প্ৰায় তিনি সপ্তাহ পূৰ্বে অসমত কৰ্মৰত ভাৰতীয় লোকসেৱা আয়োগৰ এগৰাকী বিষয়াই মুখ্যমন্ত্ৰীৰ কাৰ্যালয়ৰ পৰা এখন বিশেষ পত্ৰ লাভ কৰে৷ এই পত্ৰখনত আছিল মন্ত্ৰী আৰু জ্যেষ্ঠ বিষয়াসকলক একেখন মঞ্চত একগোট কৰিবলৈ আয়োজন কৰা ‘চিন্তন শিবিৰ’ৰ বিশদ বিৱৰণ৷ এই সংগমৰ লক্ষ্য আৰু উদ্দেশ্য হৈছে ২০২৬ চনলৈকে এক ইতিবাচক দৃষ্টিভংগী নিৰ্ধাৰণ কৰা, যেতিয়া বৰ্তমানৰ চৰকাৰখনে নিজৰ পাঁচ বছৰীয়া কাৰ্যকাল সম্পূৰ্ণ কৰিব৷ পত্ৰখনৰ অন্তৰ্নিহিত বাৰ্তাটো আছিল ‘লক্ষ্য ২০২৬’ত উপনীত হ’বলৈ প্ৰতিটো বিভাগে নিজৰ ৰণনীতি আৰু কাৰ্যপন্থা বিতংকৈ উল্লেখ কৰিব লাগিব৷ বিজ্ঞপ্তিখনত উল্লেখ আছিল যে প্ৰক্ৰিয়াগত আৰু অন্যান্য অৱৰোধসমূহ আঁতৰ কৰিবলৈ এক পৰিকল্পিত দৃষ্টিভংগীৰ প্ৰয়োজন হ’ব৷
চিন্তন শিবিৰত অংশগ্ৰহণ কৰা এই বিষয়াগৰাকীয়ে অসম বাৰ্তাক কয়, “আমি ইয়াত উপস্থিত থাকিবলৈ পাই অত্যন্ত আনন্দিত হৈছোঁ৷ আমি বিজ্ঞপ্তিখন লাভ কৰাৰ ডেৰ সপ্তাহৰ ভিতৰত এটা দল গঠন কৰি লওঁ৷ আমাৰ নিজৰ নিজৰ বিভাগসমূহত যোৱা পাঁচ বছৰে হোৱা কামৰ অগ্ৰগতিৰ বুজ ল’বলৈ ইজনে সিজনৰ লগত সমন্বয় স্থাপন কৰোঁ৷ আমি যোৱা পাঁচ বছৰে দেশৰ শীৰ্ষ পাঁচ ৰাজ্যৰ তুলনাত নিৰ্দিষ্ট কিছুমান প্ৰদৰ্শনৰ ওপৰত ভিত্তি কৰি নিজকে মূল্যাংকন কৰোঁ আৰু ২০২৬ চনলৈকে আমি কি লক্ষ্য পূৰণ কৰিবলৈ বিচাৰোঁ তাক স্থিৰ কৰি লওঁ৷”
২৪ৰ পৰা ২৬ ছেপ্টেম্বৰলৈ আয়োজন কৰা এই তিনিদিনীয়া শিবিৰ হৈ পৰিছিল আধ্যাত্মিকতা, আত্মীয়তা আৰু ভৱিষ্যৎমুখী চিন্তা-চৰ্চাৰ সংগমস্থলী৷ এই শিবিৰত অংশগ্ৰহণ কৰা মন্ত্ৰী, জনপ্ৰতিনিধি তথা অধিকাৰীসকলৰ হৃদয়-মন প্ৰশান্তিৰে ভৰাই তোলে জগ্গী বাসুদেৱ (সদগুৰু) আৰু শ্ৰীশ্ৰী ৰবি শংকৰৰ দৰে আধ্যাত্মিক গুৰুৱে৷ বহুকেইগৰাকী কেবিনেট মন্ত্ৰীয়ে এই বিশেষ অনুষ্ঠানৰ উচ্চ প্ৰশংসা কৰে৷
আধ্যাত্মিকতা এই শিবিৰৰ কেৱল এটা অংশহে আছিল৷ এই গুৰুত্বপূৰ্ণ শিবিৰত অন্ধ্ৰ প্ৰদেশ, উত্তৰ প্ৰদেশ, কৰ্ণাটকৰ শীৰ্ষ আমোলাসকলৰ লগতে প্ৰধানমন্ত্ৰীৰ অৰ্থনৈতিক উপদেষ্টা পৰিষদৰ অধ্যক্ষ বিবেক দেবৰয়কে আদি কৰি প্ৰধানমন্ত্ৰী কাৰ্যালয়ৰ বিষয়ববীয়াসকল উপস্থিত আছিল৷ দেবৰয়ে বিষয়া তথা নীতি নিৰ্ধাৰকসকলৰ সৈতে এক বিশেষ বৈঠকত অংশ লয় আৰু অসমক ৰাজ্যৰ শীৰ্ষ পাঁচখন ৰাজ্যৰ অন্যতম কৰি তোলাৰ বাবে মুখ্যমন্ত্ৰীগৰাকীয়ে লোৱা সংকল্পক সাৰ্থক কৰি তুলিবলৈ কিছুমান বিশেষ পন্থাৰ বিষয়ে আলোচনা কৰে৷ আমোলাসকলে এই বৈঠকসমূহৰ ইতিবাচক ফলাফলৰ সম্ভাৱনীয়তাক যথেষ্ট প্ৰশংসা কৰে৷
আন এগৰাকী জ্যেষ্ঠ বিষয়াই অসম বাৰ্তাক কয়, “আন আন বিষয়া তথা মন্ত্ৰীসকলৰ সৈতে সময় অতিবাহিত কৰি আমি এক অনন্য অভিজ্ঞতা লাভ কৰিলোঁ৷ বিশেষকৈ সামূহিক আৰু আন্তঃবিভাগীয় সহযোগিতা তথা সমন্বয়ৰ প্ৰয়োজন হোৱা বিষয়বোৰৰ ক্ষেত্ৰত চিন্তা-চৰ্চা কৰাটো এটা গুৰুত্বপূৰ্ণ দিশ আছিল৷” তেওঁ কয় যে নিজৰ লক্ষ্য আৰু অগ্ৰাধিকাৰ সম্পৰ্কে চৰকাৰখনৰ স্থিতি স্পষ্ট হৈ আছে৷
“বৈঠকসমূহত প্ৰয়োজনীয় সম্পদ আৰু সীমাবদ্ধতা আদি সম্পৰ্কেও আলোচনা কৰা হৈছিল৷ আমি এই শিবিৰক কাৰ্য পৰিকল্পনা ৰূপায়ণৰ মঞ্চৰূপেও অভিহিত কৰিব পাৰোঁ৷”
এগৰাকী বিষয়াই লগতে পৰামৰ্শ আগবঢ়ায় যে এনে ধৰণৰ সমাৱেশৰ বাবে এই সময়সূচী অলপ দীঘলীয়া হোৱাৰ প্ৰয়োজন আৰু এনে অনুষ্ঠানত পৰিয়ালৰ সদস্যকো অন্তৰ্ভুক্ত কৰিব পৰা যায়৷
মন্ত্ৰীসকলৰ লগতে মুখ্যমন্ত্ৰীৰ সৈতে অনানুষ্ঠানিক বৈঠকৰ জৰিয়তে এনে শিবিৰক আৰু অধিক আত্মীয়তাপূৰ্ণ কৰি তুলিব পাৰি৷
Caption: চিন্তন শিবিৰত কেইবাগৰাকী কেবিনেট মন্ত্ৰী আৰু জ্যেষ্ঠ আমোলাই (ওপৰৰ ছবিত) অংশগ্ৰহণ কৰিছে
