২৪ মে’, ২০২২, পুৱা ৬ বাজিছে৷ মায়ং আঞ্চলিক মহাবিদ্যালয়ৰ অসমীয়া বিভাগৰ সহকাৰী অধ্যাপক চাৰুপ্ৰভা চলিহা হাতীভাঙ্গী মধ্য ইংৰাজী বিদ্যালয়লৈ যাবলৈ সাজু৷ ভাতৃৰ সৈতে মটৰচাইকেলেৰে প্ৰায় ৪ কিল’মিটাৰ যোৱাৰ পাছত পকৰীয়া নৈৰ তেতেলীয়া ঘাট৷ দলংখনৰ কাম সম্পূৰ্ণ নোহোৱাৰ বাবে নাৱেৰে নৈখন পাৰ কৰি আৰু তিনি কিল’মিটাৰ বাট মথাউৰিৰ ওপৰৰে গৈ এখন সাঁকো পাৰ হৈ হাতীভাঙ্গী মধ্য ইংৰাজী বিদ্যালয়ত তেওঁ উপস্থিত হয় ঠিক ৮ বাজি ১৫ মিনিটত৷
বান আশ্ৰয় শিবিৰত থকা বিদ্যালয়খনৰ অষ্টম শ্ৰেণীৰ ছাত্ৰী সুপৰ্ণা বিশ্বাসে আকৌ পুৱা ৩ বাজি ৪৫ মিনিটতে শোৱাপাটী এৰি, গা-পা ধুই ধূপ-ধূনা জ্বলাই সাজু৷ এইকেইদিন তাই সোনকালেই সাৰ পাইছে, কাৰণ পঢ়া-শুনা অলপ বেছিকৈ কৰিবলগীয়া হৈছে৷ সুপৰ্ণা সেইদিনা পুৱা ৭ বজাতে বিদ্যালয়ত গৈ উপস্থিত হয়৷ এক বিশেষ উদ্দেশ্যত তেওঁলোক দুয়ো একেলগে কিছু সময় অতিবাহিত কৰিব৷ কাৰণ, চাৰুপ্ৰভা চলিহা হৈছে বিদ্যালয়খনৰ বহিৰ্মূল্যায়ক৷ আনহাতে সুপৰ্ণাই শিক্ষা বিভাগে আয়োজন কৰা গুণোৎসৱৰ অনুশীলনৰ ভিত্তিত বিদ্যালয়খনক প্ৰতিনিধিত্ব কৰি তেঁওৰ প্ৰশ্নৰ উত্তৰ দিব লাগিব৷
অসমৰ প্ৰায় ৪৬,০০০খন চৰকাৰী/প্ৰাদেশিকীকৃত/চাহ বাগিচাৰ অধীনস্থ বিদ্যালয়ৰ নৱম শ্ৰেণীলৈকে অধ্যয়নৰত ৪২ লাখতকৈও অধিক শিক্ষাৰ্থীৰ শিক্ষাৰ মান মূল্যাংকন কৰিবলৈ ৩টা পৰ্যায়ত গুণোৎসৱ অনুষ্ঠিত কৰা হৈছে৷ ইয়াৰে প্ৰথম দুটা পৰ্যায় ইতিমধ্যে সম্পূৰ্ণ হৈছে আনহাতে, তৃতীয়টো পৰ্যায় পৰৱৰ্তী মাহৰ প্ৰথম সপ্তাহত অনুষ্ঠিত হ’ব৷
অসম বাৰ্তাৰ সৈতে হোৱা বাৰ্তালাপত চাৰুপ্ৰভা চলিহাই কয়, “শিক্ষাৰ্থী, অভিভাৱক আৰু পৰিচালনা সমিতিৰ উৎসাহ দেখি মই অভিভূত হৈ পৰিছোঁ৷ প্ৰতিকূল বতৰকো নেওচি বিদ্যালয়খনত ১০০% ছাত্ৰ-ছাত্ৰী উপস্থিত হৈছে৷ বিদ্যালয়সমূহৰ শিক্ষাৰ সামগ্ৰিক প্ৰতিচ্ছবিখনক লৈ মই সুখী৷”
“কেৱল এইখন বিদ্যালয়েই নহয়, অঞ্চলটোত বান পৰিস্থিতিৰ মাজতো মোৰ সমল কেন্দ্ৰৰ প্ৰায়কেইখন বিদ্যালয়তে গুণোৎসৱৰ সফল ৰূপাযণৰ বাবে কৰ্তৃপক্ষই সকলো ব্যৱস্থা কৰিছে৷ মূল্যায়নৰ জৰিয়তে বিদ্যালয়সমূহৰ শিক্ষাৰ দিশ উন্নত কৰাৰ ক্ষেত্ৰত গুণোৎসৱ সফল হৈছে”, হাতীভাঙ্গীৰ মণ্ডল সমল কেন্দ্ৰ সমন্বয়ক তথা গুণোৎসৱৰ লায়েচন (LIAISON) বিষয়া গম্ভীৰ ডেকাই অসম বাৰ্তাক কয়৷
হাতীভাঙ্গী মণ্ডল সমল কেন্দ্ৰৰ ১নং মূৰকটা প্ৰাথমিক বিদ্যালয়ৰ বহিৰ্মূল্যায়ক তথা নাৰেংগী আঞ্চলিক মহাবিদ্যালয়ৰ গণিত বিভাগৰ সহকাৰী অধ্যাপক মৃণাল শৰ্মাই গুণোৎসৱে ৰাজ্যখনৰ শিক্ষক আৰু ছাত্ৰ-ছাত্ৰীৰ মাজত শিক্ষাৰ মান উন্নত কৰাৰ প্ৰতি এক দায়িত্ববোধ গঢ়ি তোলাৰ বাবে সুখ অনুভৱ কৰে৷
মৰিগাঁৱৰ পৰা বহু নিলগত কৰিমগঞ্জ জিলাৰ এখন বিদ্যালয় হৈছে বিৰজা সুন্দৰী ছোৱালী উচ্চ মাধ্যমিক বিদ্যালয়৷ নেৰানেপেৰা বৰষুণৰ পাছতো ৭৬ বছৰ পুৰণি এই বিদ্যালয়খনৰ ৩৫০গৰাকী ছাত্ৰ-ছাত্ৰীৰ এশ শতাংশই মূল্যায়নৰ সময়ত উপস্থিত আছিল৷ বিদ্যালয়খনৰ বহিৰ্মূল্যায়ক তথা অসম চৰকাৰৰ অতিৰিক্ত পিচিচিএফ, আই এফ এছ বিষয়া কে এছ পি ভি পৱন কুমাৰে বিদ্যালয়খনৰ আৰু পৰিচালনা সমিতিৰ প্ৰশংসা কৰি কয় যে, শিক্ষক আৰু ছাত্ৰ-ছাত্ৰীৰ মাজত থকা উৎসাহ শলাগিবলগীয়া৷
তেখেতে লগতে কয়, “গুণোৎসৱে ৰাজ্যখনৰ চৰকাৰী বিদ্যালয়সমূহত শৈক্ষিক পৰিৱেশৰ প্ৰকৃত ছবিখন তুলি ধৰাত সহায় কৰে৷ তদুপৰি, ই বিষয়াসকলক তেওঁলোকৰ স্কুলীয়া দিনৰ স্মৃতি ৰোমন্থন কৰাত আৰু ইতিবাচক বাৰ্তালাপৰ জৰিয়তে বিদ্যালয়ৰ শিক্ষাৰ্থীসকলক অনুপ্ৰাণিত কৰে৷ এনে এক আশাশুধীয়া প্ৰয়াসৰ বাবে মুখ্যমন্ত্ৰী ডাঙৰীয়াক ধন্যবাদ জনাইছোঁ৷”
শিৱসাগৰৰ খেলুৱা শিক্ষাখণ্ডৰ আলিমূৰ জ্ঞানোদয় উচ্চ মাধ্যমিক বিদ্যালয়ৰ প্ৰধান শিক্ষক মাণিক চেতিয়াই জনায়, “গুণোৎসৱৰ কাৰণে বিদ্যালয়খনে নতুন ৰূপ পাইছে৷ এই বছৰ আমি বিদ্যালয়খনত বহু নতুন ব্যৱস্থা হাতত লৈছোঁ৷ আমি ছাত্ৰীৰ ঋতুস্ৰাৱ ব্যৱস্থাপনা কক্ষটো অত্যাধুনিক কৰি তুলিছোঁ, জীৱন কৌশল শিক্ষা আৰু দুৰ্যোগ ব্যৱস্থাপনা শিক্ষা আদি অন্তৰ্ভুক্ত কৰিছোঁ৷”
মুখ্যমন্ত্ৰী ড॰ হিমন্ত বিশ্ব শৰ্মাই যোৱা ১১ মে’ত দৰং জিলাৰ ছিপাঝাৰ শিক্ষাখণ্ডৰ অন্তৰ্গত ঘোঁৰাবান্ধা নিম্ন বুনিয়াদী প্ৰাথমিক বিদ্যালয়ত গুণোৎসৱ-২০২২ৰ শুভাৰম্ভণি কৰে, য’ত তেখেতক এগৰাকী শিক্ষকৰ ৰূপত দেখা পোৱা গ’ল৷
প্ৰথম পৰ্যায়ত ১০খন জিলাত মুঠ ১৫,৩১৩খন বিদ্যালয়ত গুণোৎসৱৰ দুই তৰপীয়া মুল্যাংকন ব্যৱস্থা ৰূপায়ণ কৰা হয়, প্ৰতিকূল বতৰকো নেওচি দ্বিতীয় পৰ্যায়ত ৯খন জিলাৰ ১৩,৭৯৯খন বিদ্যালয়ত গুণোৎসৱ অনুষ্ঠিত কৰা হয়৷
