বিদ্যালয়ৰ শিক্ষাৰ্থীৰ মাজত দুৰ্ঘটনা প্ৰস্তুতি সজাগতা বৃদ্ধিৰ উদ্দেশ্যে এক ঐতিহাসিক পদক্ষেপ হিচাপে অসম ৰাজ্যিক দুৰ্যোগ ব্যৱস্থাপনা প্ৰাধিকৰণে (এ এছ ডি এম এ)য়ে শিক্ষা বিভাগ, অসম চৰকাৰৰ সৈতে সংযুক্ত হৈ জ্ঞান অংশীদাৰ হিচাপে ইউনিছেফ, অসমৰ সহায়ত ৰাজ্যব্যাপী এক বৃহৎ দুৰ্ঘটনা সজাগতা অভিযান ~ “গ্ৰেট আছাম স্কুল ছেকআউট প্ৰোগ্ৰাম (জি এ এছ এছ পি)” সফলভাৱে আয়োজন কৰে।
এই অনুষ্ঠানটো ১৬ অক্টোবৰ ২০২৫ তাৰিখে আন্তঃৰাষ্ট্ৰীয় ছেকআউট ডে’ত উদ্বোধন কৰা হয়। অনুষ্ঠানটো উদ্বোধন কৰে অসম চৰকাৰৰ মন্ত্ৰী কেশৱ মহন্তই।
এই পদক্ষেপটি বিদ্যালয় সুৰক্ষা কাৰ্যসূচীসমূহৰ অন্যতম হিচাপে চিহ্নিত হৈছে। ৰাজ্যজুৰি ৩৫খন জিলাৰ ১৫৭টা ৰাজহ চক্ৰৰ অন্তৰ্গত ১,৯৩৬খন বিদ্যালয়ৰ ৭ লাখতকৈ অধিক শিক্ষাৰ্থীয়ে এই কাৰ্যসূচীত অংশগ্ৰহণ কৰে।
‘গ্ৰেট আছাম স্কুল ছেকআউট’ কেৱল এক অনুশীলন নহয়, ই এক আন্দোলন হিচাপে গঢ় লৈছে, যাৰ উদ্দেশ্য হ’ল বিদ্যালয় পৰিসৰত সুৰক্ষা প্ৰদান আৰু জীৱন ৰক্ষা কৰাত সহায়কাৰী দক্ষতা বিকাশ কৰা। ভূমিকম্প আৰু অগ্নিকাণ্ডৰ সময়ত উদ্ধাৰ আৰু সুৰক্ষা অনুশীলনৰ জৰিয়তে অংশগ্ৰহণকাৰীসকলে সংকটকালীন পৰিস্থিতিত কেনেদৰে সুৰক্ষিতভাৱে প্ৰতিক্ৰিয়া জনাব, সেই বিষয়ে প্ৰায়োগিকভাৱে শিকিব পাৰিছে।
অনুষ্ঠানত উপস্থিত বিষয়াসকলে কয় যে এই কাৰ্যসূচী হৈছে বিদ্যালয়সমূহত এক দীৰ্ঘকালীন সজাগতা সৃষ্টি কৰাৰ প্রচেষ্টাৰ অংশ। ই বিদ্যালয় দুৰ্ঘটনা ব্যৱস্থাপনা সমিতি, বিদ্যালয় সুৰক্ষা কাৰ্যদল আৰু সংশ্লিষ্ট শিক্ষকসকলক প্ৰশিক্ষণ প্ৰদানৰ লগতে বিদ্যালয়ৰ সুৰক্ষা ব্যৱস্থাৰ বিভিন্ন দিশ চিনাক্ত কৰাত সহায় কৰিছে।
এই অনুশীলনে বিদ্যালয়, স্থানীয় প্ৰশাসন আৰু স্বেচ্ছাসেৱী সংগঠনসমূহৰ মাজত এক শক্তিশালী সম্পৰ্ক স্থাপন কৰিছে, যাতে সুৰক্ষা আৰু প্ৰস্তুতি কেৱল বিদ্যালয়ৰ মাজতেই সীমাবদ্ধ নহয়, সম্পূৰ্ণ সমাজলৈও বিস্তৃত হয়।
এই ৰাজ্যব্যাপী অভিযানৰ জৰিয়তে এ এছ ডি এম এ-য়ে অসমক এখন দুৰ্ঘটনা-প্ৰতিৰোধী ৰাজ্যৰূপে গঢ়ি তোলাৰ দিশত বিদ্যালয়সমূহে মুখ্য ভুমিকা পালন কৰিব পাৰিব বুলি প্ৰতিশ্ৰুতি দিছে।
শিক্ষাৰ্থীসকলক “সুৰক্ষা দূত” হিচাপে গঢ়ি তোলাৰ লগতে তেওঁলোকক নিজৰ ঘৰৰ লগতে সমাজত দুৰ্ঘটনা সজাগতাৰ বাৰ্তা প্ৰসাৰ কৰিবলৈ উৎসাহিত কৰা হৈছে।
এ এছ ডি এম এ-য়ে সকলো শিক্ষা প্ৰতিষ্ঠানক নিয়মীয়া সুৰক্ষা অনুশীলন আৰু প্ৰস্তুতি কাৰ্যসূচী আয়োজন কৰিবলৈ উৎসাহিত কৰিছে। কাৰণ সজাগতা আৰু প্ৰস্তুতিয়েই হৈছে প্ৰাকৃতিক দুৰ্ঘটনাৰ বিৰুদ্ধে সৰ্বাধিক শক্তিশালী ঢাল।
