মাৰ্টিনা কাশ্যপে মেধাৰ জৰিয়তে তেওঁৰ নিজ গাঁওখনলৈ গৌৰৱ কঢ়িয়াই আনিবলৈ সক্ষম হৈছে আৰু তেওঁৰ এই সফলতাই আন দহজনৰ বাবে এক প্ৰেৰণাৰ উৎস হৈ ৰ’ব৷ তেওঁ অসম চৰকাৰে প্ৰজ্ঞান ভাৰতী আঁচনিৰ অধীনত প্ৰদান কৰা বাণীকান্ত কাকতি মেধা বঁটাৰ অধীনত এখন দুচকীয়া বাহন লাভ কৰা এগৰাকী যোগ্য হিতাধিকাৰী৷ ২০২২ বৰ্ষৰ উচ্চতৰ মাধ্যমিক চূডান্ত পৰীক্ষাত কৰৰা উচ্চতৰ মাধ্যমিক বিদ্যালয়ৰ পৰা ৯১.৮% নম্বৰ লাভ কৰি তেওঁ শিক্ষানুষ্ঠানখনলৈও গৌৰৱ কঢ়িয়াই আনিছে৷ ভৱিষ্যতে এগৰাকী সু-চিকিৎসক হোৱাৰ লক্ষ্য আগত ৰাখি মাৰ্টিনাই বৰ্তমান মেডিকেল কলেজত নামভৰ্তিৰ বাবে প্ৰস্তুতি চলাই আছে৷
মাৰ্টিনাই অসম বাৰ্তাৰ আগত নিজৰ মনৰ ভাব ব্যক্ত কৰি কয়, “এই পদক্ষেপৰ বাবে অসম চৰকাৰক মই ধন্যবাদ জ্ঞাপন কৰিছোঁ৷ এনেধৰণৰ পদক্ষেপসমূহে ছাত্ৰ-ছাত্ৰীসকলক নিশ্চয় প্ৰেৰণা যোগাব৷ অৱশ্যে মই এটা কথা ক’বলৈ বিচাৰোঁ যে চৰকাৰে দুচকীয়া বাহনখনৰ বিকল্প হিচাপে নগদ ধনো প্ৰদান কৰাৰ ব্যৱস্থা কৰিব লাগে৷ ইয়াৰ জৰিয়তে আৰ্থিকভাৱে পিছপৰা পৰিয়ালৰ ছাত্ৰ-ছাত্ৰীসকল যথেষ্ট উপকৃত হ’ব৷”
বিগত ৩০ নৱেম্বৰত অসম চৰকাৰৰ উচ্চ শিক্ষা বিভাগে প্ৰজ্ঞান ভাৰতী আঁচনিৰ অধীনত ২০২২ বৰ্ষৰ উচ্চতৰ মাধ্যমিক চূড়ান্ত পৰীক্ষাত উত্তীৰ্ণ হোৱা মেধাৱী ছাত্ৰ-ছাত্ৰীসকললৈ ড॰ বাণীকান্ত কাকতি মেধা বঁটা প্ৰদান কৰে৷ আঁচনিখনৰ অধীনত মুঠ ৩৫,৮০০গৰাকী ছাত্ৰছাত্ৰীলৈ বঁটা হিচাপে স্কুটাৰ বিতৰণ কৰা হয়৷ খানাপাৰাস্থিত পশু চিকিৎসা মহাবিদ্যালয় খেলপথাৰত আয়োজিত এই অনুষ্ঠানৰ আনুষ্ঠানিকভাৱে শুভাৰম্ভ কৰে মুখ্যমন্ত্ৰী ড॰ হিমন্ত বিশ্ব শৰ্মাই৷
হিতাধিকাৰীসকলৰ ভিতৰত ৬,০৫২গৰাকী ছাত্ৰ আৰু ২৯,৭৪৮গৰাকী ছাত্ৰী৷ এই বঁটাৰ বাবে যোগ্য হ’বলৈ ছাত্ৰসকলে ন্যূনতম ৭৫% আৰু ছাত্ৰীসকলে ন্যূনতম ৬০% নম্বৰেৰে উত্তীৰ্ণ হ’ব লাগে৷
কে চি দাস কমাৰ্চ মহাবিদ্যালয়ৰ ছাত্ৰ বাসুদেৱ মণ্ডলে উচ্চতৰ মাধ্যমিক চূড়ান্ত পৰীক্ষাত ৯০.২ শতাংশ নম্বৰ লাভ কৰিছিল৷ তেওঁ কয়, “মোৰ থকা ঠাইখিনিৰ পৰা কলেজলৈ যাতায়াত ব্যৱস্থা সুগম নহয় বাবে নিতৌ অহা-যোৱা কৰোঁতে বহুখিনি টকা খৰচ হোৱাৰ লগতে সময়ৰো অপচয় হৈছিল৷ স্কুটীখন লাভ কৰাৰ পাছত এইবোৰ সমস্যা দূৰ হ’ব৷ ইয়াৰ জৰিয়তে মই সকলোকে আহ্বান জনাইছোঁ যে ভৱিষ্যতে কোনোৱে যাতে আইন উলংঘা নকৰে৷ অনাকাংক্ষিত দুৰ্ঘটনাৰ পৰা হাত সাৰিবলৈ স্কুটী চলোৱাৰ সময়ত সাৱধানতা অৱলম্বন কৰাৰ লগতে ট্ৰেফিক আইন মানি চলাটো নিতান্তই প্ৰয়োজনীয়৷”
কটন বিশ্ববিদ্যালয়ৰ পৰা কলা শাখাত ৯২ শতাংশ নম্বৰ লাভ কৰা পৰাগ কুমাৰ শৰ্মা প্ৰজ্ঞান ভাৰতী আঁচনিৰ আন এগৰাকী হিতাধিকাৰী৷ তেওঁ বৰ্তমান স্নাতক প্ৰথম ষাণ্মাসিকত অধ্যয়নৰত৷ বাসুদেৱৰ দৰেই পৰাগেও স্কুটীখন লাভ কৰাৰ ফলত তেওঁৰ সময় ৰাহি হোৱাৰ লগতে কষ্টও কিছু কম হ’ব বুলি জনায়৷
আঁচনিখন উন্মোচনৰ কেন্দ্ৰীয় বিতৰণী অনুষ্ঠানত কামৰূপ (মহানগৰ) আৰু কামৰূপ জিলাৰ মেধাৱী ছাত্ৰছাত্ৰীসকলক স্কুটীসমূহ বিতৰণ কৰাৰ বিপৰীতে বাকী জিলাসমূহৰ ছাত্ৰ-ছাত্ৰীসকলক ডিচেম্বৰৰ ভিতৰত স্কুটীসমূহ বিতৰণ কৰা হ’ব বুলি ঘোষণা কৰা হৈছে৷
অনুষ্ঠানত ভাষণ প্ৰসংগত মুখ্যমন্ত্ৰী ড॰ হিমন্ত বিশ্ব শৰ্মাই কয় যে ২০২২ চনৰ ৩০ নৱেম্বৰৰ দিনটো আঁচনিখনৰ অধীনত মেধা বঁটা লাভৰ বাবে যোগ্যৰ তালিকাত স্থান লাভ কৰা ছাত্ৰ-ছাত্ৰীসকলৰ জীৱনৰ বাবে এক ঐতিহাসিক মাইলৰ খুঁটি৷
উন্নয়ন আৰু বিকাশৰ বাবে যুৱপ্ৰজন্মক নেতৃত্ব গ্ৰহণৰ বাবে আগবাঢ়ি আহিবলৈ প্ৰধানমন্ত্ৰী নৰেন্দ্ৰ মোদীয়ে জনোৱা আহ্বানৰ কথা উল্লেখ কৰি মুখ্যমন্ত্ৰী ড॰ শৰ্মাই মেধাৱী ছাত্ৰ-ছাত্ৰীসকলক অন্যান্য ৰাজ্যৰ ছাত্ৰ-ছাত্ৰীসকলৰ সৈতে ফেৰ মাৰি হাতে হাত ধৰি আগবাঢ়ি যাবলৈ আহ্বান জনায় যাতে তেওঁলোকেও সুযোগসমূহৰ সুফল লাভ কৰিব পাৰে৷
আহি থকা দিনসমূহত ডিজিটাইজেশ্যনে উন্নয়নৰ মন্ত্ৰ হ’ব বুলি উল্লেখ কৰি মুখ্যমন্ত্ৰী ড॰ শৰ্মাই ছাত্ৰ-ছাত্ৰীসকলক উদ্ভাৱনৰ ওপৰত গুৰুত্ব দিবলৈ আহ৩ান জনায়৷ তেওঁ কয় যে উদ্ভাৱনৰ জগতখনে সকলোৰে বাবে লাভজনক আৰু বিকাশৰ সুযোগ কঢ়িয়াই আনে৷ মুখ্যমন্ত্ৰী ড॰ শৰ্মাই কয়, “উদ্ভাৱনে তেওঁলোকক নিয়োগ প্ৰাৰ্থী হৈ থকাতকৈ নিয়োগ-প্ৰদানকাৰী হোৱাটো নিশ্চিত কৰিব৷”
মেধাৱী ছাত্ৰ-ছাত্ৰীসকলক আকাশ চুমাৰ লক্ষ্য সুনিশ্চিত কৰিবলৈ আহ্বান জনাই মুখ্যমন্ত্ৰী ড॰ শৰ্মাই কয় যে অনাগত দিনত যদিহে তেওঁলোকে নিজ নিজ আকাংক্ষাক কেৱল তৃতীয় আৰু চতুৰ্থ বৰ্গৰ চাকৰিৰ মাজত সীমাবদ্ধ কৰি ৰাখে তেন্তে তেওঁলোকৰ প্ৰতিভাৰ অপচয় হ’ব৷
মুখ্যমন্ত্ৰী ড॰ হিমন্ত বিশ্ব শৰ্মাই স্নাতকোত্তৰ শ্ৰেণীত অধ্যয়নৰত সকলো ছাত্ৰীক বছৰি ১০,০০০ টকাকৈ প্ৰদান কৰাৰ বাবে এখন আঁচনি ৰূপায়ণ কৰাৰ কথা ঘোষণা কৰে৷ আঁচনিখনত আৱেদন কৰিবলৈ শিক্ষা বিভাগে শীঘ্ৰে এটা প’ৰ্টেল মুকলি কৰিব আৰু এই প’ৰ্টেলত সকলো ছাত্ৰীক আৱেদন জনোৱাৰ বাবে তেখেতে আহ্বান জনায়৷
উক্ত অনুষ্ঠানত শিক্ষামন্ত্ৰী ডাঃ ৰণোজ পেগু, অসমৰ কেবিনেট মন্ত্ৰী চন্দ্ৰমোহন পাটোৱাৰী আৰু অতুল বৰাকে ধৰি ৰাজ্য চৰকাৰৰ জ্যেষ্ঠ বিষয়াসকল উপস্থিত থাকে৷
