যোৱা ২৬ অক্টোবৰত মুখ্যমন্ত্ৰী ড॰ হিমন্ত বিশ্ব শৰ্মাই মহান আহোম সেনাপতি লাচিত বৰফুকনৰ চাৰিশ সংখ্যক জন্মবাৰ্ষিকীৰ স’তে সংগতি ৰাখি lachitbarphukan.assam.gov.in শীৰ্ষক এটা প’ৰ্টেল আৰু লাচিত বৰফুকন (Lachit Barphukan) নামেৰে এটা এপ মুকলি কৰে৷ সেইদিনাই বিয়লি ১ বাজি ৩৪ মিনিটত মহান বীৰগৰাকীক স্মৰণ কৰি নিজৰ মনৰ ভাব ব্যক্ত কৰে নলবাৰী জিলাৰ তপন ডেকাই৷ তেওঁ বঙাইগাঁও জিলাৰ বইটামাৰী শিক্ষা খণ্ডত খণ্ড সমল ব্যক্তি (ভাষা) হিচাপে কৰ্মৰত৷
“তিনি মাহ পূৰ্বেই চৰকাৰৰ তৰফৰ পৰা এখন জাননী লাভ কৰিছিলোঁ৷ তাৰ লগত সংগতি ৰাখিয়েই বঙাইগাঁও জিলাতো এটা প’ৰ্টেল ডেভেলপ কৰা হৈছিল৷ তেতিয়াৰ পৰাই মই লাচিত বৰফুকনৰ বিষয়ে অধ্যয়ন কৰি মোৰ লেখাটো প্ৰস্তুত কৰিছিলোঁ৷ মুখ্যমন্ত্ৰী ড॰ হিমন্ত বিশ্ব শৰ্মাই প’ৰ্টেলটো মুকলি কৰাৰ লগে লগেই মই মোৰ প্ৰবন্ধটো প্ৰেৰণ কৰিছিলোঁ৷ আমাৰ পাঠ্যপুথিত যিহেতু লাচিত বৰফুকনৰ বিষয়ে সন্নিৱিষ্ট কৰা হোৱা নাছিল, সেইবাবে হাইস্কুলত পঢ়ি থাকোঁতে কেৱল পৰীক্ষাত ৰচনা লিখিবলৈহে তেওঁৰ বিষয়ে কিছু অধ্যয়ন কৰিছিলোঁ৷ ৰাজ্য চৰকাৰৰ এই পদক্ষেপটো গ্ৰহণ কৰাৰ খবৰ লাভ কৰি মই তেওঁৰ বিষয়ে ভালদৰে অধ্যয়ন কৰি প্ৰবন্ধটো প্ৰস্তুত কৰিলোঁ,” তপন ডেকাই অসম বাৰ্তাক কয়৷
ৰাজ্য চৰকাৰৰ এই পদক্ষেপক শলাগী তেওঁ লগতে কয়, “বীৰ লাচিতৰ লগতে অসমৰ আন আন বীৰ-শ্বহীদসকলৰ বিষয়েও পাঠ্যক্ৰমত সন্নিৱিষ্ট কৰিলে ছাত্ৰ-ছাত্ৰীসকল যথেষ্ট উপকৃত হ’ব৷ ভৱিষ্যৎ প্ৰজন্মই তেওঁলোকৰ বিষয়ে অধ্যয়ন কৰাৰ সুযোগ লাভ কৰিলেহে তেওঁলোকৰ মনত জাতীয়তাবোধ বা অসমৰ প্ৰতি প্ৰেম জাগ্ৰত হ’ব৷”
অসমৰ ইতিহাসত জিলিকি থকা লাচিত বৰফুকনৰ খ্যাতি ৰাজ্যৰ লগতে দেশ-বিদেশৰ অন্যান্য প্ৰান্ততো সমানেই বিয়পি আছে৷ উত্তৰ প্ৰদেশ নিবাসী ৰমেশ প্ৰসাদেও লাচিতৰ বিষয়ে নিজৰ মনৰ ভাব ব্যক্ত কৰি চৰকাৰে মুকলি কৰা প’ৰ্টেললৈ লিখি পঠিয়ায়৷ তেওঁ বৰ্তমান নতুন দিল্লীৰ এটা ব্যক্তিগত খণ্ডৰ প্ৰতিষ্ঠানত ক্লিনিকেল ডাটা মেনেজাৰ হিচাপে কৰ্মৰত৷ “মোৰ পত্নীয়ে প্ৰতিযোগিতামূলক পৰীক্ষাসমূহৰ বাবে প্ৰস্তুতি চলাই আছে৷ তেওঁ অসম বুৰঞ্জী অধ্যয়ন কৰোঁতে লাচিতৰ বিষয়ে অৱগত হৈছিল৷ মোৰ ভাতৃ অসমত বাস কৰে৷ তেওঁৰ পৰাই মই চৰকাৰে মুকলি কৰা প’ৰ্টেলটোৰ বিষয়ে জানিবলৈ পাইছিলোঁ৷ তাৰ পাছতেই মই পত্নীৰ সৈতে আলোচনা কৰি মহান বীৰগৰাকীৰ বিষয়ে মোৰ মনৰ ভাব লিখি পঠিওৱাৰ সিদ্ধান্ত গ্ৰহণ কৰোঁ৷ লাচিত বৰফুকন কেৱল অসমৰে নহয়, সমগ্ৰ ভাৰতবৰ্ষৰ বাবেই এক গৌৰৱ৷ অসম চৰকাৰৰ এই পদক্ষেপ সঁচাকৈয়ে প্ৰশংসনীয়৷ ইয়াৰ জৰিয়তে সমগ্ৰ বিশ্বৰ লোকসকলে বীৰ যোদ্ধাগৰাকীৰ বিষয়ে বিস্তৃতভাৱে জানিবলৈ সুযোগ লাভ কৰিব,” ৰমেশ প্ৰসাদে কয়৷
লাচিত প’ৰ্টেলটো পৰিচালনাৰ দায়িত্ব আছাম ইলেকট্ৰ’নিকছ ডেভেলপমেণ্ট ক’ৰ্প’ৰেশ্বন লিমিটেড চমুকৈ এমট্ৰনক প্ৰদান কৰা হৈছিল৷ প্ৰতিষ্ঠানটোৰ জ্যেষ্ঠ কাৰ্যবাহী বিষয়া ত্ৰৈলোক্য বৰকাকতীয়ে কয়, “এপটো পৰিচালনা কৰিবলৈ পোনপ্ৰথমে আমি ১.২ জিবিৰ এটা ব্যাণ্ডউইথ ব্যৱহাৰ কৰিছিলোঁ৷ প্ৰথমতে সকলো কাৰ্য সুকলমে সম্পন্ন হৈছিল যদিও এদিন অভাৱনীয় হাৰত এপ্লিকেশ্বন অহাত এপটোত কিছু সমস্যাৰ উদ্ভৱ হৈছিল৷ আমি ৰাইজৰ সুবিধাৰ্থে তৎমুহূৰ্ততে পূৰ্বৰ ব্যাণ্ডউইথ ৯ গুণ বৃদ্ধি কৰিলোঁ৷ ৰাইজৰ সঁহাৰিৰ প্ৰতি লক্ষ্য ৰাখি লেখাসমূহ পঠিওৱাৰ সময়সীমা পূৰ্বৰ নিৰ্ধাৰিত সময়তকৈ আৰু দুদিনলৈ বৃদ্ধি কৰা হৈছে৷”
মহাবীৰ লাচিত বৰফুকনৰ বিষয়ে নৱপ্ৰজন্মক অৱগত কৰোৱাৰ লগতে বিশ্বজুৰি তেওঁৰ কৰ্মৰাজিৰ বিষয়ে ৰাইজক সবিশেষ জনোৱাৰ উদ্দেশ্যৰে ৰাজ্য চৰকাৰে মুকলি কৰা লাচিত প’ৰ্টেল আৰু এপত মুঠ ৪৫,৩৪,৮১৮টা লেখা সন্নিৱিষ্ট হৈছে৷ ইয়াৰে ৬৫,৬৪২জন লোকে অনলাইন মাধ্যমত ৰচনা লিখাৰ বিপৰীতে ৪৪,৬৯,১৭৬জন লোকে কাগজত হাতেৰে লিখি ৰচনাসমূহ আপল’ড কৰিছে৷
উল্লেখ্য যে প্ৰবন্ধ জমা কৰাৰ ক্ষেত্ৰত নগাঁও জিলাই অভিলেখ সৃষ্টি কৰি শীৰ্ষস্থান দখল কৰিবলৈ সক্ষম হৈছে৷ জিলাখনৰ মুঠ ৩,৩৫,৭৬৬জন লোকে প’ৰ্টেলত নিজ নিজ ৰচনাসমূহ আপল’ড কৰিছে৷
