দিব্যাংগৰ জ্যোতিৰে উজলিল হাইস্কুল শিক্ষান্ত পৰীক্ষাৰ ফলাফল

ভাউৰী দেৱী চেৰাউগী শ্ৰৱণ বাধাগ্ৰস্ত চৰকাৰী উচ্চতৰ মাধ্যমিক বিদ্যালয়; গুৱাহাটী, শ্ৰীমন্ত শংকৰ মিশ্যন অন্ধ বিদ্যালয়; নগাওঁ, গুৱাহাটী দৃষ্টিহীন উচ্ছ মাধ্যমিক বিদ্যালয়, যোৰহাট দৃষ্টিহীন বিদ্যালয়কে আদি কৰি একাংশ বিশেষ বিদ্যালয়ত ৭ জুন ২০২২১ ৰাতিপুৱা ১০ বজাত এক উৎসৱমুখৰ পৰিৱেশে বিৰাজ কৰিছে৷ যদিও, এই বৰ্ষৰ হাইস্কুল শিক্ষান্ত পৰীক্ষাৰ সামূহিক ফলাফল যথেষ্ট সন্তোষজনক নহয়, তাৰ মাজতে কিন্তু ১০০% উত্তীৰ্ণৰ হাৰেৰে এই বিশেষ বিদ্যালয়কেইখনৰ নাম উজলি উঠিবলৈ সক্ষম হৈছে৷

দীপেশ, চালমা, লক্ষ্মণ, জোনমণিহতে তেওঁলোকৰ জীৱনৰ প্ৰথমটো গুৰুত্বপূৰ্ণ পৰীক্ষাত সফলতা লাভ কৰিবলৈ সক্ষম হৈছে৷ তেওঁলোকৰ এই সফলতা আন দহজন ছাত্ৰছাত্ৰীতকৈ সুকীয়া কাৰণ তেওঁলোকে বহুতো বাধা নেওচি এই সফলতা অৰ্জন কৰিছে৷ হয়, সফলতাৰ বাটত শাৰীৰিক প্ৰতিবন্ধকতা কেতিয়াও বাধাৰ প্ৰাচীৰ নহয়৷ ইচ্ছা, একাগ্ৰতা তথা নিৰলস সাধনা থাকিলে সকলো সম্ভৱ আৰু এই কথাকে প্ৰমাণ কৰি দেখুৱালে তেওঁলোকৰ লগতে আন একাংশ দিব্যাংগ শিক্ষাৰ্থীয়ে৷

ক’ভিড মহামাৰীৰ ভয়াবহতাৰ বাবে বিদ্যালয়সমূহৰ নিয়মীয়া পাঠদান ব্যাহত হৈছিল৷ সেইবাবে অন্যান্য বিদ্যালয়ৰ দৰেই এইসমূহ বিদ্যালয়ৰ শিক্ষক-শিক্ষয়িত্ৰীসকলেও অনলাইনযোগে পাঠদান কৰাৰ ব্যৱস্থা গ্ৰহণ কৰিছিল৷ সেই সময়ছোৱাত তেওঁলোকে যথেষ্ট প্ৰত্যাহবানৰ সন্মুখীন হৈছিল যদিও ছাত্ৰ-ছাত্ৰী, শিক্ষক-শিক্ষয়িত্ৰী তথা অভিভাৱকৰ নেৰানেপেৰা প্ৰচেষ্টা আৰু কষ্টৰ ফলত তেওঁলোকে এই সফলতা লাভ কৰিবলৈ সক্ষম হৈছে৷

“অসম চৰকাৰৰ সমাজ কল্যাণ বিভাগ, সৰ্বশিক্ষা অভিযানৰ লগতে বিদ্যালয়খনৰ এই সফলতাত ছাত্ৰ-ছাত্ৰী, শিক্ষক-শিক্ষয়িত্ৰী আৰু অভিভাৱকৰো যথেষ্ট সবল ভূমিকা আছে,” ভাউৰী দেৱী চেৰাউগী বিদ্যালয়ৰ শৈক্ষিক বিষয়া হেৰম্ব কুমাৰ দাসে কয়৷ “আমি লকডাউনৰ সময়ছোৱাত সাংকেতিক ভাষাৰ প্ৰয়োগেৰে প্ৰতিটো বিষয়ৰ পাঠসমূহৰ ভিডিঅ’ তৈয়াৰ কৰি শিক্ষাৰ্থীসকললৈ প্ৰেৰণ কৰাৰ লগতে লিখিত প্ৰতিলিপিসমূহ হোৱাটছ এপ যোগে প্ৰেৰণ কৰিছিলোঁ৷” বিদ্যালয়খনত শিক্ষাৰ্থীৰ সংখ্যা পূৰ্বৰ তুলনাত বৃদ্ধি হোৱা বাবে কিছু আন্তঃগাঁথনি উন্নীতকৰণৰ প্ৰয়োজন আছে বুলিও তেওঁ লগতে উল্লেখ কৰে৷

১৯৪৯ চনত স্থাপিত এই বিদ্যালয়খনৰ ছাত্ৰ দীপেশ চন্দ্ৰ ৰয়ে ২টা বিষয়ত লেটাৰসহ ষ্টাৰ মাৰ্ক লাভ কৰিবলৈ সক্ষম হৈছে৷ তেওঁ প্ৰাক-প্ৰাথমিক শ্ৰেণীৰ পৰাই বিদ্যালয়খনৰ ছাত্ৰাবাসত থাকি অধ্যয়ন কৰিছিল৷ দীপেশৰ মাতৃ অনিতা ৰয়ে পুত্ৰৰ এই সাফল্যত বিদ্যালয়খনৰ শিক্ষক-শিক্ষয়িত্ৰীৰ সম্পূৰ্ণ অৱদান আছে বুলি উল্লেখ কৰে৷ “চৰকাৰে দিব্যাংগ ছাত্ৰ-ছাত্ৰীসকলক উৎসাহ যোগাবলৈ বিভিন্ন নতুন পদক্ষেপ হাতত ল’লে দীপেশৰ দৰে আন দহজন ছাত্ৰ-ছাত্ৰীয়েও বিভিন্ন ক্ষেত্ৰত নিশ্চিতভাৱে নিজ প্ৰতিভা বিকাশ কৰিবলৈ সক্ষম হ’ব,” তেওঁ কয়৷

দীপেশৰ এগৰাকী সহপাঠী চালমা হকে ৰটা বিষয়ত লেটাৰসহ প্ৰথম বিভাগত উত্তীৰ্ণ হয়৷ বৰপেটা জিলাৰ কলগাছিয়াৰ বাসিন্দা চালমাই সুন্দৰ চিত্ৰও অংকন কৰে৷ তেওঁৰ পিতৃ পেচাত এজন গাড়ী চালক৷ চালমাৰ মাতৃ চাজেদা খাতুনে জীয়ৰীৰ এই সফলতাত বিদ্যালয়খনৰ শিক্ষক-শিক্ষয়িত্ৰীৰ যথেষ্ট অৰিহণা আছে বুলি উল্লেখ কৰে৷

উল্লেখ্য যে, বিদ্যালয়খনৰ আন এগৰাকী ছাত্ৰী আফৰিনা আহমেদ শেখে বয়ন আৰু বস্ত্ৰ আৰ্হি বিষয়ত ৰাজ্যৰ ভিতৰত সৰ্বোচ্চ নম্বৰ লাভ কৰিবলৈ সক্ষম হৈছে৷

গুৱাহাটী দৃষ্টিহীন উচ্চ মাধ্যমিক বিদ্যালয়ৰ অধ্যক্ষা নিৰুপমা ভট্টাচাৰ্যই কয়, “যিহেতু বিদ্যালয়খনৰ ছাত্ৰছাত্ৰীসকলক ব্ৰেইল পদ্ধতিৰে পাঠদান কৰা হয়, সেইবাবে ক’ভিড পৰিস্থিতিৰ বাবে আমি যথেষ্ট প্ৰত্যাহবানৰ সন্মুখীন হৈছিলো৷ সেই সময়ছোৱাত তেওঁলোকক হোৱাটছ এপ যোগে পাঠ্যপুথিৰ অধ্যায়সমূহৰ অডিঅ’ প্ৰেৰণ কৰি পাঠদান কৰা হৈছিল৷” শিক্ষক-শিক্ষয়িত্ৰী, ছাত্ৰ-ছাত্ৰী তথা অভিভাৱকসকলৰ যৎপৰোনাস্তি চেষ্টাৰ ফলত তেওঁলোকে এই সফলতা লাভ কৰিবলৈ সক্ষম হৈছে৷ “বিদ্যালয়খনৰ প্ৰাক্তন শিক্ষাৰ্থীসকলৰ ভাল ফলাফলেও তেওঁলোকক অনুপ্ৰাণিত কৰিছে,” ভট্টাচাৰ্যই লগতে জনায়৷

লক্ষ্মণ প্ৰসাদ মিশ্ৰই ৪টা বিষয়ত লেটাৰসহ মুঠ ৮০% নম্বৰ লাভ কৰি বিদ্যালয়খনলৈ গৌৰৱ কঢ়িয়াই আনিবলৈ সক্ষম হৈছে৷ তেওঁ উচ্চতৰ মাধ্যমিকত বিজ্ঞান শাখাত নামভৰ্তি কৰিবলৈ আগ্ৰহ প্ৰকাশ কৰিছে৷ “এজন দৃষ্টিহীন ছাত্ৰৰ বাবে বিজ্ঞান শাখাত অধ্যয়ন কৰাটো যথেষ্ট কঠিন৷ কিন্তু, এইক্ষেত্ৰত শিক্ষানুষ্ঠানৰ লগতে সমাজৰ অন্য লোকৰ পৰা পৰ্যাপ্ত সহায় সহযোগিতা লাভ কৰিলে নিশ্চিতভাৱে মই আগুৱাই যাবলৈ সক্ষম হ’ম,” লক্ষ্মণে অসম বাৰ্তাৰ আগত কয়৷

যোৰহাট দৃষ্টিহীন বিদ্যালয়ৰ জোনমণি দুৱৰাক সংগ দিবলৈ শ্ৰেণীত কোনো সহপাঠী নাছিল৷ তেওঁ এই বৰ্ষত বিদ্যালয়খনৰ পৰা হাইস্কুল শিক্ষান্ত পৰীক্ষাত অৱতীৰ্ণ হোৱা একমাত্ৰ ছাত্ৰী আছিল যদিও, তেওঁৰ ফলাফলত ইয়াৰ কোনো প্ৰভাৱ পৰা নাছিল৷ জোনমণিয়ে ২টা বিষয়ত লেটাৰসহ ষ্টাৰ মাৰ্ক লাভ কৰি বিদ্যালয়খনলৈ গৌৰৱ কঢ়িয়াই আনিবলৈ সক্ষম হৈছে৷
নগাঁৱৰ শ্ৰীমন্ত শংকৰ মিশ্যন অন্ধ বিদ্যালয়তো ফলাফলৰ ক্ষেত্ৰত একেই প্ৰতিচ্ছবি দেখিবলৈ পোৱা যায়৷ এইবাৰ হাইস্কুল শিক্ষান্ত পৰীক্ষাত অৱতীৰ্ণ হোৱা দুয়োগৰাকী শিক্ষাৰ্থীয়ে সুখ্যাতিৰে উত্তীৰ্ণ হৈ বিদ্যালয়খনলৈ সুনাম কঢ়িয়াই আনিছে৷ এইসমূহ শিক্ষাৰ্থীৰ লগতে শাৰীৰিক প্ৰতিবন্ধকতা নেওচি কঠোৰ পৰিশ্ৰম আৰু অধ্যৱসায়ৰ ফলত সফলতা অৰ্জন কৰা প্ৰতিজন ছাত্ৰ-ছাত্ৰী এতিয়া আন দহজনৰ বাবে এক প্ৰেৰণাৰ উৎস হৈ পৰিছে৷

ছেবাৰ অধীনত থকা মুঠ বিদ্যালয় : ৭,০১৬
বিশেষ বিদ্যালয় : ৬ (৪ খন চৰকাৰী, ২খন বেচৰকাৰী)
পৰীক্ষাত অৱতীৰ্ণ মুঠ দিব্যাংগ শিক্ষাৰ্থী : ৫৭৪
পৰীক্ষাত উত্তীৰ্ণ মুঠ দিব্যাংগ শিক্ষাৰ্থী : ৪৪৭