মুখ্যমন্ত্ৰী ড° হিমন্ত বিশ্ব শৰ্মাৰ ভাষ্য অনুসৰি চৰকাৰে ৰাজ্যখনৰ গ্ৰাম্য অৰ্থনীতিৰ বিকাশ, খিলঞ্জীয়া লোকসকলক ভূমি-অধিকাৰ প্ৰদান আৰু চাহ বাগিচাৰ শ্ৰমিকসকলৰ কল্যাণৰ হকে কাম কৰাৰ লগতে হিতাধিকাৰীসকলৰ বাবে আঁচনিসমূহৰ উপলভ্যতা নিশ্চিত কৰাৰ ওপৰত গুৰুত্ব আৰোপ কৰিছে৷
কাৰ্বি আংলঙৰ ডিফুত ৰাজ্যিক বিজেপিৰ কাৰ্যনিৰ্বাহক সভাত ভাষণ প্ৰদান কৰি ড° শৰ্মাই কয় যে ধান ক্ৰয়ৰ জৰিয়তে যোৱা এবছৰত ৰাজ্যখনৰ অৰ্থনীতিলৈ ৮০০ কোটিৰো অধিক টকা সঞ্চাৰিত হৈছে৷ তেওঁ কয় যে চৰকাৰে ২৪ লাখ মেট্ৰিক টন ধান ক্ৰয়ৰ জৰিয়তে গ্ৰাম্য অৰ্থনীতিলৈ ৫, ০০০ কোটি টকা সঞ্চাৰিত কৰাৰ লক্ষ্যও নিৰ্ধাৰণ কৰিছে৷
তেওঁ কয় যে ৰাজ্য চৰকাৰে বৰ্তমানৰ ১৪ লাখ কৃষকৰ পৰা বৃদ্ধি কৰি ২৭ লাখ কৃষকক প্ৰধানমন্ত্ৰী কৃষক সন্মান নিধিৰ পৰিধিলৈ অনাৰ এক অভিলাষী পৰিকল্পনা কৰিছে৷ এই আঁচনিৰ অধীনত, এজন কৃষকে তিনিটা সমান কিস্তিত ৬০০০ টকা সাহায্য হিচাপে লাভ কৰিব৷
লগতে, মুখ্যমন্ত্ৰীগৰাকীয়ে অৰুণোদয় আঁচনিৰ অধীনত ২৭ লাখ মহিলালৈ পূৰ্বৰ ১০০০ টকাৰ পৰা বৃদ্ধি কৰি মাহিলি ১২৫০ টকাকৈ প্ৰত্যক্ষ লাভালাভ স্থানান্তৰ কৰাৰ চৰকাৰৰ প্ৰতিশ্ৰুতিৰ কথা দোহাৰে৷
তেওঁ কয় যে অতি সোনকালেই চৰকাৰৰ ঋণ ৰেহাই আঁচনিৰ জৰিয়তে আৰু পাঁচ লাখ মহিলা লাভান্বিত হ’ব৷ “আমাৰ লক্ষ্য হৈছে ২৭ লাখ মহিলাক ঋণমুক্ত কৰা”, তেওঁ দলৰ সহকৰ্মীসকলক জনায়৷
মুখ্যমন্ত্ৰীয়ে কয় যে অসম চৰকাৰৰ অন্যতম অগ্ৰাধিকাৰ হৈছে দীৰ্ঘদিন ধৰি অৱহেলিত চাহ বাগিচাৰ শ্ৰমিকসকলৰ সবলীকৰণ৷ “বৰ্তমানলৈকে কেৱল বাগিচাৰ স্বত্বাধিকাৰীহে চাহ বাগিচাৰ ভূমি অধিগ্ৰহণৰ বাবে ক্ষতিপূৰণ লাভ কৰা একমাত্ৰ হিতাধিকাৰী হৈ আহিছে৷ কিন্তু, এতিয়া আমি ক্ষতিগ্ৰস্ত বাগিচাসমূহৰ শ্ৰমিকসকলকো ক্ষতিপূৰণৰ এটা অংশ প্ৰদান কৰাৰ সিদ্ধান্ত গ্ৰহণ কৰিছোঁ,” মুখ্যমন্ত্ৰীগৰাকীয়ে কয়৷
তেওঁ অসমক বিদ্যুৎ উৎপাদনৰ ক্ষেত্ৰত আত্মনিৰ্ভৰশীল কৰাৰ কথা উল্লেখ কৰে৷ “আমি অহা চাৰি বছৰত বিদ্যুৎ উৎপাদন বৰ্তমানৰ ৫০০ মেগাৱাটৰ পৰা ২, ০০০ মেগাৱাটলৈ বৃদ্ধি কৰাৰ লক্ষ্য নিৰ্ধাৰণ কৰিছোঁ৷ আমি মুলতঃ সেউজ শক্তিৰ ওপৰত গুৰুত্ব প্ৰদান কৰিম,” ড° হিমন্ত বিশ্ব শৰ্মাই কয়৷
মুখ্যমন্ত্ৰীয়ে কয় যে নৱম শ্ৰেণীৰ পৰা দ্বাদশ শ্ৰেণীলৈকে অধ্যয়নৰত যোগ্য শিক্ষাৰ্থীসকলে মিছন ভূমিপুত্ৰৰ অধীনত তেওঁলোকৰ বিদ্যালয়তে জাতিগত প্ৰমাণপত্ৰ লাভ কৰিব৷
ৰাজ্য চৰকাৰে গাঁওসমূহত পানীৰ সংযোগ পৰীক্ষা কৰিবলৈ মাহিলী ৬,৫০০ টকা পাৰিশ্ৰমিক প্ৰদানেৰে ২৬,০০০ গৰাকী ‘জল মিত্ৰ’ নিয়োগ কৰিব৷
মুখ্যমন্ত্ৰীগৰাকীয়ে লগতে উল্লেখ কৰে যে চৰকাৰে মিছন বসুন্ধৰা-১ৰ অধীনত ৭ লাখ পৰিয়ালৰ ভূমি সম্পৰ্কীয় সমস্যাৰ সমাধান কৰিছে৷ “মিছন বসুন্ধৰা-২ ৰ জৰিয়তে আমি ৰাজ্যখনৰ খিলঞ্জীয়া লোকসকলৰ ভূমিৰ অধিকাৰ সুনিশ্চিত কৰিম”, তেওঁ দলৰ সতীৰ্থসকলক কয়৷
- ৰাজ্য চৰকাৰে ২৭ লাখ কৃষকক প্ৰধানমন্ত্ৰী কৃষক সন্মান নিধিৰ পৰিধিলৈ অনাৰ পৰিকল্পনা কৰিছে
- চৰকাৰে ২৪ লাখ মেট্ৰিক টন ধান ক্ৰয়ৰ জৰিয়তে গ্ৰাম্য অৰ্থনীতিলৈ ৫, ০০০ কোটি টকা সঞ্চাৰিত কৰাৰ লক্ষ্য নিৰ্ধাৰণ কৰিছে
- অৰুণোদয় আঁচনিৰ অধীনত মাহিলী ১২৫০ টকালৈ বৃদ্ধি কৰি ২৭ লাখ মহিলালৈ প্ৰত্যক্ষ লাভালাভ স্থানান্তৰ কৰাৰ লক্ষ্য নিৰ্ধাৰণ কৰিছে
- চৰকাৰৰ লক্ষ্য হৈছে ২৭ লাখ মহিলাক মাইক্ৰ’ফাইনেন্স ঋণ মাফ আঁচনিৰ সুবিধা প্ৰদান কৰা
- ৰাজ্য চৰকাৰে মাহিলী ৬, ৫০০ টকা পাৰিশ্ৰমিক প্ৰদানেৰে ২৬, ০০০ গৰাকী ‘জল মিত্ৰ’ নিয়োগ কৰিব
