বৰপেটা চহৰৰ নিচেই ওচৰৰ পাটবাউসী অঞ্চলৰ এগৰাকী বাসিন্দা ভনিতা পাঠক (৪৫) স্তনৰ কৰ্কট ৰোগত আক্ৰান্ত৷ প্ৰায় দহ মাহ পূৰ্বে তেওঁৰ স্তনত কৰ্কট ৰোগ ধৰা পৰিছিল৷ তেওঁ প্ৰথমটো কেম’থেৰাপী কৰোৱাইছিল চেন্নাইত৷ কিন্তু, বৰপেটা কেন্সাৰ কেয়াৰ চেণ্টাৰৰ উদ্বোধন হোৱাৰ পাছত, এই বছৰৰ ২৯ জানুৱাৰীত ব্যয়বহুল চিকিৎসাৰ বিপৰীতে তেওঁ দ্বিতীয় পালিটো নিজ চহৰতে গ্ৰহণ কৰিছিল৷
“মোৰ কেন্সাৰ ধৰা পৰিছিল প্ৰায় দহ মাহ আগতে৷ যেতিয়া মোৰ চিকিৎসকে এই ৰোগৰ বিষয়ে মোক জনালে, মোৰ চিকিৎসাৰ বাবে পৰিয়ালৰে দুজন সদস্যৰ সৈতে তাৎক্ষণিকভাৱে চেন্নাইলৈ গ’লোঁ৷ তাতেই কেম’থেৰাপীৰ প্ৰথমটো পালি গ্ৰহণ কৰিছিলো৷ মই আজি দ্বিতীয় পালিটো ল’বলৈ ইয়ালৈ আহিছোঁ,” পাঠকে অসম বাৰ্তাক কয়৷
চিকিৎসালয় কতৃৰ্পক্ষ আৰু চৰকাৰৰ প্ৰশংসা কৰি তেওঁ কয়, “এই কেন্সাৰ চেণ্টাৰৰ আৰু চেন্নাইৰ চিকিৎসকসকলৰ চিকিৎসাৰ মাজত কোনো পাৰ্থক্য নাই৷ মই ইয়াত লাভ কৰা চিকিৎসা যথেষ্ট সুলভ আৰু সময়ো ৰাহি হয়৷ তদুপৰি, কৰ্কট ৰোগীসকলক বিশ্ৰামৰ অতিকৈ প্ৰয়োজন৷ মই সুখী যে আমাৰ জিলাখনতে কৰ্কট ৰোগীৰ বাবে এখন ভাল চিকিৎসালয় আছে৷”
নামনি অসমৰ বঙাইগাঁও জিলাৰ চাতলা অঞ্চলৰ বাসিন্দা চাইফুল ইছলাম (৫৪) ডিঙিৰ কৰ্কট ৰোগত আক্ৰান্ত হৈছিল৷ “মোৰ কৰ্কট ৰোগৰ প্ৰাৰম্ভিক চিকিৎসা এবছৰ আগতে গুৱাহাটীৰ বি বৰুৱা কৰ্কট প্ৰতিষ্ঠানত আৰম্ভ হৈছিল৷ আজি, মোৰ ৰেডিঅ’থেৰাপীৰ পালি গ্ৰহণ কৰিবলৈ বৰপেটা কৰ্কট কেন্দ্ৰলৈ আহিছোঁ৷ চিকিৎসকে মোক পৰামৰ্শ দিছিল যে যিহেতু এই চিকিৎসালয়খন মোৰ নিজৰ ঠাইখনতে আছে, মই বিচিচিতে মোৰ ৰেডিঅ’থেৰাপী লোৱা উচিত৷ মোৰ অটল অমৃত অভিযান কাৰ্ডখন আছিল বাবে ইয়াত মোৰ চিকিৎসাৰ খৰচ সম্পূৰ্ণ বিনামূলীয়া হৈছে,” চাইফুলে কয়৷
কেন্সাৰ কেন্দ্ৰটো বৰপেটাৰ লগতে কাষৰীয়া জিলাসমূহৰ লোকসকলৰ বাবে এক আশীৰ্বাদস্বৰূপ হৈছে৷ পৰিসংখ্যা অনুসৰি যথেষ্টসংখ্যক ৰোগী তেওঁলোকৰ বৰপেটাত কৰ্কট ৰোগীসকলৰ বাবে আশাৰ ৰেঙনি তত্ত্বাৱধায়কসকলৰ সৈতে চিকিৎসাৰ বাবে এই নৱনিৰ্মিত কৰ্কট চিকিৎসালয়লৈ আহিছে৷ ১৩৫খন বিচনাযুক্ত বিচিচিত অত্যাধুনিক সা-সুবিধা সম্বলিত আন্তঃগাঁথনি নিৰ্মাণ কৰা হৈছে৷
শেহতীয়াকৈ, নামনি অসমৰ জিলাসমূহকে ধৰি ৰাজ্যজুৰি কৰ্কট ৰোগীৰ সংখ্যা যথেষ্ট বৃদ্ধি পাইছে৷
অসম চৰকাৰ আৰু টাটা ট্ৰাষ্টৰ যৌথ প্ৰয়াস অসম কেন্সাৰ কেয়াৰ ফাউণ্ডেচনৰ অধীনস্থ ৰাজ্যখনৰ আন ছটা কেন্সাৰ কেয়াৰ কেন্দ্ৰৰ লগতে বৰপেটা কেন্সাৰ কেন্দ্ৰটো প্ৰধানমন্ত্ৰী নৰেন্দ্ৰ মোদীয়ে ভাৰ্চুৱেলী উদ্বোধন কৰাৰ এদিন পাছতে চলিত বৰ্ষৰ ২৯ জানুৱাৰীত এই কেন্দ্ৰটো কাৰ্যকৰী হয়৷
“প্ৰতিদিনে আমাৰ কেন্দ্ৰটোলৈ বহুতো ৰোগী আহে৷ ইয়াৰ কাৰণ হৈছে শেহতীয়াকৈ বৰপেটা আৰু ইয়াৰ চাৰিওফালৰ জিলাসমূহত কৰ্কট ৰোগৰ ঘটনা বৃদ্ধি পাইছে৷ আগন্তুক কেইমাহমানত আমাৰ কেন্দ্ৰটোৰ বাবে পিইটি স্কেন সুবিধাৰ দৰে উন্নত চিকিৎসা সঁজুলি ক্ৰয় কৰা হ’ব৷ ইয়াৰ ফলত চিকিৎসাৰ মানো উন্নত হ’ব,” বিচিচিৰ অধীক্ষক ডাঃ সত্যনাৰায়ণ শৰ্মাই কয়৷
ডাঃ শৰ্মাই কয় যে মুকলি হোৱা দিনটোৰ পৰা এই বছৰৰ ১৫ অক্টোবৰলৈ ৬,৮০৪ অ’পিডি (বহিঃৰোগী বিভাগ) সম্পৰ্কীয় সেৱা সম্পূৰ্ণ হৈছে৷ “আমাৰ কেন্দ্ৰৰ ৰেডিঅ’থেৰাপী শাখাটো আটাইতকৈ বেছি ব্যৱহাৰ হয়৷ কেন্দ্ৰৰ পৰীক্ষাগাৰত এইপৰ্যন্ত ১১,২০০টা পৰীক্ষা সম্পন্ন কৰা হৈছে৷”
ডাঃ শৰ্মাই কয় যে কেন্দ্ৰটো স্থাপন হোৱাৰ বাবে স্থানীয় লোকসকলৰ আৰ্থিক আৰু মানসিক বোজা হ্ৰাস পাইছে৷ এই কেন্দ্ৰটো অবিহনে ৰোগীসকলে উন্নত চিকিৎসাৰ বাবে গুৱাহাটী বা ৰাজ্যৰ বাহিৰলৈ যাত্ৰা কৰিবলগীয়া হ’লহেঁতেন৷
“উল্লেখ্য যে আগতে চিকিৎসা কৰাবলৈ ৰাজ্যৰ বাহিৰলৈ যোৱা কৰ্কট ৰোগীসকল এতিয়া আমাৰ ওচৰলৈ ঘূৰি আহিছে৷ ই ৰোগীসকলৰ বাবে বহুলাংশেই লাভদায়ক হৈ পৰিছে৷ আমি দেশৰ বহুতো নামী চিকিৎসালয়তকৈ উন্নত কৰ্কট ৰোগ চিকিৎসা সেৱাৰ সুবিধা আগবঢ়াই আছোঁ,” অধীক্ষকগৰাকীয়ে আত্মবিশ্বাসেৰে কয়৷
ডাঃ শৰ্মাই আৰু কয় যে প্ৰাৰম্ভিক পৰ্যায়তে কৰ্কট ৰোগৰ চিনাক্তকৰণ হোৱাটো কৰ্কট ৰোগীৰ যত্ন আৰু চিকিৎসাৰ দিশত আধা যুঁজ জয় কৰাৰ সমান৷ “জনসাধাৰণে এই ৰোগবিধৰ বিষয়ে সজাগ হোৱাৰ লগতে সময়মতে চিকিৎসকৰ পৰামৰ্শ ল’লেহে কৰ্কট ৰোগ আগতীয়াকৈ চিনাক্ত কৰাটো সম্ভৱ৷ আমি নিজা প্ৰচেষ্টাৰে এটা কিয়’ক্স স্থাপন কৰিছোঁ যাতে ৰোগবিধৰ বিষয়ে মানুহৰ মাজত সজাগতা বৃদ্ধি কৰিব পৰা যায়৷ কিয়নো, যিকোনো ৰোগ প্ৰতিৰোধৰ ক্ষেত্ৰত সজাগতাই হৈছে প্ৰথম পদক্ষেপ,” শৰ্মাই উল্লেখ কৰে৷
