যোৱা বছৰৰ ডিচেম্বৰৰ এটি কুঁৱলীসনা পুৱা৷ মৰিগাঁৱৰ বড়িবজাৰ আৰক্ষী পহৰা চকীৰ ভাৰপ্ৰাপ্ত পৰিদৰ্শক মুনীন্দ্ৰ চন্দ্ৰ দাসৰ ওচৰত হাজিৰ হ’লগৈ গৃহৰক্ষী বাহিনীৰ জোৱান নাজিৰ হুছেইন আৰু আব্দুল ছালাম৷ অহা কেইটামান মাহ দুয়োগৰাকী এই আৰক্ষী পহৰা চকীটোত কৰ্মৰত হৈ থাকিব৷ কেৱল নিয়মীয়া গৃহৰক্ষী জোৱানৰ দায়িত্ব সমাপন কৰাতেই তেওঁলোকৰ কাম সীমাবদ্ধ নহয়৷ আজৰি সময়ত আন এটা বিশেষ দায়িত্বও তেওঁলোকে স্বেচ্ছামূলকভাৱে হাতত লয়৷ সেয়া হৈছে আৰক্ষী পহৰা চকীটোৰ চাৰিওফালে থকা মৰিগাঁও আৰক্ষীৰ নামত আবণ্টিত ১৫ বিঘা ১ কঠা আৰু ১০ লেচা মাটিৰ কিছু অংশত তেওঁলোকে বৰো ধানৰ খেতি কৰিব৷
আনফালে ঔজাৰি আৰক্ষী ছাউনীত থকা বাহাৰুল, অভিজিৎ, দুলাল, দিলীপৰ দৰে গৃহৰক্ষী জোৱানসকলৰো ব্যস্ততাৰ অন্ত নাই৷ ছাউনীটোৰ চৌপাশে থকা প্ৰায় ২১ বিঘা মাটিত জোৱানসকলে সৰিয়হ, মাকৈ, জিকা, জাতিলাও, ভেণ্ডি আদিৰ খেতি কৰি আছে৷ কামৰ পৰা আহি জোৱানসকলৰ কোনোৱে যদি শাক-পাচলিত পানী দিয়ে, কোনোৱে আকৌ অপতৃণ আঁতৰোৱাত ব্যস্ত হৈ পৰে৷
ফেব্ৰুৱাৰীৰ এটি দুপৰীয়া লাহৰীঘাট আৰক্ষী চকীৰ বেৰেকত জোৱানসকল দুপৰীয়াৰ সাঁজৰ কাৰণে অপেক্ষা কৰি আছে৷ আজি তেওঁলোকৰ বাবে ভাতৰ সৈতে ৰন্ধা হৈছে ঔজাৰি আৰক্ষী ছাউনীৰ পৰা অহা শাক-পাচলি৷ এয়া আৰক্ষীয়ে নিজৰ খেতিৰ পৰা অনা শাক-পাচলি৷
এই পদক্ষেপটো আৰম্ভ হোৱাৰ আঁৰত আছে কেইগৰাকীমান বিশেষ ব্যক্তিৰ প্ৰচেষ্টা৷ মৰিগাঁৱৰ তদানীন্তন আৰক্ষী অধীক্ষক অপৰ্ণা নটৰাজনে ২০২১ চনৰ ছেপ্টেম্বৰ-অক্টোবৰ মাহত বড়িবজাৰত আৰক্ষীৰ বাবে আবণ্টিত মাটিৰ বুজ লৈ আছিল৷ প্ৰায় ১৫ বিঘা মাটি এনেয়ে পৰি থকাতকৈ তাত কিবা এটা খেতি কৰাৰ ধাৰণাটো তেতিয়াই তেওঁৰ মনলৈ আহিল৷ খা-খবৰ লৈ গম পোৱা গ’ল যে তেনে মাটি ঔজাৰিতো আছে৷
“এয়া আমাৰ মৰিগাঁও আৰক্ষীৰ সমূহীয়া প্ৰচেষ্টা আছিল,” এই পদক্ষেপৰ কতৃত্ব সম্পূৰ্ণ বিভাগটোক প্ৰদান কৰি অপৰ্ণা নটৰাজনে অসম বাৰ্তাক কয়৷ “এনেয়ে পৰি থকা মাটিখিনিত পৰৱৰ্তী পৰ্যায়ৰ পৰিকল্পিত নিৰ্মাণ আৰম্ভ হ’বলৈ কিছুদিন সময় লাগিব৷ আমি সকলোৱে মিলি সিদ্ধান্ত ল’লোঁ যে তেতিয়ালৈকে এই মাটিখিনিত আমাৰ আৰক্ষীসকলে আজৰি সময়ত বিভিন্ন ধৰণৰ সৰু-সুৰা খেতি কৰিব৷ আমাৰ জোৱানসকলে প্ৰথমতে সৰিয়হৰ খেতি কৰে৷ তাৰ পাছত বিভিন্ন শাক-পাচলি আৰু বডি .বজাৰত ধানৰ খেতি কৰে৷ এক বৃহৎ পদক্ষেপ নহঁলেও মই কম যে আৰক্ষীৰ দৰে বিভাগ এটাৰ বাবে এয়া এক ইতিবাচক সফলতা৷
যোৱাবাৰ খেতিত তেওঁলোকে প্ৰায় ৯ কুইণ্টল সৰিয়হ উৎপাদন কৰে লগতে ৫ কুইণ্টল ২৮ কেজি মাকৈ আৰু ৪ কুইণ্টল ৫৬ কেজি ধান উৎপাদন কৰে৷ এই সম্পূৰ্ণ ব্যৱস্থাটো স্বেচ্ছামূলকভাৱে নিৰীক্ষণ কৰি থকা মৰিগাঁও আৰক্ষীৰ এগৰাকী সহকাৰী সহ: পৰিদৰ্শক ভাৰত চন্দ্ৰ দাসে কয়, “আমি উৎপাদিত সৰিয়হ, মাকৈ আৰু ধান বিক্ৰী কৰি মুঠ ১,২৫,০৫৮ টকা লাভ কৰোঁ৷ এই ধন আমি আৰক্ষী গোট পুঁজিত জমা দিওঁ৷ উৎপাদিত শাক-পাচলিসমূহ আমি আৰক্ষী বেৰেক, ছাউনী আৰু জিলা বিষয়াসকলৰ মাজত বিলাই দিওঁ৷” তেওঁ লগতে কয়, “আমাৰ জোৱানসকলে আজৰি সময়ত এই খেতিৰ মাজত নিজকে ব্যস্ত ৰাখি যথেষ্ট ভাল পায়৷ ময়ো সময় পালেই খেতি চাবলৈ যাওঁ আৰু খেতিৰ মাজত সঁচাকৈ এক প্ৰশান্তি অনুভৱ কৰোঁ৷”
অপৰ্ণা নটৰাজনে কয়, “আমি ধান, সৰিয়হ, মাকৈ আদি বিক্ৰী কৰি পোৱা ধনৰ কিছু অংশৰ বিনিয়োগ কৰি পাম্প ছেট আৰু কিছুমান সা-সঁজুলি ক্ৰয় কৰি দিওঁ আৰু বড়িবজাৰৰ দ মাটিখিনিত প্ৰায় ৭ কুইণ্টল মাছৰ পোনা মেলি দিছোঁ৷ আৰক্ষীয়ে খেতি কৰাৰ এই ব্যৱস্থাটোৰ বাবে আমাৰ জোৱানসকলৰ মাজত যথেষ্ট উৎসাহ দেখা গৈছে৷”
ভাৰত চন্দ্ৰ দাসে কয়, “বড়িবজাৰৰ পুখুৰীত মাছৰ ওজন এতিয়া ১ কেজি পৰ্যন্ত হৈছেগৈ৷ ঔজাৰিত কেইবিঘামান মাটিত শালিধানৰ খেতি কৰা হৈছে৷ লগতে জাতিলাও, জিকা, ভোল, বেঙেনা, বিলাহীৰ খেতি কৰি থকা হৈছে৷ অলপ মাটিত আমি মিঠা প্ৰজাতিৰ এবিধ মাকৈৰ খেতি কৰিছোঁ৷”
এই ব্যৱস্থাটোৰ পৰিচালনাৰ দায়িত্বত থকা মৰিগাঁও আৰক্ষীৰ এগৰাকী কনিষ্টবল আখতাৰ হুছেইনে কয়,“আমাৰ এই কামটোত মৰিগাঁৱৰ কৃষি বিভাগেও যথেষ্ট সহায় কৰিছে৷ কেঁচুসাৰ বনোৱা, খেতিৰ বাবে প্ৰয়োজনীয় দিহা-পৰামৰ্শ আদি তেওঁলোকে প্ৰদান কৰিছে৷ লগতে ঔজাৰিত ছাউনীৰ আশে পাশে বসবাস কৰা বহু পৰিয়ালে প্ৰথম অৱস্থাত আমাক গোবৰ, নাঙল, কোৰ আদি প্ৰদান কৰি যথেষ্ট সহায় কৰিছে৷ আমিও এই উপকাৰৰ বিনিময়ত তেওঁলোকক আমাৰ উৎপাদিত শাক-পাচলি আদি দিছোঁ৷” তেওঁ উৎসাহিত হৈ কয়, “জোনবিল মেলা অনুষ্ঠিত হোৱা জিলাত এই বিনিময় প্ৰথাটো থাকিবই৷”
মৰিগাঁৱৰ এগৰাকী সহকাৰী কৃষি পৰিদৰ্শক দিব্যজ্যোতি হাজৰিকাই কয়, “আৰক্ষী বিভাগে এই কামটো কৰিবলৈ আগবাঢ়ি অহা দেখি ময়ো উৎসাহিত হৈ পৰিছোঁ৷ মই নিজেও মাজে মাজে এই খেতি পৰিভ্ৰমণ কৰি বিভিন্ন দিহা-পৰামৰ্শ আগবঢ়াওঁ৷ অসমৰ প্ৰায় সকলো জিলাতে বিভিন্ন বিভাগৰ নামত আবণ্টিত এনে বহু মাটি এনেয়ে পৰি আছে৷ পৰিকল্পিত ৰূপত স্বেচ্ছামূলকভাৱে সকলোৱে এনে পদক্ষেপ হাতত ল’ব পাৰে বুলি মই ভাবোঁ৷”
প্ৰায় জৈৱিক প্ৰক্ৰিয়াৰে আৰক্ষীয়ে কৰা এই খেতি মৰিগাঁৱত চৰ্চাৰ বিষয় হৈ পৰিছে৷ এনে ধৰণৰ প্ৰচেষ্টাই অৱশ্যেই এক ইতিবাচক বাৰ্তা দিবলৈ সক্ষম হৈছে৷
