দিন হাজিৰাৰে জীৱিকা নিৰ্বাহ কৰা কৰৰা গড়ভিতৰ গাঁৱৰ এগৰাকী বয়োজ্যেষ্ঠ বাসিন্দা বাবুল কলিতা (৬৮)৷ প্ৰতিবছৰে অহা বলিয়া বানে তেওঁৰ দুৰ্ভগীয়া পৰিয়ালটোক জুৰুলা কৰি থৈ যায়৷
“১৮ জুনত অহা প্ৰবল বানে মোক সৰ্বস্বান্ত কৰি থৈ গ’ল৷ আমি ঘৰৰ বয়-বস্তুবোৰ সামৰাৰো সুযোগ নাপালোঁ আৰু নিমিষতে আমাৰ জীৱনলৈ কাল অমানিশা নামি আহিল৷ বালাগাঁও প্ৰাথমিক বিদ্যালয়ৰ বান সাহায্য শিবিৰত আমি আশ্ৰয় লৈছিলোঁ৷ পৰিস্থিতি শাম কটাৰ পাছত মোৰ আত্মীয়ৰ ঘৰতেই কেইদিনমান থকাকৈ গৈছিলোঁ যদিও তেনেকৈ বেছিদিন থকাটো জানো সম্ভৱ?” কলিতাই এনেদৰে নিজৰ দুখ ব্যক্ত কৰে৷ কিন্তু, এক বিশেষ আঁচনিয়ে এই দুখৰ সময়ত তেওঁক যেন কিছু হ’লেও সকাহ প্ৰদান কৰিলে৷ “যোৱা ২০ আগষ্টত চৰকাৰে গৃহ পুনৰ্নিৰ্মাণৰ বাবদ প্ৰদান কৰা ৯৫,১০০ টকা মোৰ বেংক একাউণ্টত জমা হৈছে৷ চৰকাৰখনে এনে স্পৰ্শকাতৰ মুহূৰ্তত আৰ্তজনলৈ সদায় সহায়ৰ হাত আগবঢ়াই অহা পৰিলক্ষিত হৈছে৷ প্ৰতিবছৰে সন্মুখীন হৈ অহা এই বান সমস্যাই মোক মানসিকভাৱেও ভাৰাক্ৰান্ত কৰি তুলিছে৷ মই ইতিমধ্যে পৰৱৰ্তী বান পৰিস্থিতিৰ কথা ভাবি শংকাত ভুগিছোঁ,” তেওঁ অসম বাৰ্তাক কয়৷
গাঁওখনৰ আন কিছু লোকৰ লগতে বাবুল কলিতাও বালাগাঁৱৰ এটা ইটা ভাটাত প্ৰতিদিনে ৩০০ টকা পাৰিশ্ৰমিকৰ বিনিময়ত নিয়োজিত হৈ আছে৷ “আমি বৰ কষ্টেৰে জীৱন নিৰ্বাহ কৰিবলগীয়া হয়৷ চৰকাৰে দিয়া প্ৰতিটো আৰ্থিক সাহায্যই আমাৰ সমস্যাৰ সমাধান সহজ কৰি তুলিছে,” তেওঁ আৱেগবিহ্বলভাৱে কয়৷
বালাগাঁৱৰে আন এগৰাকী বাসিন্দা ৰমিলা দাসেও (৫৮) বাবুল কলিতাৰ দৰেই বিগত জুন মাহৰ বানত সৰ্বস্বান্ত হৈ পৰিছিল৷ প্ৰত্যক্ষ লাভালাভ হস্তান্তৰকৰণ পদ্ধতিৰে ৯৫,১০০ টকাৰ পুনৰ্বাসন অনুদান তেওঁৰ বেংক একাউণ্টত জমা হৈছে বুলি জানিব পাৰি জিলা প্ৰশাসনক তেওঁ কৃতজ্ঞতা জ্ঞাপন কৰে৷ চৰকাৰে বান সমস্যাৰ স্থায়ী সমাধান বিচাৰি পাব বুলি তেওঁ আশাবাদী৷
ৰুক্মিণী কৈৱৰ্তৰ (৭০) কাহিনীও বৰ মৰ্মস্পৰ্শী৷ বানত গৃহহাৰা হোৱাৰ পাছত তেওঁ বালাগাঁৱতে নিজ কন্যাৰ গৃহত থাকিবলৈ একপ্ৰকাৰ বাধ্য হয়৷ তিনি মাহ ধৰি তেনেদৰে জীৱন যাপন কৰিবলগীয়া হোৱাত হতাশাগ্ৰস্ততাই তেওঁক আৱৰি ধৰিছিল৷ কিন্তু যেতিয়াই তেওঁ জানিবলৈ পালে যে তেওঁৰ বেংক একাউণ্টত টকাখিনি জমা হৈছে, তেতিয়াই তেওঁ যেন জীয়াই থকাৰ এক নতুন আশা বিচাৰি পালে৷ “মই অকলশৰীয়া হোৱাৰ লগতে শাৰীৰিকভাৱেও যথেষ্ট দুৰ্বল হৈ পৰিছোঁ৷ এয়া মোৰ বাবে এক বৃহৎ সকাহ৷ আগষ্টৰ ২৩ তাৰিখে মই মোৰ বেংক একাউণ্টটো পৰীক্ষা কৰি ১০,০০০ টকা উলিয়ালোঁ৷ ঘৰটোৰ পুনৰ্নিৰ্মানৰ বাবে দুজনকৈ লোকক মই আজিৰপৰা কামত নিয়োগ কৰিছোঁ,” তেওঁ কয়৷
যোৱা ২০ আগষ্টত মুখ্যমন্ত্ৰী ড° হিমন্ত বিশ্ব শৰ্মাই বানত ক্ষতিগ্ৰস্ত পৰিয়ালসমূহক সাহায্য প্ৰদানৰ এই আঁচনিখন মুকলি কৰে৷ এই আঁচনিৰ জৰিয়তে পোনপটীয়া লাভালাভ হস্তান্তৰকৰণ প্ৰক্ৰিয়াৰে পুনৰ্বাসন অনুদান পুঁজি হিতাধিকাৰীসকলে লাভ কৰিবলৈ সক্ষম হয়৷
ৰঙিয়া চক্ৰ বিষয়াৰ কাৰ্যালয়ৰ লাট মণ্ডল অপূৰ্ব গোস্বামীয়েও ৰুক্মিণী কৈৱৰ্ত আৰু ৰমিলা দাসৰ দৰেই বান পৰিস্থিতিৰ বাবে দুৰ্ভোগ ভুগিবলগীয়া হৈছিল৷
“বিগত জুন মাহৰ বান পৰিস্থিতিয়ে আমাৰ বাবে এক প্ৰত্যাহ্বানৰ সৃষ্টি কৰিছিল৷ ঘৰৰ পৰা বানপীড়িত ৰাইজক সাহায্য শিবিৰলৈ স্থানান্তৰ কৰাটো প্ৰশাসনৰ বাবে যথেষ্ট কঠিন হৈ পৰিছিল৷ এইবাৰ ৰঙিয়া মহকুমাত হোৱা বানক বিগত এটা দশকৰ আটাইতকৈ ডাঙৰ বান হিচাপে অভিহিত কৰিব পাৰি,” গোস্বামীয়ে কয়৷
“আমি প্ৰস্তুত কৰা হিতাধিকাৰীৰ তালিকাখন দুবাৰকৈ নিৰীক্ষণ কৰা হৈছে৷ মই ডাঠি ক’ব পাৰোঁ যে ইয়াত কোনোধৰণৰ ত্ৰুটি ৰৈ যোৱা নাই,” তেওঁ লগতে কয়৷
চৰকাৰী তথ্য অনুসৰি ৩১খন জিলাত মুঠ ২,০৪,৩৪৮টা ঘৰ ক্ষতিগ্ৰস্ত হৈছে, যাৰ বাবে চৰকাৰে ইতিমধ্যে ১১৯.১১ কোটি টকাৰ অনুমোদন জনাইছে৷ সম্পূৰ্ণৰূপে ক্ষতিগ্ৰস্ত ঘৰসমূহৰ বাবে পাহাৰীয়া অঞ্চলৰ হিতাধিকাৰীয়ে ১,০১,৯০০ টকাকৈ আৰু ভৈয়াম অঞ্চলৰ হিতাধিকাৰীসকলে ৯৫,১০০ টকাকৈ লাভ কৰিব৷ একেদৰে যিসকল লোকৰ ঘৰ আংশিকভাৱে ক্ষতিগ্ৰস্ত হৈছে তেওঁলোকে ৫,২০০ টকাকৈ (পকা ঘৰৰ বাবে) আৰু ৩,২০০ টকাকৈ (কেঁচা ঘৰৰ বাবে) লাভ কৰিব৷ যিসকলৰ জুপুৰি ঘৰ আংশিকভাৱে ক্ষতিগ্ৰস্ত হৈছে তেওঁলোকে ৰাজ্যিক দুৰ্যোগ সঁহাৰি পুঁজি (এছডিআৰএফ)ৰ নীতি অনুসৰি ২,১০০ টকাকৈ লাভ কৰিব৷ কাছাৰ (৮১,৫৩৬), কৰিমগঞ্জ (২৮,৩৬৪) আৰু নগাঁও (১৫,২০০) জিলাত আটাইতকৈ বেছি পৰিয়াল বানত ক্ষতিগ্ৰস্ত হৈছে৷
এই পদক্ষেপৰ শুভাৰম্ভণি কৰি মুখ্যমন্ত্ৰীয়ে কয় যে বানত ঘৰ-দুৱাৰ উটুৱাই নিয়াৰ ফলত ঘাইপথ আৰু মথাউৰিত থাকিবলৈ বাধ্য হোৱা ৩০৯টা পৰিয়ালে ঘৰ নিৰ্মাণৰ বাবে মুখ্যমন্ত্ৰী সাহায্য পুঁজিৰ অধীনত অতিৰিক্ত ১ লাখ টকাকৈ লাভ কৰিব৷
মুখ্যমন্ত্ৰী ড° শৰ্মাই কয় যে জিলাখন পৰিদৰ্শন কৰা তেওঁৰ কেবিনেট সতীৰ্থসকলে ক্ষতিগ্ৰস্ত প্ৰায় ২০% ঘৰৰ যাদৃচ্ছিকভাৱে নিৰীক্ষণ কৰিছে৷
ৰাজ্য চৰকাৰৰ তথ্য অনুসৰি মুঠ ৫,১৮৫টা ঘৰ গুৰুতৰভাৱে বা সম্পূৰ্ণৰূপে ক্ষতিগ্ৰস্ত হোৱাৰ বিপৰীতে ৩৪,৯২৪টা পকী ঘৰ আৰু ১,৫৩,৩২৬টা কেঁচা ঘৰ আংশিকভাৱে ক্ষতিগ্ৰস্ত হৈছে৷ ইয়াৰ পূৰ্বে চৰকাৰে ২.০২ লাখ ক্ষতিগ্ৰস্ত পৰিয়ালক বস্ত্ৰ আৰু বাচন-বৰ্তন যোগান ধৰিবলৈ ৭৬.৭৬ কোটি টকা মুকলি কৰি দিছিল৷ লগতে ১,০১,৫৩৯গৰাকী ছাত্ৰ-ছাত্ৰীক বিশেষ গ্ৰন্থ অনুদান আঁচনিৰ অধীনত ১,০০০ টকাকৈ প্ৰদান কৰা হৈছিল৷
মুখ্যমন্ত্ৰী ড° শৰ্মাই কয় যে চৰকাৰে ছেপ্টেম্বৰৰ পৰা আন্তঃগাঁথনি পুনৰ নিৰ্মাণত গুৰুত্ব প্ৰদান কৰিব৷ “ক্ষতিগ্ৰস্ত আন্তঃগাঁথনিসমূহৰ মূল্যায়নৰ প্ৰক্ৰিয়া অব্যাহত আছে৷ শীঘ্ৰেই চূড়ান্ত প্ৰতিৱেদন কেন্দ্ৰলৈ প্ৰেৰণ কৰা হ’ব,” তেখেতে কয়৷
