বঙাইগাঁও জিলাৰ সমগ্ৰ শিক্ষা অভিযানৰ খণ্ড সমল ব্যক্তি (বিআৰপি) তপন ডেকা (৪১ বছৰ)ৰ কোনো ধাৰণাই নাছিল যে তেওঁ এটা বিৰল অভিলেখৰ অংশীদাৰ হ’ব পাৰিব৷ গীনিজ বুক অফ ৱৰ্ল্ড ৰেকৰ্ডছৰ ‘এজন ব্যক্তিৰ বিষয়ে হাতে লিখা টোকাৰ সৰ্ববৃহৎ অনলাইন ফ’ট’ এলবাম’ শ্ৰেণীত অসমৰ নাম অন্তৰ্ভুক্ত কৰাত তেওঁৰ নামটো বিশেষভাৱে জড়িত৷
সপ্তদশ শতিকাৰ মহান আহোম সেনাধিনায়ক লাচিত বৰফুকনৰ বিষয়ে ২০২২ চনৰ ২৬ অক্টোবৰত লিখা তেওঁৰ লেখাটো অসমলৈ গীনিজ ৱৰ্ল্ড ৰেকৰ্ডছৰ অনন্য সন্মান কঢ়িয়াই অনা ৪২,৯৪,৩৫০টা লেখাৰ ভিতৰত আছিল প্ৰথমটো লেখা৷
সেইদিনাই অসমৰ মুখ্যমন্ত্ৰী ড॰ হিমন্ত বিশ্ব শৰ্মাই গুৱাহাটীৰ এক অনুষ্ঠানত www.lachitbarphukan.assam.gov.in শীৰ্ষক এটা প’ৰ্টেল আৰু লাচিত বৰফুকন নামেৰে এটা ম’বাইল এপ্লিকেশ্যন মুকলি কৰি বিশ্ববাসীক আহোম সেনাপতিগৰাকীৰ প্ৰতি থকা তেওঁলোকৰ ধাৰণাৰ বিষয়ে লিখিবলৈ আহ্বান জনাইছিল৷
“ৰাজহুৱা মঞ্চত লাচিত বৰফুকনৰ বিষয়ে লিখিবলৈ সুযোগ পোৱাটো মোৰ বাবে আনন্দৰ কথা আছিল৷ তিনি পৃষ্ঠাৰ ৰচনাখন অসমীয়াত লিখি নিৰ্দিষ্ট প’ৰ্টেলটোত মই আপল’ড কৰিছিলোঁ,” ডেকাই সেই দিনটোৰ কথা সুঁৱৰি কয়৷
“কোনো ধাৰণাই নাছিল যে এই বিশ্ব ৰেকৰ্ড গঢ়িব পৰা শৃংখলাটোৰ মই প্ৰথমজন ব্যক্তি হ’ব পাৰিম৷ বিষয়টোৰ প্ৰতি থকা উৎসাহৰ বাবেহে মই প্ৰবন্ধটো লিখিছিলোঁ৷ বাতৰিটো পাই মোৰ অনুভৱ হৈছে মই যেন দেশৰ প্ৰতি সামান্য হ’লেও কিবা এটা অৰিহণা আগবঢ়াব পাৰিছোঁ৷ মোৰ পৰিয়ালেও ইয়াত অংশ লৈছিল,” নলবাৰীৰ ঘগ্ৰাপাৰাৰ ৰামপুৰ আজগৰা গাঁৱৰ বাসিন্দা ডেকাই অসম বাৰ্তাক অৱগত কৰে৷
তেওঁ লগতে কয়, “জিলাখনৰ বইটামাৰী শিক্ষা খণ্ডত আমি ছাত্ৰ-ছাত্ৰীসকলক মহান সেনাপতিগৰাকীৰ বিষয়ে ৰচনা লিখি শ্ৰদ্ধাঞ্জলি জ্ঞাপন কৰিবলৈ আহ্বান জনাইছিলোঁ৷ আমি বিদ্যালয়ৰ শিক্ষাৰ্থীসকলৰপৰা ১,০৯৫খন ৰচনা সংগ্ৰহ কৰিছিলোঁ৷ ইয়াৰে নিৰ্বাচিত ২৫০খন ৰচনা বঙাইগাঁও জিলা প্ৰশাসনলৈ প্ৰেৰণ কৰা হৈছিল৷”
অসম চৰকাৰৰ সংস্থা অসম ইলেক্ট’নিক্স ডেভেলপমেণ্ট কৰ্প’ৰেচন লিমিটেড (এমট্ৰ’ন)ৰ সহকাৰী প্ৰবন্ধক ত্ৰৈলোক্য বৰকাকতিয়ে হাতে লিখা ৰচনা আপল’ড কৰাৰ সুবিধাৰ্থে ৱেব প’ৰ্টেলৰ লগতে এণ্ড্ৰইড আৰু আইঅ’এছত উপলভ্য ম’বাইল এপ্লিকেশ্যনটো বিকশিত কৰিছিল৷ তেওঁ কয় যে সমগ্ৰ প্ৰক্ৰিয়াটো নিৰীক্ষণ কৰিবলৈ ২৫গৰাকী বিষয়াৰ এটা দল গঠন কৰা হৈছিল৷
“আৰম্ভণিতে, বৰ বিশেষ সঁহাৰি অহা নাছিল৷ কিন্তু, কেইদিনমান পাৰ হোৱাৰ পাছত অনুভৱ কৰিছিলোঁ যে এই ৰচনা আপল’ড কৰাৰ বাবে আমাৰ ওচৰত থকা বেণ্ডৱিথ পৰ্যাপ্ত নহ’ব,” বৰকাকতিয়ে এই প্ৰতিৱেদকক কয়৷
তেওঁ কয় যে প’ৰ্টেল আৰু ম’বাইল এপত ট্ৰেফিক বৃদ্ধি পোৱাৰ বাবে ১৯ নৱেম্বৰত এমট্ৰ’নৰ কাৰিকৰী দলে হাতেৰে লিখা প্ৰবন্ধ আপল’ড কৰাৰ বাবে অসম ৰাজ্যিক তথ্য কেন্দ্ৰত দহটা উচ্চ ক্ষমতাৰ ছাৰ্ভাৰৰ ব্যৱস্থা কৰে৷ লগতে অংশগ্ৰহণকাৰীসকলৰ বাবে প্ৰমাণপত্ৰ ডাউনল’ড কৰিবলৈ এমট্ৰ’নৰ তথ্য কেন্দ্ৰত ছটা ছাৰ্ভাৰ মোতায়েন কৰা হয়৷ তদুপৰি, প্ৰকল্পটোৰ কাৰ্যকৰীকৰণৰ ক্ষেত্ৰত অসুবিধা নহ’বলৈ ইয়াৰ বেণ্ডৱিথ ৯ জিবিপিএছলৈ বৃদ্ধি কৰা হয়৷
এমট্ৰ’নৰ এগৰাকী ছ’ফট্ৱেৰ বিকাশক উতংক কলিতাই কয় যে বিকশিত ছ’ফট্ৱেৰটো ব্যৱহাৰকাৰীৰ অনুকূল আছিল৷ আনকি দুৰ্বল ইণ্টাৰনেট সংযোগতো পঞ্জীকৃত ব্যৱহাৰকাৰীসকলৰ ম’বাইল নম্বৰ অ’টিপি আধাৰিত প্ৰমাণীকৰণ ব্যৱহাৰ কৰি বৈধতা প্ৰদান কৰা হৈছিল৷ লগতে, নকল পঞ্জীয়ন প্ৰতিৰোধ কৰাৰ বাবে ব্যৱহাৰকাৰীসকলৰ অন্যান্য ব্যক্তিগত বিৱৰণ ৰেকৰ্ড কৰা হৈছিল৷
“আমি ২৪ঘণ্টাই কাৰ্যক্ষম হৈ থকা এক হেল্প ডেস্ক স্থাপন কৰি কেনেদৰে পঞ্জীয়ন আৰু ৰচনা আপল’ড কৰিব লাগে সেই বিষয়ে জনসাধাৰণৰ প্ৰশ্নসমূহৰ উত্তৰ দিছিলোঁ৷ ছ’ফট্ৱেৰ বিকাশ দলটোৱে তথ্য কেন্দ্ৰৰ দলটোৰ সৈতে ছাৰ্ভাৰ আৰু বেণ্ডৱিথ ব্যৱহাৰ নিৰীক্ষণ কৰিবলৈ ২৪ঘণ্টাই কাম কৰিছিল৷ অভূতপূৰ্ব চাহিদা পূৰণ কৰিবলৈ, ছাৰ্ভাৰৰ ক্লাষ্টাৰিং আৰু ল’ড বেলেন্সাৰৰ স্থাপন কৰা হৈছিল৷ আমাৰ সহায়কাৰী দলটো জিলা অনুসৰি অগ্ৰগতি আৰু অন্যান্য তথ্য অৱগত কৰিবলৈ জিলা কৰ্তৃপক্ষৰ সৈতেও যোগাযোগত আছিল,” কলিতাই এই সংবাদপত্ৰিকাখনক জানিবলৈ দিয়ে৷
২৬ নৱেম্বৰত আমাৰ পঞ্জীয়ন শেষ হয় আৰু সেইদিনালৈকে প্ৰায় ৪৫ লক্ষাধিক ব্যৱহাৰকৰ্তাই পঞ্জীয়ন কৰে আৰু ৫৭ লক্ষাধিক ছবি আপল’ড হয়৷ নকল ছবিসমূহ আঁতৰাবলৈ এটা ফৰেনছিক অ’ডিট কৰাৰ লগতে এমট্ৰ’নে অভ্যন্তৰীণ অনুসন্ধান চলায়৷ ভাষা অ’ডিট সম্পাদন কৰে মাধ্যমিক শিক্ষা পৰিষদ, অসমে(ছেবা)৷
এক মহৎ উদ্দেশ্যৰ আঁৰত চলি থকা এই প্ৰচেষ্টাক স্বীকৃতি জনায়েই গীনিজ কৰ্তৃপক্ষই অসমলৈ আহি জনতা ভৱনত আয়োজিত এক অনুষ্ঠানত অসমৰ মুখ্যমন্ত্ৰী ড॰ হিমন্ত বিশ্ব শৰ্মাৰ হাতত আনুষ্ঠানিকভাৱে এই সন্মান প্ৰদান কৰে৷
এই প্ৰচেষ্টাত লাচিত বৰফুকনৰ বিষয়ে সৰ্বমুঠ ৫৭,৮৯,১৭০খন ৰচনা সংগ্ৰহ হয়, অৱশ্যে গীনিজ কৰ্তৃপক্ষই কেৱল হাতে লিখা ৰচনাসমূহহে ইয়াত অন্তৰ্ভুক্ত কৰে৷
এই ৰচনাসমূহ অসমীয়াৰ লগতে ২৩টা বিভিন্ন ভাষাত আপল’ড কৰা হৈছিল৷ অসমীয়াত সৰ্বাধিক ৩৫,৯০,৯১৮খন ৰচনা আৰু ইংৰাজীত দ্বিতীয় সৰ্বাধিক ৪,০৫,৬১৭খন ৰচনা সংগ্ৰহ হয়৷ এই ২৩টা ভাষা হৈছে অসমীয়া, ইংৰাজী, বাংলা, বড়ো, হিন্দী, মণিপুৰী, হামাৰ, কাৰ্বি, নেপালী, চাওতালি, সংস্কৃত, আৰবী, ডিমাছা, পাৰ্চী, উৰ্দু, টাই, বিষ্ণুপ্ৰিয়া, লামচাখাং, তেলেগু, ককবৰক, কোৰিয়ান, পাঞ্জাৱী আৰু ৰাভা৷
