মোৰ মনৰ এই বাৰ্তা আপোনাসৱলৈ লিখি থকাৰ পৰতে আমি এক বিশেষ পদক্ষেপ ৰূপায়ণৰ দিশতো আগবাঢ়িলোঁ৷ মোৰ দৃঢ় বিশ্বাস যে এই প্ৰচেষ্টাই আমাৰ নীতি নিৰ্ধাৰণ আৰু ৰূপায়ণৰ ক্ষেত্ৰত এক ইতিবাচক পৰিৱৰ্তনৰ সূচনা কৰিব৷ আমি কাজিৰঙাত এক চিন্তন শিবিৰৰ আয়োজন কৰিছিলোঁ, য’ত সকলো বিভাগৰ প্ৰতিনিধি হিচাপে জ্যেষ্ঠ আমোলাসকলে অংশ লৈ বিভাগসমূহৰ নীতি নিৰ্ধাৰণ কৰে আৰু ২০২৬ চনত আমাৰ চৰকাৰে কাৰ্যকাল সম্পূৰ্ণ কৰালৈকে এই নীতিসমূহৰ কাৰ্যকৰীকৰণৰ ৰূপৰেখা প্ৰস্তুত কৰে৷ ‘অধিক প্ৰতিশ্ৰুতি আৰু কম কাম’ সাধাৰণতে এখন চৰকাৰৰ মাজত এনেধৰণৰ প্ৰৱণতাই দেখা যায়৷ কেতিয়াবা ইয়াৰ আঁৰত গ্ৰহণযোগ্য কাৰণ থাকে যদিও বেছিভাগ ক্ষেত্ৰতে দেখা যায় যে আমি সঠিক কাৰ্যপন্থাৰ পৰা বিচলিত হোৱাৰ লগতে নিৰ্দিষ্ট সময়সীমাও স্পৰ্শ কৰিব নোৱাৰোঁ৷ সঠিক সময়ত প্ৰতিশ্ৰুতিসমূহ পূৰণৰ ক্ষেত্ৰত আমাৰ চৰকাৰৰ চিন্তা-চৰ্চা চলি থাকিব আৰু প্ৰয়োজনত সংশোধনৰো অৱকাশ থাকিব৷
নিৰ্বাচনৰ সময়ত আমাৰ এটা গুৰুত্বপূৰ্ণ প্ৰতিশ্ৰুতি আছিল যে আমি চৰকাৰী খণ্ডত ১ লাখ নিযুক্তিৰ সৃষ্টি কৰিম৷ যোৱা মে’ত বিভিন্ন বিভাগত প্ৰায় ২৭,০০০ যুৱক-যুৱতীক স্বচ্ছ, নিকা আৰু নিৰপেক্ষ প্ৰক্ৰিয়াৰে নিযুক্তি দিয়াৰ পাছত এই ছেপ্টেম্বৰত যোগ্যতাৰ আধাৰত নিৰ্বাচিত ১১,০০০তকৈও অধিক প্ৰাৰ্থীক নিযুক্তি পত্ৰ প্ৰদান কৰি আমি উক্ত প্ৰতিশ্ৰুতি পূৰণৰ দিশত আৰু এটি খোজ আগবঢ়ালোঁ৷ এওঁলোক সকলোৱে এতিয়া চৰকাৰী প্ৰণালীৰ অংশ হৈ অসমৰ জনসাধাৰণক এক দুৰ্নীতিমুক্ত আৰু দক্ষ প্ৰশাসন ব্যৱস্থাৰ সুবিধা প্ৰদান কৰিব৷ মই আশাবাদী যে তেওঁলোকে জনসাধাৰণৰ জীৱন ধাৰণৰ মান উন্নত কৰিবলৈ আৰু প্ৰকৃতাৰ্থত নীতিসমূহৰ ৰূপায়ণ কৰি উন্নত প্ৰশাসনিক সেৱা আগবঢ়াব৷
পূৰ্বতে মোৰ মনৰ বাৰ্তাত উল্লেখ কৰাৰ দৰে, নিযুক্তিৰ ক্ষেত্ৰত চৰকাৰৰ কৰণীয়সমূহৰ কিছু সীমাবদ্ধতা আছে৷ অৱশ্যে, যিকোনো ঠাইতে বিশেষকৈ অসমত চৰকাৰৰ সহযোগত ব্যক্তিগত খণ্ডই উন্নয়নৰ পথ সৃষ্টি কৰাৰ ক্ষেত্ৰত যথেষ্ট সম্ভাৱনীয়তা আছে৷ চৰকাৰখনৰ এই সহযোগিতাৰ অংশস্বৰূপে চিজিটিএমএছই আৰু এছআইডিবিআই(ছিডবি)ৰ সৈতে দুখন বুজাবুজিৰ চুক্তি স্বাক্ষৰ কৰা হয়৷ ইয়াৰ ফলস্বৰূপে ৰাজ্যখনত সূক্ষ্ম, লঘু আৰু মজলীয়া উদ্যোগ তথা ষ্টাৰ্ট আপ স্থাপনৰ পৰিৱেশ অধিক সুবিধাজনক হৈ উঠাৰ লগতে ই নিয়োগ সৃষ্টি আৰু মুঠ ৰাজ্যিক ঘৰুৱা উৎপাদন বৃদ্ধিতো সহায় কৰিব৷ চৰকাৰী আৰু ব্যক্তিগত খণ্ডৰ এই ফলপ্ৰসূ সংযোগে অসমত ষ্টাৰ্ট আপৰ ছবিখন অধিক উন্নত আৰু বৃহৎ কৰি তোলাৰ ক্ষেত্ৰত গুৰুত্ব প্ৰদান কৰিছে৷ তথাপি মই আমাৰ অংশীদাৰসকলক জনাবলৈ বিচাৰিছোঁ যে আমি বাহিৰৰ পৰাই সহযোগ আগবঢ়াই যাম আৰু তেওঁলোকৰ গতিশীল প্ৰণালীটোত কোনোধৰণৰ হস্তক্ষেপ নকৰোঁ৷ মই আশাবাদী যে ভৱিষ্যৎ প্ৰজন্মৰ উদ্যমীসকলে অনাগত দিনত ৰাজ্যখনক আগুৱাই লৈ যাব৷ মই পুনৰ উল্লেখ কৰিবলৈ বিচাৰিছোঁ যে আমাৰ চৰকাৰে উদ্যমশীলতাৰ সংস্কৃতিৰ পৃষ্ঠপোষকতা কৰি ৰাজ্যখনক ঔদ্যোগিক কেন্দ্ৰলৈ ৰূপান্তৰ কৰি নিয়োগসন্ধানীসকলক নিয়োগকৰ্তাৰ ৰূপত গঢ়ি তোলাৰ প্ৰচেষ্টাত ব্ৰতী হৈ ৰ’ব৷
অসমৰ উন্নয়ন যাত্ৰাৰ বাবে চুবুৰীয়া ৰাজ্যসমূহৰ সৈতে সৌহাৰ্দ্যপূৰ্ণ সম্পৰ্ক বজাই ৰখাটো অতি গুৰুত্বপূৰ্ণ৷ তেওঁলোকো প্ৰকৃততে আমাৰ উন্নয়নৰ পথৰ সহযাত্ৰী৷ মই মুখ্যমন্ত্ৰী হিচাপে কাৰ্যভাৰ গ্ৰহণ কৰাৰ পাছৰে পৰা আমাৰ চুবুৰীয়া ৰাজ্যসমূহৰ সৈতে থকা দীৰ্ঘদিনীয়া সীমা বিবাদ নিষ্পত্তিৰ বাবে অহৰহ প্ৰয়াস কৰি আছোঁ৷ ইতিমধ্যে এইক্ষেত্ৰত অৰুণাচল প্ৰদেশ আৰু মেঘালয়ৰ সৈতে বিশেষ অগ্ৰগতিও লাভ কৰিছোঁ৷ মই স্বীকাৰ কৰোঁ যে এনে আলোচনাৰ বাবে অলপ সময়ৰ প্ৰয়োজন হয়, কিন্তু অলপ বুজা-পৰা আৰু এৰা-ধৰাৰ মাজেৰে এনে সমস্যাৰ সমাধান যথেষ্ট সহজ৷ এই চিন্তাই আমাৰ মিজো ভাতৃ-ভগ্নীসকলক আঁকোৱালি ল’বলৈ উৎসাহিত কৰিছে৷ মই নতুন দিল্লীস্থিত অসম ভৱনত মিজোৰামৰ মাননীয় মুখ্যমন্ত্ৰী জ’ৰাম থাংগা ডাঙৰীয়াৰ সৈতে আগষ্টত আইজলত অনুষ্ঠিত মন্ত্ৰী পৰ্যায়ৰ আলোচনা সম্পৰ্কে পৰ্যালোচনা কৰোঁ৷ প্ৰথম পদক্ষেপৰ ৰূপত, আমি এই সমস্যাৰ আলোচনা আৰু সমাধানৰ অৰ্থে এখন আঞ্চলিক সমিতি গঠন কৰাৰ সিদ্ধান্ত লৈছোঁ৷
এটা কথা সৰ্বজনবিদিত যে শান্তিৰ সুবাস থাকিলেহে সমৃদ্ধিয়ে ৰিঙিয়াই মাতে৷ আমাৰ দৃঢ় সংকল্পৰ ভেটিত আমি শতাধিক আদিবাসী যুৱক-যুৱতীক অস্ত্ৰ সম্বৰণ কৰি মূলসুঁতিলৈ উভতি আমাৰ সমৃদ্ধিৰ বাটৰ সংগী হ’বলৈ উৎসাহিত কৰিব পাৰিছোঁ৷ মই মাননীয় কেন্দ্ৰীয় গৃহমন্ত্ৰী অমিত শ্বাহ ডাঙৰীয়াৰ ব্যক্তিগত প্ৰচেষ্টাৰ বাবে তেখেতৰ ওচৰত ঋণী৷ আনহাতে, সশস্ত্ৰ সংগ্ৰামৰ পন্থাক পৰিত্যাগ কৰি উভতি অহা আমাৰ আদিবাসী ভাই-ভনীসকলক মই আন্তৰিক ধন্যবাদ জনাইছোঁ৷
আমাৰ সফলতাৰ যাত্ৰাৰ আন এক মাইলৰ খুঁটি হ’ল অসম নাগৰিককেন্দ্ৰিক সেৱা বিতৰণ প্ৰকল্পত এআৰটিপিএছ-অধিসূচিত সেৱাৰ বাবে আৱেদনৰ সংখ্যা যোৱা মাহত চাৰি নিযুত অতিক্ৰম কৰিছে৷ আমাৰ নাগৰিককেন্দ্ৰিক সু-শাসন ব্যৱস্থাটোৰ ওপৰত আস্থা অটুট ৰখাৰ বাবে মই আপোনাসৱৰ ওচৰত অশেষ কৃতজ্ঞ৷
