অসম বাৰ্তাই জল সম্পদ, তথ্য আৰু জনসংযোগ, সংসদীয় পৰিক্ৰমা, সামাজিক ন্যায় আৰু সবলীকৰণ বিভাগৰ মন্ত্ৰী পীযুষ হাজৰীকাক সাক্ষাৎ কৰি তেওঁৰ বিভিন্ন বিভাগৰ কাম-কাজৰ উপৰি বান পৰিস্থিতি নিয়ন্ত্ৰণ আৰু বান পৰৱৰ্তী ব্যৱস্থাৰ বিষয়ে বাৰ্তালাপ কৰে৷ এই সাক্ষাৎকাৰৰ কিয়দংশ এনেধৰণৰ-
অসম বাৰ্তা: এইবাৰৰ বান পৰিস্থিতি পূৰ্বৰ তুলনাত কিমান ব্যাপক আৰু প্ৰত্যাহ্বানমূলক আছিল?
পীযুষ হাজৰীকা: অসমৰ বান এটা বৃহৎ সমস্যা৷ গতিকে, এই সমস্যাটো এটা বছৰতে সমাধান কৰিব পাৰি বুলি মই নাভাবোঁ৷ কিন্তু, মাননীয় মুখ্যমন্ত্ৰী ডাঙৰীয়াৰ নেতৃত্বত আমি এনে কিছুমান ব্যৱস্থা হাতত লৈছোঁ, যিবোৰৰ জৰিয়তে হয়তো অনাগত ভৱিষ্যতত বানৰ প্ৰকোপ কমাব পৰা যাব৷ অসমৰ ভৌগোলিক অৱস্থাটো কিছু ভিন্ন৷ আমাৰ ৰাজ্যখন প্ৰায় চাৰিওফালে পাহাৰেৰে আৱৰা৷ বাৰিষাকালত যেতিয়া অত্যধিক বৃষ্টিপাতৰ বাবে চুবুৰীয়া ৰাজ্যসমূহৰ পৰা হঠাতে পানী নামি আহে, তেতিয়া তাৰ প্ৰভাৱ অসমতো পৰে৷ গতিকে, মই ভাবোঁ যে বানৰ ক্ষয়-ক্ষতি বা ইয়াৰ প্ৰভাৱ হ্ৰাস কৰাৰ বাবে এক সুপৰিকল্পিত চিন্তাৰ প্ৰয়োজন আছে৷
যদিও বান পৰিস্থিতি এতিয়াও সম্পূৰ্ণৰূপে শেষ হোৱা নাই আৰু এক-ডেৰ মাহমান এই পৰিস্থিতি থাকিব, গতিকে এতিয়াই ক্ষয়-ক্ষতিৰ সঠিক পৰিমাণ নিৰ্ধাৰণ কৰাটো সম্ভৱ নহয়৷ তথাপি, স্বীকাৰ কৰিব লাগিব যে বানৰ প্ৰকোপ শিলচৰ, নগাঁও আৰু হোজাইত অকল্পনীয় আছিল৷ আনহাতে, মৰিগাঁও আৰু ধেমাজি জিলা দুখন প্ৰতিবছৰে বানত ব্যাপকভাৱে ক্ষতিগ্ৰস্ত হয় যদিও এইবাৰ তাত ক্ষয়-ক্ষতিৰ পৰিমাণ তুলনামূলকভাৱে কম৷ মোৰ সমষ্টি জাগীৰোডত বানৰ প্ৰভাৱ পূৰ্বৰ বছৰবোৰতকৈ যথেষ্ট কম৷ আগতে বানত বুৰ গৈ থকা মৰিগাঁও জিলাৰ বিস্তৰ অঞ্চলত এইবাৰ পানী হোৱা নাই৷ কিয়নো, আমি সেই অঞ্চলৰ ব্ৰহ্মপুত্ৰৰ পাৰত ১৪ কিল’মিটাৰ দৈৰ্ঘ্যৰ মথাউৰি সাজিবলৈ সক্ষম হৈছোঁ৷ বান নিয়ন্ত্ৰণৰ বাবে ধেমাজিত যোৱা বছৰটোত প্ৰায় ১৫০ কোটি টকা ব্যয়েৰে জীয়াধল নদীৰ পাৰত এক নতুন প্ৰযুক্তিৰে মথাউৰি (Ready-made embankment) নিৰ্মাণ কৰা হৈছে, যাৰ ফলশ্ৰুতিত এইপৰ্যন্ত ধেমাজিত বান হোৱা নাই৷ মই ভাবোঁ যে এইবাৰৰ ব্যাপক বানৰ এক অন্যতম প্ৰধান কাৰণ হ’ল এইবাৰ বৃষ্টিপাতৰ ঘনত্ব যথেষ্ট বেছি হৈছে৷ একেটা কাৰণতে ডিমা হাছাওত হাফলং ৰে’ল ষ্টেচনো ক্ষতিগ্ৰস্ত হৈছিল৷ মাননীয় মুখ্যমন্ত্ৰী ডাঙৰীয়াই জলসম্পদ বিভাগৰ সৈতে আলোচনা কৰি ব্যাপকৰূপত নতুনকৈ প্ৰভাৱিত হোৱা ঠাইসমূহত যাৱতীয় পদক্ষেপ গ্ৰহণ কৰিবলৈ নিৰ্দেশ দিছে৷ ইমানদিনে হৈ অহা এটা প্ৰযুক্তিগত ভুলৰ শুধৰণি কৰি আমি এইবাৰ এক নতুন পদক্ষেপ গ্ৰহণ কৰিবলৈ ওলাইছোঁ৷ সাধাৰণতে, বহুতো দীঘল মথাউৰি কোনো কালভাৰ্ট বা শ্লুইচ গেট নোহোৱাকৈ নিৰ্মাণ কৰি দিয়া হয়৷ একোটা নিৰ্দিষ্ট দূৰত্বত দলনি বা জনবসতি নথকা অঞ্চলত সৰু সৰু কালভাৰ্ট বা শ্লুইচ গেট নিৰ্মাণ কৰি দিলে এই সমস্যাটো ৰোধ কৰিব পৰা যাব পাৰে৷
অসম বাৰ্তা: সাধাৰণতে গৰাখহনীয়া সমস্যাটোৱে খুব কমেই মনোযোগ লাভ কৰে৷ এই সমস্যা নিয়ন্ত্ৰণৰ বাবে আপুনি কি কি ব্যৱস্থা হাতত লৈছে?
পীযুষ হাজৰীকা: হয়, গৰাখহনীয়া এটা অন্যতম জ্বলন্ত সমস্যা৷ ইয়াক ৰুধিবলৈ আমি দুটা ব্যৱস্থা হাতত লৈছোঁ- অস্থায়ী আৰু স্থায়ী৷ বান পৰিস্থিতিৰ সময়ছোৱাত কৰিবলগীয়া কেতবোৰ অস্থায়ী কাম থাকে৷ বহুতে হয়তো ভাবিব পাৰে যে বান আহিলেহে কাম কৰিব আৰু তাৰ আগে-পিছে নকৰিব, কিন্তু তেনে নহয়৷ আচলতে জলসম্পদ বিভাগটো এনে এটা বিভাগ য’ত বানৰ সময়ত কাম কৰিবই লাগিব৷ অস্থায়ী কামসমূহ মে’ মাহৰ পৰা ছেপ্টেম্বৰ মাহলৈ আৰু স্থায়ী কামবোৰ নৱেম্বৰৰ পৰা এপ্ৰিল মাহৰ ভিতৰত কৰাৰ সময়সীমা নিৰ্ধাৰণ কৰা হৈছে৷ বান নিয়ন্ত্ৰণৰ বাবে প্ৰয়োজনীয় কাম-কাজ কৰিবলৈ প্ৰতিখন জিলাক ১ কোটি টকাকৈ দিয়া হয়৷ পূৰ্বতে এই পুঁজি নৱেম্বৰ মাহতহে মুকলি কৰা হৈছিল৷ এতিয়া সেই পুঁজি মে’ মাহতে মোকলাই দিয়াৰ ব্যৱস্থা কৰা হৈছে৷ এইবাৰ বান হোৱাৰ আগতে ঠায়ে ঠায়ে জিঅ’ বেগ, লঞ্চিং বেগ, পৰ্কুপাইন সংস্থাপন কৰি দিয়া হৈছিল৷ তাকে নকৰিলে হয়তো ক্ষয়-ক্ষতিৰ পৰিমাণ ইয়াতকৈ বহু বেছিয়ে হ’লহেঁতেন৷ মোৰ বিশ্বাস এই সামগ্ৰীসমূহৰ ব্যৱহাৰৰ ফলত বহুতো মথাউৰি আৰু খহনীয়া হোৱা অঞ্চল ৰক্ষা পৰিছে৷ এই ব্যৱস্থাই গৰাখহনীয়া সমস্যা ৰোধৰ ক্ষেত্ৰতো কাম কৰিছে৷
অসম বাৰ্তা: বানৰ ফলত ক্ষয়-ক্ষতিৰ পৰিমাণ এই পৰ্যন্ত কিমান হ’ব পাৰে বুলি আপোনাৰ ধাৰণা হয়? ইতিমধ্যে কিছুমান মাধ্যমত ৩,৪০০ কোটি বা তাতকৈ অধিক পৰিমাণৰ ক্ষতি হোৱা বুলি চৰ্চা হৈ আছে৷
পীযুষ হাজৰীকা: প্ৰকৃত ক্ষয়-ক্ষতিৰ পৰিমাণ এতিয়াই কৈ দিব পৰা নাযায় কাৰণ পৰ্যালোচনা (Damage Assessment) চলিহে আছে৷ ক্ষয়-ক্ষতিৰ যি পৰিমাণ বিভিন্ন মাধ্যমত প্ৰকাশ পাইছে, মই ভাবোঁ যে এইসমূহ চৰকাৰী তথ্য নহয়৷ কিয়নো, অসম ৰাজ্যিক দুৰ্যোগ প্ৰশমন প্ৰাধিকৰণ আৰু ৰাজহ বিভাগে এই কাম কৰে৷ বান এতিয়াও শেষ হোৱা নাই৷ গতিকে, এতিয়াই কোনো এটা পৰিমাণ অনুমান কৰি ল’ব পৰা নাযায় বা কিবা এটা সংখ্যা ধৰি লোৱাটো উচিত নহয়৷
অসম বাৰ্তা: বান সাহায্য প্ৰদানৰ ক্ষেত্ৰত চৰকাৰৰ তৰফৰ পৰা কেনেধৰণৰ বিশেষ পদক্ষেপ হাতত লোৱা হৈছে?
পীযুষ হাজৰীকা: প্ৰায় ১১ বছৰ বিধায়ক হিচাপে আৰু বিগত ৪ বছৰ ৬ মাহ মন্ত্ৰী হিচাপে মোৰ ২৩ বছৰীয়া ৰাজনৈতিক জীৱনত এনে এগৰাকী মুখ্যমন্ত্ৰী দেখা নাই৷ মুখ্যমন্ত্ৰীগৰাকী বান সাহায্য শিবিৰৰ পৰা ওলাই যোৱাৰ লগে লগে বন্যাৰ্তসকলে এছ ডি আৰ এফৰ সাহায্যৰ ধন লাভ কৰিছে৷ এইবাৰ যিমান বন্যাৰ্ত লোক সাহায্য শিবিৰত আছিল, তেওঁলোকে ইতিমধ্যে প্ৰয়োজনীয় কাপোৰ আৰু বাচন-বৰ্তন ক্ৰয় কৰিবলৈ ৩,৮০০ টকাকৈ লাভ কৰিছে৷ মাননীয় মুখ্যমন্ত্ৰী ড॰ হিমন্ত বিশ্ব শৰ্মা ডাঙৰীয়াই আশ্বাস প্ৰদান কৰিছে যে যিসকলৰ ঘৰ-দুৱাৰ বানে উটুৱাই নিলে বা ভাঙি পেলালে, তেওঁলোকক আমি অহা আগষ্ট মাহৰ ভিতৰত ৯৮,০০০ টকাকৈ প্ৰদান কৰিম৷ ইয়াৰ পূৰ্বে এনে উদাহৰণ পাবলৈ নাই৷ তদুপৰি, ছাত্ৰ-ছাত্ৰীসকলক কিতাপ আৰু শিক্ষণ সামগ্ৰী প্ৰদান কৰাৰ লগতে প্ৰয়োজনীয় সাহায্য সামগ্ৰীও বিতৰণ কৰা হৈছে৷ ৰাইজৰ সহযোগিতাৰে আমি সকলোৱে ‘টীম অসম’ হিচাপে কাম কৰি আছোঁ৷
অসম বাৰ্তা: জনসংযোগ বিভাগটোক ন-উদ্যম প্ৰদান কৰিবলৈ আপুনি বিশেষভাৱে তৎপৰ হোৱাটো চৰ্চিত হৈছে৷ বিভাগটোক লৈ আপোনাৰ ভৱিষ্যৎ পৰিকল্পনা কেনেধৰণৰ? ডিজিটেল মিডিয়াৰ ক্ষেত্ৰত কেনেধৰণৰ নীতি-নিৰ্দেশনা বা পদক্ষেপ গ্ৰহণ কৰিব?
পীযুষ হাজৰীকা: ডিআইপিআৰৰ বিলিং পদ্ধতিটোত আমি এক বৃহৎ প্ৰশাসনিক সংস্কাৰ আনিবলৈ সক্ষম হৈছোঁ৷ আগতে ডিআইপিআৰে সংবাদ মাধ্যমত দিয়া বিজ্ঞাপনৰ বিল নিৰ্দিষ্ট সংবাদ গোষ্ঠীটোৱে প্ৰায় ৬ মাহ বা কেতিয়াবা এবছৰৰ পাছতো পোৱা নাছিল৷ কিন্তু, এতিয়া মুখ্যমন্ত্ৰী ডাঙৰীয়াই বিলিং প্ৰক্ৰিয়াটো সৰলীকৃত কৰি প্ৰতি মাহে বিল আদায় দিয়াৰ ব্যৱস্থা কৰিছে৷ চৰকাৰৰ জনমুখী কাম-কাজসমূহ আমি জনগণৰ মাজলৈ নিয়াৰ প্ৰয়াস কৰিছোঁ৷ এতিয়াও এনে বহু লোক আছে যিসকলে চৰকাৰৰ বিভিন্ন আঁচনিৰ সুযোগ-সুবিধা, নীতি-নিৰ্দেশনাৰ বিষয়ে ভালদৰে জ্ঞাত নহয়৷ সেইবাবে আমি এনে তথ্যমূলক বিজ্ঞাপনৰ সংখ্যা আগতকৈ বৃদ্ধি কৰিছোঁ৷ ডিজিটেল মিডিয়াৰ নীতি-নিৰ্দেশনাৰ ক্ষেত্ৰত আমি আগবঢ়া নাই কাৰণ সেয়া কেন্দ্ৰীয় চৰকাৰৰ আওতালৈ আহে৷ সংবাদ মাধ্যম বা কোনো লোকৰ স্বাধীনতাত আমি হস্তক্ষেপ কৰিবলৈ বিচৰা নাই৷ আমি বিশ্বাস কৰোঁ যে যিকোনো মিডিয়া হাউছে নিজেই নিজক নিয়ন্ত্ৰণ কৰাটোৱে সৰ্বোত্তম উপায়৷
