সমাজৰ প্ৰতিজন সচেতন ব্যক্তিয়ে তেওঁৰ আপোন বিদ্যালয়খনৰ শৈক্ষিক পৰিৱেশ সদায় সুন্দৰ হৈ থকাটো বিচাৰে৷ নিজ বিদ্যালয়খনৰ সৈতে প্ৰত্যোকজন ব্যক্তিৰে বহুতো আবেগ আৰু স্মৃতি জড়িত হৈ থাকে আৰু সেই বিশেষ বিদ্যালয়খনৰ সৈতে সংযুক্ত হৈ কিবা এটা কৰাৰ সুযোগ লাভ কৰিলে গৌৰৱবোধ কৰে৷
৭ ছেপ্টেম্বৰ ২০২১ত প্ৰধানমন্ত্ৰী নৰেন্দ্ৰ মোদীয়ে দেশৰ শিক্ষা ব্যৱস্থাক অধিক প্ৰসাৰিত কৰাৰ লগতে শিক্ষাৰ মান উন্নীতকৰণৰ বাবে বিদ্যাঞ্জলি ২.০ প’ৰ্টেল মুকলি কৰিছিল৷ প্ৰাক্তন ছাত্ৰ-ছাত্ৰী, অৱসৰপ্ৰাপ্ত শিক্ষক, চৰকাৰী বিষয়া তথা কৰ্মচাৰী, ব্যক্তিগত সংস্থা, যুৱ পেছাদাৰী আৰু সমাজৰ অন্যান্য লোকৰ স্বেচ্ছামূলক সহযোগিতাৰে বিদ্যালয়সমূহৰ সবলীকৰণৰ উদ্দেশ্যৰে ভাৰত চৰকাৰৰ শিক্ষা মন্ত্ৰ্যালয়ৰ অধীনত এই আঁচনিৰ ৰূপায়ণ কৰা হৈছিল৷
“কেন্দ্ৰীয় চৰকাৰৰ দ্বাৰা ৰূপায়িত এই আঁচনিয়ে ৰাজ্যত যথেষ্ট সমাদৰ লাভ কৰিছে৷ সমাজৰ বিভিন্ন শ্ৰেণীৰ লোকে স্বেচ্ছাই এই প’ৰ্টেলত নিজৰ নাম পঞ্জীয়ন কৰি বিদ্যালয়সমূহলৈ অনুদান আগবঢ়াবলৈ আগ্ৰহ প্ৰকাশ কৰিছে৷ পঞ্জীয়নৰ ক্ষেত্ৰত আমাৰ ৰাজ্যখনে দেশৰ ভিতৰতে শীৰ্ষস্থান দখল কৰিবলৈ সক্ষম হৈছে৷ ৰাইজৰ সহায়-সহযোগিতাই বিদ্যালয়সমূহত শিক্ষাৰ মান অধিক উন্নত কৰি তোলাত সহায় কৰিব৷” অসম সৰ্ব শিক্ষা অভিযানৰ ৰাজ্যিক অনুষ্ঠান বিষয়া ড° চুমি বৰঠাকুৰে অসম বাৰ্তাক কয়৷
ইউনিফাইড ডিষ্ট্ৰিক্ট ইনফৰমেশ্যন ছীষ্টেম ফৰ এডুকেশ্যন প্লাছ (UDISE+) কোডযুক্ত প্ৰতিখন বিদ্যালয়ে বিদ্যাঞ্জলি ২.০ প’ৰ্টেলত পঞ্জীয়ন কৰিব পাৰে৷ এই প’ৰ্টেলৰ জৰিয়তে স্বেচ্ছাসেৱকসকলে তেওঁলোকৰ পছন্দৰ প্ৰতিখন চৰকাৰী আৰু চৰকাৰী সাহায্যপ্ৰাপ্ত বিদ্যালয়সমূহৰ সৈতে প্ৰত্যক্ষভাৱে সংযোগ স্থাপন কৰি ছাত্ৰ-ছাত্ৰীসকলক পাঠদান কৰোৱাৰ লগতে বিভিন্ন দক্ষতামূলক কাৰ্যসূচী ৰূপায়ণ কৰিব পাৰে৷ তদুপৰি বিদ্যালয়সমূহত প্ৰয়োজনীয় সা-সামগ্ৰী, আচবাব-পত্ৰ তথা অন্যান্য সঁজুলি অৰিহণাস্বৰূপে প্ৰদান কৰিব পাৰে৷
শোণিতপুৰ জিলাৰ চেঙেলীমৰা চৰকাৰী প্ৰাথমিক বালিকা বিদ্যালয়ৰ শিক্ষক হেমন্ত কোঁচে বিদ্যাঞ্জলি ২.০ প’ৰ্টেলৰ জৰিয়তে নিজ বিদ্যালয়তে এখন চিলিং ফেন প্ৰদান কৰিছে৷ “যিহেতু পূৰ্বতে আমাৰ বিদ্যালয়ৰ শ্ৰেণীকোঠাসমূহত ফেনৰ ব্যৱস্থা নাছিল, সেইবাবে গৰমৰ দিনকেইটাত শিক্ষাৰ্থীসকলে যথেষ্ট অসুবিধাৰ সন্মুখীন হৈছিল৷ এই প’ৰ্টেলৰ বিষয়ে অৱগত হোৱাৰ বহু আগতেই আমাৰ বিদ্যালয়ৰ শিক্ষকসকলে প্ৰতিটো শ্ৰেণীকোঠাতে একোখনকৈ ফেন প্ৰদান কৰাৰ কথা আলোচনা কৰিছিলোঁ৷ বিদ্যাঞ্জলি ২.০ প’ৰ্টেলত পঞ্জীয়নভুক্ত কৰাৰ পাছত এতিয়া গাঁৱৰ ৰাইজেও বিদ্যালয়খনলৈ বিভিন্ন ধৰণৰ অনুদান আগবঢ়াবলৈ ইচ্ছা প্ৰকাশ কৰিছে৷ পূৰ্বতেও গাঁওবাসীয়ে অস্থায়ীভাৱে টিনপাতেৰে বিদ্যালয়ৰ চাৰিসীমাৰ দেৱাল নিৰ্মাণত সহায় কৰিছিল৷ এই পদক্ষেপৰ জৰিয়তে এতিয়া ইচ্ছুক সকলোৱে বিদ্যালয়খনৰ চাৰিসীমাৰ স্থায়ী দেৱাল নিৰ্মাণত অৰিহণা যোগাবলৈ সুযোগ লাভ কৰাৰ লগতে অন্যান্য দিশতো ৰাইজৰ অংশগ্ৰহণে আমাৰ বিদ্যালয়খনৰ সৰ্বতোপ্ৰকাৰে উন্নতি সাধন কৰিব বুলি আমি আশাবাদী,”তেওঁ কয়৷
উল্লেখ্য যে শিৱসাগৰ চৰকাৰী উচ্চতৰ মাধ্যমিক বহুমুখী বিদ্যালয়ৰ ১৯৮৭ বৰ্ষৰ উচ্চ মাধ্যমিকৰ প্ৰাক্তন ছাত্ৰ-ছাত্ৰীসকলে শিক্ষক-শিক্ষয়িত্ৰীৰ জিৰণি কোঠাৰ উন্নীতকৰণৰ বাবে বিদ্যাঞ্জলি ২.০ৰ অধীনত ১০০ খন চকী-মেজ প্ৰদান কৰে৷ একেদৰেই ৰাজধৰ বড়া উচ্চতৰ মাধ্যমিক বিদ্যালয়ৰ ১৯৮৫ বৰ্ষত হাইস্কুল শিক্ষান্ত পৰীক্ষাত উত্তীৰ্ণ প্ৰাক্তন ছাত্ৰ-ছাত্ৰীসকলে বিদ্যালয়খনৰ পুথিভঁৰাল উন্নীতকৰণৰ বাবে আলমাৰী, চকী-মেজ, কিতাপৰ লগতে অন্যান্য প্ৰয়োজনীয় সামগ্ৰী প্ৰদান কৰে৷
একেদৰেই শোণিতপুৰ জিলাৰ এখন ব্যক্তিগত বিদ্যালয়ৰ শিক্ষয়িত্ৰী জোনালী ঝৰাইও এই প’ৰ্টেলত নিজৰ নাম পঞ্জীয়ন কৰি লুথেৰান হাইস্কুললৈ এখন চিলিং ফেন প্ৰদান কৰিছে৷ “সমাজৰ কাৰণে কাম কৰি যাবলৈ মই ইচ্ছুক আৰু যেতিয়াই তেনে কোনো সুযোগ লাভ কৰোঁ তেতিয়া নিজ সাধ্য অনুসৰি সেৱা আগবঢ়াবলৈ চেষ্টা কৰোঁ৷ বিদ্যাঞ্জলি ২.০ৰ জৰিয়তে বিদ্যালয়খনত প্ৰয়োজনীয় এবিধ সামগ্ৰী দিবলৈ সুযোগ লাভ কৰিলোঁ৷ আমাৰ পৰিয়ালৰ প্ৰায়সংখ্যক লোকেই এই বিদ্যালয়খনতে শিক্ষাগ্ৰহণ কৰিছিল৷ সেইবাবে বিদ্যালয়খনলৈ এটি অৱদান আগবঢ়োৱাৰ মোৰ দুৰ্বাৰ হেঁপাহ আছিল৷ চৰকাৰৰ এই পদক্ষেপ সঁচাকৈয়ে প্ৰশংসনীয়৷ এই প’ৰ্টেলৰ জৰিয়তে দূৰণিত বাস কৰা লোকসকলেও বিদ্যালয়সমূহৰ সৈতে সংযুক্ত হৈ যিকোনো ধৰণৰ বৰঙণি আগবঢ়াব পাৰিব,” তেওঁ অসম বাৰ্তাক কয়৷
