাই উচ্চ ন্যায়ালয় চৌহদৰ পুৰণি ব্লকত নিৰ্মিত গুৱাহাটী উচ্চ ন্যায়ালয়ৰ সংগ্ৰহালয়ৰ উদ্বোধনী অনুষ্ঠানতো অংশগ্ৰহণ কৰে৷ সংগ্ৰহালয়টোত ভাৰতীয় সংবিধানৰ হাতে লিখা প্ৰতিলিপি, অধিবক্তাৰ পোছাক, অৱসৰপ্ৰাপ্ত ন্যায়াধীশসকলৰ উইগ, লিথো মেচিন আদি সামগ্ৰী প্ৰদৰ্শন কৰা হৈছে৷