অসমৰ গৌৰৱময় ইতিহাসৰ অন্যতম মহানায়ক লাচিত বৰফুকনৰ ৪০০ বছৰীয়া জয়ন্তী উদযাপন অনুষ্ঠানত অংশগ্ৰহণ কৰে প্ৰধানমন্ত্ৰী শ্ৰীনৰেন্দ্ৰ মোদী ডাঙৰীয়া আৰু কেন্দ্ৰীয় গৃহমন্ত্ৰী অমিত শ্বাহ ডাঙৰীয়াই৷ এই উদযাপন কেৱল অসমৰ নাছিল, এয়া আছিল সমগ্ৰ দেশৰ অংশগ্ৰহণেৰে এক ৰাষ্ট্ৰীয় উদযাপন৷ সেনাপতি লাচিত বৰফুকন, যি নিজৰ বীৰত্বৰ গাথা ভাৰতৰ ইতিহাসত সোণালী আখৰৰে লিখি থৈ গৈছে৷ মই নিশ্চিত যে আমাৰ এই আয়োজনে দেশবাসীক লাচিতৰ দেশপ্ৰেমৰ বিষয়ে অৱগত কৰাত সহায় কৰিলে৷ ইতিহাসৰ ক্ষেত্ৰত পক্ষপাতিত্ব হোৱাৰ অনেক উদাহৰণ আছে, সেয়ে হয়তো যোৱা ৩৫০ বছৰে লাচিতৰ বীৰত্বৰ কথা ভাৰতৰ ইতিহাসৰ পৰা বাদ পৰি ৰ’ল৷ ইতিহাসৰ এই ত্ৰুটি সংশোধন কৰিবলৈ মই সংকল্পবদ্ধ৷ নতুন দিল্লীৰ বৰ্ণাঢ্য কাৰ্যসূচীয়ে আমাক নিশ্চিত কৰিলে যে কেন্দ্ৰীয় চৰকাৰ, বিশেষকৈ আমাৰ মাননীয় প্ৰধানমন্ত্ৰী আৰু গৃহমন্ত্ৰী ডাঙৰীয়া অসমৰ জনসাধাৰণৰ কাষত আছে৷ আমাৰ বিদ্যালয়, মহাবিদ্যালয় আৰু অন্যান্য প্ৰতিষ্ঠানসমূহেও লাচিতৰ এই জয়ন্তী বিশাল পৰিসৰত উদযাপন কৰাটো অসমবাসীৰ বাবে আনন্দৰ বিষয়৷ এনেধৰণৰ পদক্ষেপসমূহে শিক্ষাৰ্থীসকলক আমাৰ দেশৰ প্ৰতি থাকিবলগীয়া দায়িত্ববোধ, কৰ্তব্যপৰায়ণতা আৰু সাহসৰ বিষয়ে সোঁৱৰাই তুলিব৷ মই আপোনাসৱক গৌৰৱেৰে জনাওঁ যে এই উদযাপনক অধিক আকৰ্ষণীয় কৰি তুলিবলৈ আমাৰ প্ৰশাসনিক বিষয়া আৰু মোৰ কেবিনেট সতীৰ্থসকলেও প্ৰশংসনীয় প্ৰস্তুতি চলাইছিল৷ মই দেশৰ সকলো মুখ্য দৈনিক কাকতসমূহত লাচিতৰ আদৰ্শৰ বিষয়ে উল্লেখ কৰি এটা প্ৰবন্ধও লিখিছিলোঁ৷ এতিয়া, লাচিতৰ আদৰ্শক সুসংগঠিত ৰূপত আগুৱাই লৈ যোৱাটো আমাৰ সকলোৰে দায়িত্ব৷ এই উদযাপনৰ বিষয়ে ঘোষণা হোৱাৰ পাছতেই আমি সকলোৱে কাম আৰম্ভ কৰোঁ৷ মই সকলো জিলাৰ উপায়ুক্ত আৰু আৰক্ষী অধীক্ষকসকলৰ সৈতে ১৪ ঘণ্টাৰ এক বৈঠকত অংশগ্ৰহণ কৰোঁ৷ এই বৈঠকত আমি অনুষ্ঠানটোক সফল কৰি তোলাৰ বিভিন্ন দিশসমূহৰ বিষয়ে আলোচনা কৰিছিলোঁ, আৰু আজি অনুষ্ঠানটোৰ সফলতাক লৈ মই অত্যন্ত সুখ আৰু গৌৰৱ অনুভৱ কৰিছোঁ৷
উল্লিখিত ১৪ ঘণ্টীয়া বৈঠকখনত প্ৰশাসনীয় সংস্কাৰ, সুশাসন আৰু নাগৰিকৰ সুৰক্ষা আৰু নিৰাপত্তা সম্পৰ্কেও আলোচনা কৰা হৈছিল৷ আমি সমাজৰ পৰা ড্ৰাগছৰ কু-প্ৰভাৱ আঁতৰ কৰিবলৈ একনিষ্ঠাৰে কাম কৰাৰ ক্ষেত্ৰত গুৰুত্ব প্ৰদান কৰিছোঁ৷ অনাগত দিনসমূহত ড্ৰাগছৰ সৈতে জড়িত কাৰ্যকলাপৰ ক্ষেত্ৰত আমাৰ কঠোৰ পদক্ষেপ বৃদ্ধি পাব৷ জব্দ হোৱা ড্ৰাগছৰ পৰিসংখ্যাই হৈছে ইয়াৰ মাপকাঠী৷ আমাৰ সদাতৎপৰ আৰক্ষী বাহিনীয়ে অতি দক্ষতাৰে অসম আৰু উত্তৰ-পূৰ্বাঞ্চলত চলি থকা ড্ৰাগছৰ ঘাটিসমূহ উৎখাত কৰিছে৷ আমি আৰক্ষী বাহিনীৰ আধুনিকীকৰণৰ বিষয়টো গুৰুত্ব সহকাৰে লৈছোঁ, এয়া এই বৈঠকৰ এটা বিশেষ দিশ আছিল৷ অৱশ্যে, যোৱা কেইদিনমানত সংঘটিত কেইটামান নেতিবাচক ঘটনাই আমাক ব্যতিব্যস্ত কৰি তুলিছে৷ মই এটা কথা পুনৰ স্পষ্ট কৰি দিওঁ যে আমাৰ চৰকাৰে কামৰ ক্ষেত্ৰত লেহেম গতি আৰু দুৰ্নীতি সহ্য নকৰে৷ সমাজৰ সকলোৱে ন্যায় পোৱাটো অধিকাৰ আৰু এই ন্যায় প্ৰদানৰ ক্ষেত্ৰত বিলম্ব হোৱাটো অনুচিত৷
কেন্দ্ৰীয় পথ আৰু ৰাষ্ট্ৰীয় ঘাইপথ বিভাগৰ মন্ত্ৰী শ্ৰীনীতিন গাডকাৰী ডাঙৰীয়াৰ ভ্ৰমণক আমি অসম আৰু উত্তৰ-পূৰ্বাঞ্চলৰ জনসাধাৰাণক হৃদয়েৰে আৰু হাতে-কামে আগুৱাই নিয়াৰ ক্ষেত্ৰত কেন্দ্ৰ চৰকাৰৰ ঐকান্তিক প্ৰচেষ্টাৰ অংশ হিচাপে অভিহিত কৰিব পাৰোঁ৷ মই মোৰ জীৱনকালত দেখা পোৱা কোনো এখন চৰকাৰে উত্তৰ-পূৰ্বাঞ্চলক প্ৰধানমন্ত্ৰী শ্ৰীনৰেন্দ্ৰ মোদী ডাঙৰীয়া নেতৃত্বাধীন এই চৰকাৰখনৰ দৰে গুৰুত্ব দিয়া নাছিল৷ অসম আৰু উত্তৰ-পূৰ্বাঞ্চলৰ প্ৰতি তেওঁলোকৰ এই দৃষ্টিভংগীৰ বাবে মই তেওঁলোকৰ ওচৰত ঋণী৷
এই মাহত আমি মিছন বসুন্ধৰা ২.০ৰ শুভ আৰম্ভণি কৰিলোঁ৷ আঁচনিখনৰ উদ্দেশ্য হ’ল প্ৰকৃত মালিকীস্বত্বৰ জৰিয়তে ভূমি অধিকাৰ সুৰক্ষিত কৰা৷ আমি নতুনকৈ চৰকাৰী খাছ আৰু চিলিঙৰ উদ্বৃত ভূমিৰ নিষ্পত্তি কৰি দখলীস্বত্ব থকা ৰায়তক মালিকীস্বত্ব প্ৰদান কৰিম৷ এই উচ্চাভিলাষী আঁচনিখনৰ ৰাজ্যত ভূমি অধিকাৰৰ সৈতে জড়িত সমস্যাসমূহৰ সমাধান কৰিব পাৰিম বুলি আশাবাদী৷ আমি এই প্ৰথম পদক্ষেপৰ সফলতাক লৈ যথেষ্ট উৎসাহিত হৈছোঁ আৰু মোৰ বিশ্বাস যে একেই মনোভাবেৰে আগবাঢ়ি আমি আকাংক্ষিত উদ্দেশ্যত সফল হ’ব পাৰিম৷
দেশৰ ভিতৰত প্ৰথমবাৰৰ বাবে আমাৰ চৰকাৰে বেংগালুৰুৰ ইণ্ডিয়ান ইনষ্টিটিউট অৱ মেনেজমেণ্টৰ সৈতে অংশীদাৰীত্ব ত্বৰান্বিত কৰিবলৈ সিদ্ধান্ত গ্ৰহণ কৰিছে৷ মুখ্যমন্ত্ৰীৰ যুৱ পেছাদাৰী কাৰ্যসূচী নামৰ এই পদক্ষেপে কৰ্মক্ষেত্ৰৰ অভিজ্ঞতা আৰু শ্ৰেণীকোঠাৰ প্ৰশিক্ষণৰ জৰিয়তে ৭০গৰাকী যুৱ পেছাদাৰীক দুবছৰীয়া লীডাৰশ্বিপ প্ৰশিক্ষণ প্ৰদান কৰিব৷ এই কাৰ্যসূচীয়ে আমাৰ চৰকাৰক জিলা পৰ্যায়ত স্বাস্থ্য সেৱা আৰু শিক্ষা ক্ষেত্ৰত উন্নয়নৰ সুযোগোসমূহ চিনাক্ত কৰাত সহায় কৰিব৷ এয়া এক অনন্য পদক্ষেপ, কিয়নো আমি বিভিন্ন ৰাজ্য চৰকাৰ, কেন্দ্ৰীয় চৰকাৰৰ সংস্থা আৰু আনকি বিশ্ব বেংকে আগবঢ়োৱা সফল ফেল’শ্বিপ কাৰ্যসূচীৰ পৰা কিছুমান উপাদান ইয়াত অন্তৰ্ভুক্ত কৰিছোঁ৷ এই অংশীদাৰিত্বক লৈ মনে-প্ৰাণে বিশ্বাস কৰোঁ যে সুশাসনৰ দিশত থকা প্ৰত্যাহ্বানসমূহ সমাধান কৰিবলৈ চৰকাৰে শিক্ষা, ব্যক্তিগত খণ্ড আৰু সমাজৰ অন্যান্য ক্ষেত্ৰৰ প্ৰতিভাশালী যুৱক-যুৱতীসকলৰ বাবে সম্ভাৱনাৰ দুৱাৰ মুকলি কৰিব লাগিব৷ সেয়েহে অসমৰ মুখ্যমন্ত্ৰীৰ যুৱ পেছাদাৰী কাৰ্যসূচীয়ে কেৰিয়াৰৰ মধ্যম পৰ্যায়ত থকা পেছাদাৰী আৰু সামাজিক কৰ্ম, বিশেষকৈ স্বাস্থ্য আৰু শিক্ষাখণ্ডৰ সৈতে জড়িত শিক্ষাৰ্থীসকলক আকৰ্ষিত কৰিব৷ এওঁলোকে দুবছৰ কাল ৰাজ্যৰ ৩৫খন জিলাৰ যিকোনো এখনত অতিবাহিত কৰিব লাগিব যদিও, তেওঁলোকক মোৰ কাৰ্যালয় আৰু আইআইএম- বেংগালুৰুৱে যুটীয়াভাৱে নিৰীক্ষণ কৰি থাকিব আৰু পৰামৰ্শ প্ৰদান কৰিব৷ এই পৰস্পৰ নিৰ্ভৰশীল প্ৰক্ৰিয়াৰ জৰিয়তে আমি যুৱ শক্তি আৰু প্ৰতিভাক চিনাক্ত কৰিবলৈ সক্ষম হ’ম আৰু তেওঁলোকক তৃণমূল পৰ্যায়ত চৰকাৰৰ কাম-কাজৰ বিষয়ে সম্যক ধাৰণা প্ৰদান কৰিব পাৰিম৷
