সুধাকণ্ঠ ড° ভূপেন হাজৰিকাৰ মহান কৰ্মৰাজিৰ বিশ্বজুৰি প্ৰচাৰ-প্ৰসাৰৰ বাবে অসম চৰকাৰে চলিত বৰ্ষৰ ৮ ছেপ্টেম্বৰত তেখেতৰ জন্ম-শতবৰ্ষ উদযাপনৰ শুভাৰম্ভ কৰে।
গুৱাহাটীস্থিত ড° ভূপেন হাজৰিকা সমন্বয় ক্ষেত্ৰত ৰাজ্যপাল লক্ষ্মণ প্ৰসাদ আচার্য আৰু মুখ্যমন্ত্ৰী ড° হিমন্ত বিশ্ব শৰ্মাই শিল্পীগৰাকীলৈ পুষ্পাঞ্জলি অৰ্পণ কৰি এই মহান অনুষ্ঠানৰ শুভাৰম্ভ কৰে। অনুষ্ঠানত ভূপেন হাজৰিকাৰ সন্মানাৰ্থে ১০০গৰাকী বিশিষ্ট ব্যক্তিয়ে পতাকা উত্তোলন কৰে। ইয়াৰ পাছত তেখেতৰ অমৰ সৃষ্টিসমূহৰ প্ৰতি উৎসৰ্গীকৃত সংগীতৰ এটি অনুষ্ঠান আয়োজন কৰা হয়।
অনুষ্ঠানত অসমৰ ৰাজ্যপালে কয়, “এই শতবৰ্ষ উৎসৱ কেৱল এগৰাকী সংগীতজ্ঞক স্মৰণ কৰাৰ অনুষ্ঠানেই নহয়, এয়া হৈছে অনুপ্ৰেৰণাৰ উৎসৱ, যিয়ে ভৱিষ্যৎ প্ৰজন্মৰ মনক উদ্দীপিত কৰিব। এয়া অসমৰ আত্মাৰ উৎসৱ, এগৰাকী এনে ব্যক্তিৰ প্ৰতি শ্ৰদ্ধা জনোৱা হৈছে, যিগৰাকী মহান ব্যক্তিৰ কণ্ঠধ্বনি কেৱল আমাৰ ৰাজ্যতেই নহয়, ৰাষ্ট্ৰ আৰু বিশ্বজুৰি প্ৰতিধ্বনিত হৈছিল।”
তেখেতে লগতে কয়, “ড° ভূপেন হাজৰিকাই কেৱল গানেই গোৱা নহয়, তেখেতৰ জাতিটোৰ চেতনাবোধক জাগ্ৰত কৰিছিল। তেখেতৰ সংগীত হৈছে অন্যায়ৰ বিৰুদ্ধে এক আহ্বান আৰু সমাজ, সংস্কৃতি, প্ৰজন্মক একত্ৰিত কৰাৰ সেতু আছিল। তেখেত এগৰাকী মানৱতাবাদী, দূৰদৰ্শী আৰু মধুৰ সুৰ আছিল।”
সভাত ভাষণ আগবঢ়াই মুখ্যমন্ত্ৰী ড° হিমন্ত বিশ্ব শৰ্মাই কয়, “শতবৰ্ষ উদযাপনৰ মুখ্য সমিটিয়ে দিয়া পৰামৰ্শৰ ভিত্তিত ‘ড° ভূপেন হাজৰিকা সমাধি ক্ষেত্ৰ’-ক নতুনকৈ ‘ড° ভূপেন হাজৰিকা সমন্বয় ক্ষেত্ৰ’ হিচাপে নামকৰণ কৰা হ’ল। ইয়াৰ উপৰি, অহা ব’হাগ বিহুত ৰাজ্যৰ সকলো বিহু সমিতিক ভূপেনদাৰ নামত এটি সন্ধ্যা উৎসৰ্গিত কৰিবলৈ আহ্বান জনোৱা হৈছে। এয়া হ’ব শদিয়াৰ পৰা ধুবুৰীলৈ ভূপেন দাৰ সোঁৱৰণ।”
তেখেতে সামাজিক মাধ্যমত প্ৰকাশ কৰে, “ড° ভূপেন হাজৰিকা ভাৰতৰ ৰত্ন, মানৱতাৰ বিশ্বব্যাপী কণ্ঠস্বৰ হিচাপে আৰু এক চিৰন্তন প্ৰেৰণাৰ উৎস। যিগৰাকী মহান সত্তাই গীতেৰে অসমৰ কথা বিশ্বজুৰি বিয়পাই দিলে। আমি এগৰাকী কিংবদন্তিৰ জীৱনক উদযাপন কৰোঁ, যিয়ে নিজৰ হৃদয়স্পৰ্শী সুৰৰ জৰিয়তে অসমক বিশ্বলৈ লৈ গৈছিল। তেখেতৰ জীৱন আমাৰ সকলোৰে বাবে অনুপ্ৰেৰণাৰ উৎস। তেখেতে মানৱতাক সুৰ আৰু প্ৰেমক সংগীতৰ ৰূপ দিছিল।”
মুখ্যমন্ত্ৰীয়ে লগতে উল্লেখ কৰে যে কেন্দ্ৰৰ বিজেপি নেতৃত্বাধীন চৰকাৰে ড° ভূপেন হাজৰিকাক মৃত্যুৰ পাছত ভাৰত ৰত্ন সন্মান প্ৰদান কৰাৰ লগতে ডিব্ৰুগড় বিমানবন্দৰক তেখেতৰ নামেৰে নামকৰণ কৰাৰ দৰে অভূতপূৰ্ব সন্মান আগবঢ়াইছে।
মুখ্যমন্ত্রীয়ে ভূপেন হাজৰিকাক কেন্দ্ৰৰ বিজেপি নেতৃত্বাধীন চৰকাৰে প্ৰদান কৰা অভূতপূৰ্ব সন্মানৰ ওপৰতো আলোকপাত কৰে, যিয়ে ভূপেন হাজৰিকাক মৰণোত্তৰভাৱে ভাৰত ৰত্ন সন্মান প্ৰদান কৰে, যাৰ স্মৃতিত ডিব্ৰুগড় বিমানবন্দৰ নামেৰে নামাকৰণ কৰা হয়।
আনহাতে, ৰাজ্যৰ বিভিন্ন জিলাৰ আৰক্ষী আৰু প্রশাসনেও শিল্পীগৰাকীৰ প্ৰতি শ্ৰদ্ধা জ্ঞাপন কৰিবলৈ বিভিন্ন কাৰ্যসূচী আয়োজন কৰে।
১০ ছেপ্টেম্বৰত নগাঁও জিলাত এক ঐতিহাসিক কাৰ্যসূচীত ১৬,৭৪৭গৰাকী ছাত্ৰ-ছাত্ৰীয়ে একেলগে “মানুহে মানুহৰ বাবে” গীত গাই ইণ্ডিয়া বুক অৱ ৰেকৰ্ডছত স্থান লাভ কৰে। নগাঁও ক্ৰীড়া সংঘৰ অধীনত নুৰুল ষ্টেডিয়ামত আয়োজিত এই অনুষ্ঠানত ৬৩খন বিদ্যালয় আৰু মহাবিদ্যালয়ে অংশগ্ৰহণ কৰে।
নগাঁও জিলা আয়ুক্তই সামাজিক মাধ্যমত প্ৰকাশ কৰে, “নগাঁৱৰ ইতিহাসত এয়া এক সোণালী অধ্যায়। ১৫ হাজাৰৰো অধিক কণ্ঠই একেলগে ভাৰত ৰত্ন ড° ভূপেন হাজৰিকাক সন্মান জনাই মহাসংগীতৰ আয়োজন কৰে। নগাঁৱে গৌৰৱেৰে ভাৰতৰ ইতিহাসত নাম জিলিকাই তুলিলে।”
গুৱাহাটীস্থিত কেন্দ্ৰীয় যোগাযোগ ব্যুৰ’ (চি বি চি) -এ ড° ভূপেন হাজৰিকাৰ শতবৰ্ষ উপলক্ষে সপ্তাহজোৰা কাৰ্যসূচী আয়োজন কৰে। ৰাজ্যৰ বিভিন্ন স্থানত সংগীত, সাহিত্য, সংস্কৃতি আৰু সমাজলৈ তেখেৰ অৱদানক সন্মান জনাবলৈ এই অনুষ্ঠানসমূহ অনুষ্ঠিত কৰা হয়।
উদযাপনৰ অংশ হিচাপে গুৱাহাটীৰ দীঘলীপুখুৰী উদ্যানত এক সাংস্কৃতিক অনুষ্ঠানৰ আয়োজন কৰা হয়, য’ত সংগীত আৰু নাট বিভাগীয় শিল্পীসকলে ভাৰত ৰত্নৰ দ্বাৰা গোৱা আৰু সুৰ কৰা জনপ্ৰিয় গীতসমূহ পৰিৱেশন কৰে।
সাংস্কৃতিক শ্ৰদ্ধাঞ্জলিৰ উপৰি ১০ আৰু ১১ ছেপ্টেম্বৰত মৰিগাঁৱত মূল বিষয়বস্তুৰ ওপৰত জনগোষ্ঠীসমূহক জড়িত কৰিবলৈ সজাগতামূলক কাৰ্যসূচীও অনুষ্ঠিত কৰা হয়। মৰিগাঁও জিলাৰ জালুগুটি উচ্চতৰ মাধ্যমিক বিদ্যালয়ত স্বচ্ছতা হি সেৱা, এক পেড় মা কে নাম, আৰু নিচামুক্তি অভিযানৰ লগতে শিল্পীগৰাকীৰ জন্ম-শতবাৰ্ষিকীক আলোকপাত কৰি এক কাৰ্যসূচী অনুষ্ঠিত কৰা হয়।
১৫ ছেপ্টেম্বৰত অভ্যন্তৰীণ জল পৰিবহণ প্ৰাধিকৰণে গুৱাহাটী পাণ্ডু বন্দৰত “বিস্তীৰ্ণ পাৰৰে” নামৰ এক সংগীতময় যাত্ৰা আয়োজন কৰে, য’ত ব্ৰহ্মপুত্ৰৰ সৈতে ভূপেন দাৰ অনন্ত সম্পৰ্কক স্মৰণ কৰা হয়। এই সংগীতৰ যাত্ৰা ৮ ছেপ্টেম্বৰত তিনিচুকীয়াৰ গুইজানৰ পৰা আৰম্ভ হৈ শদিয়াৰ পৰা ধুবুৰীলৈ ব্ৰহ্মপুত্ৰ পাৰ হৈ গৈছে। এই অনন্য পদক্ষেপে সংগীত, সংস্কৃতি আৰু নদীভিত্তিক ভ্ৰমণৰ সংমিশ্ৰণেৰে ভূপেন হাজৰিকাৰ জীৱন আৰু কৰ্মক উদযাপন কৰাৰ লগতে নদী পৰ্যটনস্থলী হিচাপে ব্ৰহ্মপুত্ৰৰ সম্ভাৱনাক উজ্জ্বল কৰি তুলিছে।
কেন্দ্ৰীয় মন্ত্ৰী শ্ৰী সৰ্বানন্দ সোণোৱালে কয়, “এই যাত্ৰা হৈছে ড° ভূপেন হাজৰিকাৰ প্ৰতি শ্ৰদ্ধা আৰু একে সময়তে ব্ৰহ্মপুত্ৰ নদীক সংস্কৃতি আৰু অৰ্থনীতিৰ জীৱনীশক্তি ৰূপে গঢ়ি তোলাৰ এক পদক্ষেপ। নদীভ্ৰমণ পৰ্যটনে অসমৰ অৰ্থনীতি ৰূপান্তৰিত কৰিব পাৰে, স্থানীয় লোকক কর্মসংস্থানৰ সুযোগ দিয়াৰ লগতে বিশ্ব পৰ্যটকক আকৃষ্ট কৰিব।”
তেখেতে লগতে কয়, “ব্ৰহ্মপুত্ৰত নদী ভ্ৰমণ পৰ্যটন অসমৰ পৰিচয় হ’ব পাৰে। প্ৰকৃতিৰ অপূৰ্ব সৌন্দর্য আৰু সংস্কৃতিময় ইতিহাস, এই দুয়োটাৰ সৰ্বোত্তম সংমিশ্ৰণ ব্ৰহ্মপুত্ৰত আছে। ‘বিস্তীৰ্ণ পাৰৰে’-ৰ দৰে উদ্যোগৰ জৰিয়তে আমি অসমৰ নাম বিশ্বৰ নদী ভ্ৰমণ পৰ্যটনৰ মানচিত্ৰত প্ৰতিষ্ঠিত কৰিব বিচাৰোঁ।”
