এখন বাজেটে বছৰটোৰ বাবে প্ৰস্তাৱিত ৰাজহ আৰু ব্যয়ৰ পৰিসংখ্যা প্ৰদান কৰাৰ সমান্তৰালকৈ ইয়াৰ সামগ্ৰিক উদ্দেশ্যৰ বিষয়েও ৰাইজলৈ এটা বাৰ্তা প্ৰেৰণ কৰে৷ ২০২৩-২৪ বিত্তীয় বৰ্ষৰ অসম বাজেটে সামাজিক খণ্ড আৰু আন্তঃগাঁথনি নিৰ্মাণত নতুনকৈ গুৰুত্ব প্ৰদানৰ লগতে¸ পূৰ্বতে ঢুকি নোপোৱা অঞ্চলসমূহতো বিভিন্ন অনুষ্ঠান-প্ৰতিষ্ঠান স্থাপন কৰি সম উন্নয়নৰ বাট মুকলি কৰিছে৷ বিত্তমন্ত্ৰী শ্ৰীমতী অজন্তা নেওগৰ বাজেট ভাষণ অধ্যয়ন কৰিলে তেওঁ উল্লেখ কৰা এটা কথাত চকু পৰিব- “উন্নয়ন হৈছে দৰিদ্ৰতা, নিবনুৱা সমস্যা দূৰীকৰণেৰে এখন সমতাপূৰ্ণ সমাজ গঢ়ি তোলা৷”
জনমূৰি আয়ৰ ক্ষেত্ৰত শীৰ্ষস্থানত উপনীত হ’বলৈ ৰাজ্যখন দ্ৰুতগতিত আগুৱাই যাব লাগিব৷ বিগত কেইবছৰমানত দেখিবলৈ পোৱা উন্নত মুঠ ৰাজ্যিক ঘৰুৱা উৎপাদনৰ জৰিয়তে আমি সেই স্থানত উপনীত হ’বলৈ সক্ষম যেন বোধ হয়৷ এই দিশটোৰ উপৰি আমি সমাজৰ আৰ্থিকভাৱে দুৰ্বল শ্ৰেণীৰ শিক্ষা, স্বাস্থ্য আৰু কল্যাণৰ দিশত অধিক গুৰুত্ব প্ৰদান কৰিব লাগিব যি এই বাজেটখনতো প্ৰতিফলিত হৈছে৷ শিক্ষাখণ্ডত প্ৰায় ২০,০০০ কোটি টকা আবণ্টন আৰু স্বাস্থ্যখণ্ডত কেইবাখনো আঁচনিৰ সূচনাৰে প্ৰত্যক্ষ লাভালাভ স্থানান্তৰ প্ৰক্ৰিয়া শক্তিশালী কৰি দৰিদ্ৰতা আৰু বৈষম্যৰ বিৰুদ্ধে সবল পদক্ষেপ লোৱা দেখা গৈছে৷ আন্তঃগাঁথনি নিৰ্মাণ, অতি ক্ষুদ্ৰ, ক্ষুদ্ৰ আৰু মজলীয়া উদ্যোগ (এম এছ এম ই) আৰু অন্যান্য উপাৰ্জন সৃষ্টিকাৰী/স্ব-নিয়োজন আঁচনিৰ শিতানত কৰা ব্যয়ে নিযুক্তিৰ সুযোগ সৃষ্টি কৰিব৷
পথ আৰু দলং নিৰ্মাণৰ ক্ষেত্ৰত বাজেটখনে প্ৰদান কৰা গুৰুত্ব প্ৰশংসনীয়৷ এই পথসমূহৰ নিৰ্মাণকাৰ্য সঠিকৰূপত সম্পাদন কৰিলে দৰিদ্ৰতা আৰু নিবনুৱা সমস্যাও ক্ৰমাগতভাৱে হ্ৰাস পাব৷ উন্নত বাট-পথৰ কাষত বাস কৰা লোকসকলৰ মাজত সাধাৰণতে দৰিদ্ৰতা দেখা নোপোৱা কথাষাৰ সত্য যেন অনুভৱ হয়, কিয়নো উন্নত বাট-পথে উপাৰ্জনৰ পৰ্যাপ্ত সুযোগ-সুবিধা প্ৰদান কৰে৷ পথ নিৰ্মাণৰ জৰিয়তে দূৰত্ব আৰু ভ্ৰমণৰ সময় বহু পৰিমাণে হ্ৰাস কৰিব পাৰি- এই কথা চৰকাৰখনে উপলব্ধি কৰিছে৷ ব্ৰহ্মপুত্ৰৰ ওপৰত দলং দুখন সম্পূৰ্ণ হৈ উঠিলে গুৱাহাটীৰ যান-জঁটো হ্ৰাস পাব৷ এনেধৰণৰ কৌশলগত আন্তঃগাঁথনি নিৰ্মাণে কম সময়ৰ ভিতৰতে সুদূৰপ্ৰসাৰী প্ৰভাৱ পেলাব পাৰে৷
হাজাৰ হাজাৰ নতুন উদ্যমী সৃষ্টিৰ বাবে, এই বাজেটখনে যুৱপ্ৰজন্ম আৰু মহিলাসকলৰ বাবেও বিভিন্ন ব্যৱস্থা কৰিছে৷ কেন্দ্ৰই আত্মসহায়ক গোটসমূহক শক্তিশালী কৰাৰ বাবে পদক্ষেপ গ্ৰহণ কৰাৰ লগতে ৰাজ্য চৰকাৰেও বহুতো মহিলাক মাইক্ৰ’ফাইনেন্সৰ ঋণৰ বোজাৰপৰা মুক্ত কৰাৰ দিশত এখোজ দুখোজকৈ আগবাঢ়িছে৷ চৰকাৰে একে সময়তে আত্মসহায়ক গোটৰ সদস্যসকলক ব্যৱসায় স্থাপনত সহায়-সহযোগিতা আগবঢ়োৱাৰ প্ৰতিশ্ৰুতি দিছে৷ উৎপাদকসকলক সহায় কৰিবলৈ এনে বহুতো গোট বিপণন আৰু সেৱাখণ্ডত আছে৷ আন বহুকেইখন ৰাজ্যৰ দৰে অসমতো বিপণনৰ ক্ষেত্ৰত অধিক গুৰুত্ব প্ৰদান কৰাটো প্ৰয়োজনীয়৷
ছিংগাপুৰস্থিত আই টি ই ই এছৰ সহযোগত যুৱক-যুৱতীসকলৰ দক্ষতা বিকাশৰ প্ৰচেষ্টাই ইতিমধ্যে বৃহৎ অগ্ৰগতি লাভ কৰিছে৷ মঙলদৈত আৰম্ভ হ’বলগীয়া দক্ষতা বিশ্ববিদ্যালয় কাৰ্যক্ষম হৈ উঠাৰ লগে লগে ৰাজ্যখনত এচাম সুদক্ষ মানৱ সম্পদৰ সৃষ্টি হ’ব৷ সৰু চহৰসমূহত অভিযান্ত্ৰিক আৰু চিকিৎসা মহাবিদ্যালয় স্থাপন কৰাটো সৰু সৰু চহৰবোৰত কেবিনেট বৈঠক অনুষ্ঠিত কৰাৰ দৰেই এক অতিকৈ আদৰণীয় পদক্ষেপ৷ আমি সদায় বিচাৰি আহিছিলোঁ যে কেন্দ্ৰই উত্তৰ-পূৰ্বাঞ্চলৰ প্ৰতি মূলসুঁতিৰ দৃষ্টিৰে চাওক, অসম চৰকাৰে তেনে কৰাৰ বাবে পথ দেখুৱাইছে৷
গাঁওসমূহত লোকগীত প্ৰতিযোগিতাৰ প্ৰচাৰকে ধৰি ক্ৰীড়া আৰু সাংস্কৃতিক ক্ষেত্ৰৰ বাবে হাতত লোৱা পদক্ষেপসমূহো উল্লেখনীয়৷ অৱশ্যে, এইটোও ক’ব লাগিব যে সংগীতে এতিয়াও প্ৰাপ্য মৰ্যাদা পোৱা নাই৷ উত্তৰ-পূৰ্বাঞ্চলতো বিশেষ প্ৰতিভা আছে আৰু চৰকাৰে ইয়াক উপলব্ধি কৰিব লাগিব আৰু এইক্ষেত্ৰত কাম কৰিবলৈ বেংকৰপৰা ঋণ প্ৰদানৰ ব্যৱস্থা কৰিব লাগিব৷ ডিজিটেল ব্যৱস্থাৰ প্ৰৱৰ্তন আৰু ইয়াৰ ব্যৱহাৰত যোগোৱা উৎসাহ, ৰাজহুৱা সেৱাৰ নতুন অধিকাৰ আইনে ৰাজ্যবাসীক অধিক উপকৃত কৰিব৷ হয়, ভিতৰুৱা অঞ্চলসমূহত ইণ্টাৰনেটৰ সুবিধা আগবঢ়াবলৈ জনগণক উন্নত সংযোগ আৰু স্মাৰ্ট ফোনৰ দৰে আহিলাৰ প্ৰয়োজন৷ অন্যথা ডিজিটেল সেৱাৰ সম-বিতৰণত এক ব্যৱধানৰ সৃষ্টি হ’ব৷
এই বাজেটখনে জলবায়ু পৰিৱৰ্তনৰ দিশতো সঠিক গুৰুত্ব আৰোপ কৰিছে৷ অসম এটি অসুৰক্ষিত অঞ্চলৰ অংশ৷ ইয়াৰ অৰ্থ হ’ল যে যাৱতীয় পদক্ষেপ হাতত নল’লে গ্ৰাম্য অৰ্থনীতি প্ৰভাৱিত হ’ব পাৰে৷ গতিকে সেউজ শক্তি, সেউজ বিকাশ, বৃত্তাকাৰ অৰ্থনীতি হৈছে এনে কেইটিমান প্ৰয়োজনীয় শব্দ যিবোৰ অসমৰ সকলোৰে শব্দকোষত সন্নিৱিষ্ট হোৱা উচিত৷ জলবায়ু পৰিৱৰ্তনৰ বিৰুদ্ধে যুঁজ দিয়াৰ লগতে দৰিদ্ৰ জনগণক ন্যূনতম মৌলিক সেৱা প্ৰদান কৰাৰ ক্ষেত্ৰত অসম অগ্ৰণী স্থানত থাকিব লাগিব৷
অৰুণোদয় আঁচনিয়ে ইতিমধ্যে এক ব্যাপক প্ৰভাৱ বিস্তাৰ কৰিবলৈ সক্ষম হৈছে৷ অনাগত দিনতো এই আঁচনিৰ অধিক সম্প্ৰসাৰণ আৰু অন্যান্য ডিবিটি আঁচনিৰ সৈতে ইয়াৰ একত্ৰীকৰণৰ প্ৰয়োজন৷ অৰুণোদয়ৰ হিতাধিকাৰীসকল অলস বা কৰ্মবিমুখ হৈ পৰিছে বুলি শুনিবলৈ পোৱা অভিযোগৰ বিষয়েও গৱেষণা কৰাটো প্ৰয়োজনীয়৷ এই ক্ষেত্ৰত, চৰ্তসাপেক্ষ অনুদানৰ মেক্সিকান পৰীক্ষণৰ ব্যৱস্থাটো যথেষ্ট প্ৰাসংগিক৷ এই ব্যৱস্থাত এনে কিছুমান চৰ্ত আছে যিবোৰ অনুদানপ্ৰাপকসকলে পৰৱৰ্তী বছৰৰ অনুদান পাবলৈ পূৰণ কৰিব লাগিব৷
সকলোৰে বাবে স্বাস্থ্যসেৱা উপলভ্য কৰাটোও এটি উল্লেখনীয় পদক্ষেপ৷ স্বাস্থ্য সম্পৰ্কীয় সা-সুবিধাৰ লগতে আমি নিয়ন্ত্ৰিত জনসংখ্যা আৰু সামৰ্থতকৈ অধিক ব্যয় কৰাৰ প্ৰৱণতা হ্ৰাস কৰিব লাগিব৷ বাল্য বিবাহ বিৰোধী অভিযানৰ জৰিয়তে আওপকীয়াকৈ মাতৃৰ মৃত্যু হাৰ আৰু শিশু মৃত্যুৰ হাৰ হ্ৰাস কৰাত যথেষ্ট সহায় হ’ব৷
অসমৰ চাহে দুশ বছৰীয়া যাত্ৰা সম্পূৰ্ণ কৰিছে৷ কিন্তু, এতিয়াও চাহ জনগোষ্ঠীটো অসমৰ আটাইতকৈ পিছপৰা সম্প্ৰদায় হিচাপে থাকি গ’ল৷ বাজেটত এই কথা স্বীকাৰ কৰা হৈছে আৰু খণ্ডটোৰ প্ৰতি ব্যাপক সহায়-সহযোগিতা আগবঢ়োৱাৰ ব্যৱস্থা কৰিছে৷
শেষত উল্লেখ কৰিবই লাগিব যে অসমলৈ শান্তি ঘূৰি অহা দেখা গৈছে৷ আৰক্ষী বাহিনীৰ সবলীকৰণ, যুৱ নেতৃবৰ্গৰ সৈতে নিৰন্তৰ আলোচনা, মানুহ আৰু জীৱ-জন্তুৰ সংঘাত প্ৰতিহত কৰাৰ উদ্যোগ ল’লে ৰাজ্যৰ যিকোনো অঞ্চলত বাস কৰা লোকসকলৰ জীৱন হৈ পৰিব শান্তিপূৰ্ণ৷
প্ৰতিবছৰে উপস্থাপন কৰা ৰাজ্যিক বাজেটখন হৈছে এক আশা-আকাংক্ষাৰ স্থলী৷ আগন্তুক বছৰটোত ১,৩৯,০০০ কোটি টকা ব্যয় কৰাৰ প্ৰতিশ্ৰুতিয়ে সেই আশাক বাস্তৱায়িত কৰি তুলিব পাৰে৷
(লেখক ৰাষ্ট্ৰীয় গ্ৰামীণ বিকাশ নিধিৰ কাৰ্যবাহী সঞ্চালক)
