বিশ্বকর্মা পূজাৰ বিশেষ ক্ষণত অসমৰ ৰাজ্যপাল লক্ষ্মণ প্ৰসাদ আচাৰ্যই বিভিন্ন ক্ষেত্ৰত অসামান্য অৱদান আগবঢ়োৱা ছগৰাকী দিব্যাংগ ব্যক্তিম বিশ্বকর্মা বঁটা প্ৰদান কৰে।
বঁটা প্ৰদানৰ সময়ত ৰাজ্যপালগৰাকীয়ে কয়, “আমাৰ মনোযোগ কোনোবাই কি কৰা নাই, নাই তাৰ ওপৰত হ’ব নালাগে, বৰং তেওঁলোকৰ ভিতৰত থকা অসাধাৰণ প্ৰতিভা চিনাক্ত কৰাটো প্ৰয়োজনীয়।”
তেখেতে লগতে কয় যে এই চিন্তাধাৰাই সমাজত ‘বিকলাংগ’ শব্দটোক ‘দিব্যাংগজন’ হিচাপে ৰূপান্তৰ কৰাৰ বাবে প্ৰেৰণা যোগাইছে, যাৰ ফলত শাৰীৰিক অসক্ষমতাৰ প্ৰতি সমাজৰ দৃষ্টিভংগীতো এক ইতিবাচক পৰিৱৰ্তন আহিছে।
‘অসম বিশ্বকর্মা সন্মান’ বঁটা ছগৰাকী দিব্যাংগ ব্যক্তিক প্ৰদান কৰা হয়, যিসকলে নিজৰ নিজৰ ক্ষেত্ৰত সাহস, উদ্ভাৱনশীলতা আৰু নিষ্ঠাৰ উদাহৰণ দাঙি কৰিছে।
গোৱালপাৰাৰ মৌলিক ৰাভাই (দৃষ্টিহীন শিক্ষক) সংগীত বিদ্যালয় স্থাপন কৰি অসমীয়া সংগীত সংস্কৃতি সংৰক্ষণৰ বাবে আগবঢ়াই অহা অৱদানৰ বাবে তেখেতক এই সন্মান আগবঢ়োৱা হয়।
কাৰ্বি আংলঙৰ নিবেদিতা ঘোষ (দৃষ্টিহীন শিক্ষক) আৰু অনুপ্ৰেৰণাদায়ক বক্তা হিচাপে সাহিত্য আৰু শিক্ষা ক্ষেত্ৰত আগবঢ়োৱা বৰঙণিৰ বাবে এই সন্মান লাভ কৰে।
বজালীৰ ধৰণী কলিতাই বিজ্ঞান, অভিযান্ত্ৰিক, চিকিৎসা আদি ক্ষেত্ৰলৈ আগবঢ়োৱা অৰিহণা বাবে এই বঁটাৰে সন্মানিত। তেখেতে মেনুৱেল ট্ৰাইচাইকেলক বিদ্যুৎচালিত ট্ৰাইচাইকেলত ৰূপান্তৰ কৰি বহু দিব্যাংগ ব্যক্তিক উপকৃত কৰিছে।
নগাঁৱৰ ৰাকেশ বণিক সামাজিক সেৱা শিতানত এই বঁটাৰে সন্মানিত; অসমৰ বানপীড়িত লোকসকলৰ সহায় আৰু সজাগতা বৃদ্ধিৰ বাবে ২৫০০ কিলোমিটাৰ অভিযান সম্পন্ন কৰিছিল।
কামৰূপৰ মহানগৰৰ অভিষেক গগৈ ক্ৰীড়া শিতানত এই সন্মান লাভ কৰে। তেখেতে এগৰাকী পেৰাএথলিট, যিয়ে স্পেচিয়েল অলিম্পিক আৰু ৰাষ্ট্ৰীয় স্তৰত পদক অৰ্জন কৰিছে।
যোৰহাটৰ অকণি বৰুৱা বাণিজ্য, উদ্যোগ আৰু ব্যৱসায় ক্ষেত্ৰত সন্মানিত; তেখেতে পৰম্পৰাগত হস্তশিল্পক আগবঢ়াই স্থানীয় যুৱচামৰ বাবে কৰ্মসংস্থাপনৰ সুযোগ সৃষ্টি কৰিছে।
ৰাজ্যপালগৰাকীয়ে বঁটা বিজয়ীসকলক সমাজৰ “প্ৰকৃত বিশ্বকর্মা” বুলি অভিহিত কৰি কয়, “তেওঁলোকৰ জীৱন হৈছে অধ্যৱসায়, উদ্ভাৱন আৰু সমাজ সেৱাৰ প্ৰতিচ্ছবি।”
তেখেতে মুখ্যমন্ত্ৰী ড° হিমন্ত বিশ্ব শৰ্মাৰ নেতৃত্বত চৰকাৰৰ দিব্যাংগ লোকৰ কল্যাণমূলক উদ্যোগ, বিশেষকৈ দীনদয়াল দিব্যাংগ পুনর্বাসন আঁচনিৰ কথাও উল্লেখ কৰে, যাৰ লক্ষ্য হৈছে দিব্যাংগ নাগৰিকৰ পুনৰ্বাসন, আৰ্থিক সহায় আৰু দক্ষতা বিকাশ নিশ্চিত কৰা।
ৰাজ্যপালগৰাকীয়ে আহ্বান জনায়,“আমাৰ সমাজে কোনো ব্যক্তিক তেখেতৰ শাৰীৰিক অৱস্থাৰ বাবে নহয়, বৰং তেখেতৰ অৱদান, চৰিত্ৰ আৰু সক্ষমতাৰ বাবে মূল্যায়ন কৰিব লাগে। আহক, আমি এনে এখন ভাৰত গঢ়োঁ য’ত কোনো উপেক্ষিত নহয়, কোনো পিছপৰা নহয় আৰু প্ৰতিগৰাকী ব্যক্তিক দিয়া হয় গৌৰৱ আৰু সন্মান।”
অসমৰ গ্ৰামাঞ্চলৰ বাবে কেন্দ্ৰৰ সহায়
গ্ৰাম্য স্থানীয় সংস্থাসমূহৰ বিকাশৰ লক্ষ্য লৈ ভাৰত চৰকাৰে অসমত ১৫সংখ্যক বিত্ত আয়োগৰ ২১৪ কোটি টকাৰো অধিক অনুদান মুকলি কৰে।
এই অনুদান ব্যৱহাৰ কৰা হ’ব শৌচালয় ব্যৱস্থা, অ’ডিএফ মানদণ্ড ৰক্ষা, আৱৰ্জনা ব্যৱস্থাপনা, জল যোগান, বৰষুণৰ পানী সংগ্ৰহ আৰু জল পুনৰ ব্যৱহাৰৰ বাবে।
কেন্দ্ৰীয় চৰকাৰে পঞ্চায়তী ৰাজ মন্ত্র্যালয় আৰু জল শক্তি মন্ত্র্যালয়ৰ মাধ্যমেৰে ৰাজ্যৰ গ্ৰাম্য স্থানীয় সংস্থাসমূহ আৰু পঞ্চায়তী ৰাজ প্ৰতিষ্ঠানৰ বাবে এই বিত্তীয় আয়োগৰ অনুদান মুকলি কৰাত অনুমোদন দিয়ে।
এই উপলক্ষে মুখ্যমন্ত্ৰী ড° হিমন্ত বিশ্ব শৰ্মাই প্ৰকাশ কৰে,“আদৰণীয় প্ৰধানমন্ত্ৰী শ্ৰী নৰেন্দ্ৰ মোদীৰ নেতৃত্বত কেন্দ্ৰীয় চৰকাৰক অসমৰ গ্ৰাম্য স্থানীয় সংস্থাসমূহৰ সক্ষমতা বৃদ্ধিৰ বাবে আৰু গ্ৰামাঞ্চলত খোৱাপানী যোগান, পৰিষ্কাৰ-পৰিচ্ছন্নতা আদিৰ বাবে ২১৪.৫৪২ কোটি টকা মুকলি কৰাৰ বাবে কৃতজ্ঞতা জনাইছোঁ। এই পদক্ষেপে আমাৰ গ্ৰাম্য উন্নয়ন প্রচেষ্টাক শক্তিশালী কৰিব।”
