মাননীয় প্ৰধানমন্ত্ৰী শ্ৰীনৰেন্দ্ৰ মোদী ডাঙৰীয়াই যোৱা মাহৰ আৰম্ভণিতে অসম ভ্ৰমণলৈ আহি ৰাজ্যবাসীক প্ৰগতি, সমৃদ্ধি আৰু শান্তিৰে পৰিপূৰ্ণ অমৃত কালৰ উত্তৰণ যাত্ৰাৰ প্ৰতি উদ্বুদ্ধ কৰি তুলিছে। মাননীয় প্ৰধানমন্ত্ৰীগৰাকীৰ ইতিবাচক দৃষ্টিভংগীয়ে আজি উত্তৰ-পূৰ্বাঞ্চলক দেশৰ লগতে দক্ষিণ-পূব এছিয়াৰ অন্যতম গুৰুত্বপূৰ্ণ অঞ্চল হিচাপে গঢ়ি তুলিছে। অঞ্চলটোত সহস্ৰাধিক কোটি টকাৰ প্ৰকল্পৰ উদ্বোধন কৰি তেওঁৰ অঞ্চলটোৰ প্ৰতি থকা প্ৰতিশ্ৰুতিক পুনৰ এবাৰ স্পষ্ট কৰি তুলিলে। মোৰ বহু দশকজোৰা ৰাজনৈতিক জীৱনত দেশৰ প্ৰতি এনে দৃষ্টিভংগীৰে কৰ্ম কৰি যোৱা নেতা দেখা নাই। মই তেওঁক সকলোৰে বন্ধু বুলি কবলৈ বিচাৰিম। এই প্ৰকল্পসমূহে কেৱল আন্তঃগাঁথনি নিৰ্মাণ কৰা নাই, এই প্ৰকল্পসমূহৰ মাজত নিহিত হৈ আছে ৰাষ্ট্ৰ নিৰ্মাণৰ ধাৰণা। কেন্দ্ৰৰ চৰকাৰখনে আজি ভাৰতৰ লগতে এই অঞ্চলটোকো সমদৃষ্টি প্ৰদান কৰিছে। এই চিন্তাধাৰাই আজিৰ যুৱপ্ৰজন্মৰ হৃদয় আৰু মনৰপৰা বিচ্ছিন্নতাবাদী প্ৰৱণতাক বিলুপ্ত কৰিছে।
মাননীয় প্ৰধানমন্ত্ৰীগৰাকীৰ এই দৃষ্টিভংগীৰ প্ৰভাৱ আমি উপস্থাপন কৰা ২০২৪-২০২৫ বিত্তীয় বৰ্ষৰ ৰাজ্যিক বাজেটত প্ৰতিফলিত হৈছে। এই বাজেটত আমি আই মাতৃ তথা যুৱসকলৰ সবলীকৰণ আৰু সংস্থাপন সুযোগ সৃষ্টিৰ দিশত গুৰুত্ব প্ৰদান কৰিছোঁ। মহিলা আৰু কন্যা সন্তানসকলক সবলীকৃত কৰি তেওঁলোকৰ নিজৰ ভৰিত থিয় হ’ব পৰাকৈ গঢ়ি নোতোলালৈকে আমি আমাৰ স্থিতিত অটল হৈ আছোঁ। আমি অনুভৱ কৰোঁ এওঁলোকেহে এখন ৰাষ্ট্ৰৰ ভাগ্য গঢ়ি তুলিব পাৰে। বাল্য বিবাহৰ লগতে সমাজব্যৱস্থাত স্থবিৰতা আনিব পৰা বিভিন্ন বিষয় আৰু কাৰকক প্ৰতিৰোধ কৰিবলৈ আমাৰ চৰকাৰ সদাপ্ৰস্তুত। এনেবোৰ ক্ষেত্ৰত আইন প্ৰণয়ন কৰাৰ পাছৰেপৰা চৰকাৰখনে এই সমস্যাবোৰৰ সৈতে অতদিনে যুঁজি থকা ব্যক্তিসকলৰপৰা প্ৰশংসা বুটলিবলৈ সক্ষম হৈছে। অসমৰ সমাজ জীৱনৰ উন্নয়নৰ বাবে মই সংকল্পবদ্ধ। অসম বিধান সভাৰ পবিত্ৰ সদনত থিয় হৈ মই প্ৰতিজ্ঞা গ্ৰহণ কৰিছিলোঁ যে মই জাতি আৰু সম্প্ৰদায় নিৰ্বিশেষে জনসাধাৰণৰ স্বাৰ্থৰ বাবে কাম কৰি যাম, মই কন্যা সন্তানৰ উন্নতিৰ বাবে নিজৰ যুঁজ অব্যাহত ৰাখি যাম। আমাৰ আঁচনিসমূহত এই বিষয়সমূহ স্পষ্টৰূপত প্ৰতিফলিত হৈছে।
অসমবাসীয়ে উদযাপন কৰিব পৰা বাৰ্তাৰ সাক্ষী আজি আমি সঘনাই লাভ কৰিছোঁ। আমাৰ মুঠ ৰাজ্যিক ঘৰুৱা উৎপাদনে ঐতিহাসিক পৰিসংখ্যা স্পৰ্শ কৰিছে। আমাৰ জিএছটি সংগ্ৰহে ৰাষ্ট্ৰীয় গড়ক অতিক্ৰম কৰিছে। এইবিলাক পৰিসংখ্যাই আমাৰ অৰ্থনীতিৰ ঊৰ্ধ্বগামী গতি আৰু সম্ভাৱনাক প্ৰতিপন্ন কৰিছে। অসমবাসীৰো সহযোগিতা অবিহনে কেৱল চৰকাৰখনে এই ধাৰা অগুৱাই নিব নোৱাৰে। সেয়েহে মই অসমবাসীক চৰকাৰখনক বিশ্বাসত ৰাখি ৰাষ্ট্ৰ নিৰ্মাণৰ বাবে সৰ্বশক্তিৰে সহযোগিতা আগবঢ়োৱাৰ এই ধাৰা অব্যাহত ৰাখিবলৈ আহ্বান জনালোঁ। অমৃতকালৰ এই সময়ছোৱা অসমবাসীৰ বাবে যথেষ্ট গুৰুত্বপূৰ্ণ।
মাননীয় বিত্ত মন্ত্ৰীগৰাকীয়ে তেওঁৰ বাজেট ভাষণত ঘোষণা কৰিছিল যে এই বছৰৰ নৱেম্বৰ মাহত অসমত এখন উদ্যোগ সন্মিলন অনুষ্ঠিত হ’ব। এনে বহুতো সন্মিলনত অংশগ্ৰহণৰ অভিজ্ঞতাৰে মই ক’ব পাৰোঁ যে অৰ্থনৈতিক বিনিয়োগ লাভ কৰাৰ পাছত আমাৰ ৰাজ্যখনৰ বিকাশৰ যাত্ৰা অনিৰুদ্ধ হৈ থাকিব। এনে বিনিয়োগে নিযুক্তিৰ সৃষ্টি কৰাৰ উপৰি কল্যাণকামী ৰাজ্যৰ অবিচ্ছেদ্য অংশ সামাজিক খণ্ডৰ ব্যয় বৃদ্ধি কৰিব। আমাৰ চৰকাৰে প্ৰতিশ্ৰুতি ৰক্ষা কৰি ৯৪,০০০তকৈ অধিক যুৱক-যুৱতীক চৰকাৰী নিযুক্তি প্ৰদান কৰিছে আৰু এই ধাৰা অব্যাহত থাকিব। অৱশ্যে মই উল্লেখ কৰিবলৈ বিচাৰিম যে চৰকাৰী চাকৰি প্ৰদান কৰাৰ এক নিৰ্দিষ্ট সীমা আছে। বিশ্বৰ যিকোনো উন্নত অৰ্থনীতিলৈ মন কৰিলে দেখা যায় যে চৰকাৰৰ মুখ্য ভূমিকাৰ অন্যতম হৈছে ব্যক্তিগত খণ্ডৰ বাবেও মানৱ সম্পদ গঢ়ি তোলা। যুৱপ্ৰজন্ম আৰু উদ্ভাৱক তথা উদ্যমীসকল ৰাজ্যৰ অৰ্থনীতিৰ চালিকা শক্তি হ’ব লাগিব।
আমাৰ চৰকাৰখন শাসনলৈ অহাৰেপৰা ভূমি ৰাজহ আৰু ভূমি অধিকাৰ ব্যৱস্থাত সংস্কাৰ অনাৰ বিষয়ত গুৰুত্ব প্ৰদান কৰি আহিছোঁ। পূৰ্বৰ এই ব্যৱস্থাত থকা আসোঁৱাহৰ বাবে জনসাধাৰণে বিভিন্ন সময়ত সমস্যাৰ মুখামুখি হৈ আহিছে। আমি ডিজিটাইজেশ্যনৰ জৰিয়তে ইয়াৰ সমিধানৰ পথ বিচাৰি পালোঁ। এই ডিজিটাইজেশ্যনে সম্পূৰ্ণ ব্যৱস্থাটোক সৰল কৰি তোলাৰ লগতে বিভিন্ন ঐতিহাসিক আৰু অন্যান্য কাৰণত ভূমি অধিকাৰৰ বাবে সংগ্ৰাম কৰি থকা ৰাজ্যখনৰ খিলঞ্জীয়া লোকসকলক উপকৃত কৰিব। মিছন বসুন্ধৰা ২.০ আৰম্ভ কৰাৰ পাছৰেপৰা ভূমি ৰাজহ আৰু ভূমি অধিকাৰ সম্পৰ্কে ৰাইজৰ মানসিকতাৰ পৰিৱৰ্তন কৰিলে। ভূমি তথ্যৰ বিসংগতি সংশোধন কৰিবলৈ আমি ১৩ লাখতকৈও অধিক আৱেদন লাভ কৰিছিলোঁ। এই আৱেদনকৰ্তাসকলৰ প্ৰায় ৯০% অনুসূচিত জাতি, অনুসূচিত জনজাতি আৰু অন্যান্য পিছপৰা শ্ৰেণীৰ অন্তৰ্ভুক্ত আছিল। ইয়াৰ সুফলাফলে আমাৰ চৰকাৰখনক গৌৰৱাম্বিত কৰি তুলিছে। এই সফলতাৰ দ্বাৰা উৎসাহিত হৈ আমি পৰৱৰ্তী প্ৰজন্মৰ বাবে ভূমি সংস্কাৰ সাধন কৰিবলৈ সম্পূৰ্ণ নিশ্চিন্ত হৈ মিছন বসুন্ধৰা ৩.০ আৰম্ভ কৰিছোঁ। এই পদক্ষেপে অসমৰ অন্যতম প্ৰাণস্বৰূপ চাহ সম্প্ৰদায়ৰ লোকসকলক লাভান্বিত কৰিব।
