অসমৰ ছয়খন সমাজ ক্ৰমে আহোম, চুটীয়া, মৰাণ, মটক, কোচ-ৰাজবংশী আৰু চাহ জনজাতি (আদিবাসী)ক অনুসূচিত জনজাতি (এছ টি) মৰ্যাদা প্ৰদানৰ বিষয়ে গঠন কৰা মন্ত্ৰীসভাৰ গোট (জি অ’ এম)ৰ প্ৰতিবেদনখন সংবেদনশীল যদিও অত্যন্ত গুৰুত্বপূৰ্ণ প্ৰচেষ্টা। এই প্ৰতিবেদনখনে এই সমাজসমূহৰ বহুদিনীয়া দাবীৰ প্ৰতি ইতিবাচক সঁহাৰি জনোৱাৰ লগতে ৰাজ্যবাসীৰ মাজত নিজৰ অৱস্থান সম্পৰ্কে সজাগ চৰকাৰ এখনৰ দৃঢ় আৰু নিৰ্ণায়ক পদক্ষেপৰ সংকেত দিয়ে। একেদৰে, এই প্ৰতিবেদনখনক এক সমন্বয়মূলক পদক্ষেপ বুলিও বিবেচনা কৰিব পাৰি, কিয়নো অনুসূচিত জনজাতি মৰ্যাদা প্ৰদানৰ লগতে বিদ্যমান জনজাতিসমূহৰ অধিকাৰ আৰু সংৰক্ষণ কোটাক সুৰক্ষিত কৰি ৰাখিবলৈও গুৰুত্ব দিয়া হৈছে।
তিনিজনীয়া মন্ত্ৰীসভাৰ গোটে ৰাজ্যখনত অনুসূচিত জনজাতিসমূহৰ এক তিনিস্তৰীয়া শ্ৰেণীবিভাজনৰ প্ৰস্তাৱ আগবঢ়াইছে, যাৰ জৰিয়তে অসমত এই সমাজসমূহৰ জনসংখ্যাৰ বিশেষ বিস্তাৰ আৰু অন্যান্য দিশ সন্দৰ্ভত বিবেচনাত লোৱা হৈছে। লগতে মনত ৰখা উচিত যে এইখন এতিয়াও এখন অন্তৱৰ্তীকালীন প্ৰতিবেদন আৰু বিচক্ষণতা তথা জ্ঞানৰ সহায়ত ইয়াক অধিকাংশ অংশীদাৰৰ সন্তুষ্টিৰ বাবে অধিক পৰিমাৰ্জিত কৰিব পৰা যায়।
তথাপিও, আজিৰ চৰকাৰে এই প্ৰতিবেদনখনক অসমীয়া সমাজৰ ৰাজনৈতিক আৰু জাতিগত ইতিহাসত এক ৰূপান্তৰমুখী দস্তাবেজ হিচাপে বিবেচনা কৰি বিষয়টোৰ ওপৰত বিস্তৃত আলোচনা কৰিবলৈ বিৰোধী দলসমূহকো অংশীদাৰ কৰাটো অত্যন্ত প্ৰয়োজন।
