পলাশবাৰীৰপৰা মিৰ্জা হৈ চানডুবিলৈ কৰা যাত্ৰা এতিয়া কেৱল নৈসৰ্গিক সৌন্দৰ্য উপভোগৰ বাবেই নহয়, চহৰখনৰ উন্নয়নৰ ক্ষেত্ৰতো ঘাইপথ পৰ্যায়ৰ পথটো যাত্ৰীসকলৰ বাবে চৰ্চাৰ এক নতুন বিষয় হৈ পৰিছে৷ নিৰ্ধাৰিত দুবছৰৰ সময়সীমাৰ বহু আগতেই সম্পূৰ্ণ হোৱা এই পথটোৰ নিৰ্মাণকাৰ্যৰ মান দেশৰ আন ঘাইপথসমূহৰ দৰেই উচ্চ পৰ্যায়ৰ৷ ২২২ কোটি টকা ব্যয়সাপেক্ষে নিৰ্মিত ২৭.২৯ কিল’মিটাৰ দৈৰ্ঘ্যৰ পথটো অসম চৰকাৰৰ লোকনিৰ্মাণ (পথ) বিভাগৰ অসম মালা প্ৰকল্পৰ অধীনত নিৰ্মাণ কৰা হৈছে৷
ৰাজ্যৰ দ্ৰুত বিকাশ আৰু প্ৰগতিত ইন্ধন যোগোৱাৰ লগতে বহনক্ষম উন্নয়নৰ প্ৰতি লক্ষ্য ৰাখি পথ আন্তঃগাঁথনিৰ উন্নীতকৰণৰ ক্ষেত্ৰত অসম মালা এখন জনমুখী আঁচনি৷
পলাশবাৰী নিবাসী অনিল কলিতাই(৫৮) পথটোৰ নিৰ্মাণকাৰ্যৰ প্ৰশংসা কৰি অসম বাৰ্তাৰ প্ৰতিনিধিক কয়, “এই পথটো নিৰ্মাণৰ পাছত আমি বহুতো ইতিবাচক পৰিৱৰ্তন দেখিছোঁ৷ পথটোৰ উত্তৰ দিশত মাত্ৰ কেইমিটাৰমান আঁতৰত বৈ গৈছে মহাবাহু ব্ৰহ্মপুত্ৰ৷ তদুপৰি হুদুমপুৰ এতিয়া জনপ্ৰিয় ছেলফি পইণ্ট হোৱাৰ লগতে এক জনপ্ৰিয় বনভোজস্থলী হিচাপে পৰিগণিত হৈছে৷ ভূমিৰ মূল্য বহুগুণে বৃদ্ধি পোৱাৰ লগতে অঞ্চলটোত বিনিয়োগৰ পৰিমাণো বৃদ্ধি হৈছে৷ আমি এই বৃহত্তৰ অঞ্চলটোৰ অধিক উন্নয়ন আশা কৰিছোঁ৷”
মিৰ্জা চ’কত এখন ফাৰ্মাচী পৰিচালনা কৰা কবীন্দ্ৰ চন্দ্ৰ কলিতাৰ মতে তেখেতে অঞ্চলটোত অভূতপূৰ্ব উন্নয়ন প্ৰত্যক্ষ কৰিছে৷ “উন্নয়নৰ বাটেৰে মিৰ্জা চ’ক এতিয়া ক্ষিপ্ৰগতিত নগৰলৈ পৰিণত হৈছে৷ যোৱা ২০ বছৰত এই অঞ্চলত এতিয়াৰ দৰে ব্যৱসায়িক কাৰ্যকলাপ দেখা নাই৷ পথ নিৰ্মাণৰ পাছত এই অঞ্চলত ব্যৱসায়িক ক্ষেত্ৰখনৰো বিকাশ পূৰ্বতকৈ অধিক হৈছে,” তেখেতে কয়৷
পথ আৰু আন্তঃগাঁথনিৰ উন্নীতকৰণেৰে অৰ্থনৈতিক বিকাশ সাধনৰ দৃষ্টিভংগীৰে বিভাগৰ অধীনত এই কল্যাণকামী পদক্ষেপ গ্ৰহণ কৰা হৈছে৷
“অসম মালা আঁচনিৰ অধীনত কেৱল পথ যোগাযোগ ব্যৱস্থা উন্নীত কৰাই নহয়, অৰ্থনৈতিক দিশৰো সামগ্ৰিক উন্নয়নৰ দৃষ্টিভংগীৰে ৰাজ্যৰ গুৰুত্বপূৰ্ণ অঞ্চলসমূহত পথ নিৰ্মাণৰ কাম হাতত লোৱা হৈছে,” লোকনিৰ্মাণ বিভাগৰ কাৰ্যবাহী অভিযন্তা তথা অসম মালা প্ৰকল্পৰ ন’ডেল বিষয়া দিগন্ত গোস্বামীয়ে কয়৷
অসম মালা প্ৰকল্পৰ কাৰ্যসূচীসমূহ পৰিকল্পনা কৰাৰ সময়ত উল্লিখিত উদ্দেশ্যসমূহক সাকাৰ ৰূপ দিয়াটোও অন্যতম লক্ষ্য আছিল৷ এই প্ৰকল্প কেৱল ৰাজ্য চৰকাৰৰ এক অভিলাষী আৰু দীৰ্ঘম্যাদী পথ আন্তঃগাঁথনি উন্নয়ন কাৰ্যসূচী নহয়, ইয়াৰ পৰিসৰৰ অধীনত কেইবাটাও বহিঃসাহায্যপ্ৰাপ্ত প্ৰকল্প (ইএপি)ও অন্তৰ্ভুক্ত কৰা হৈছে৷ ইয়াৰ অধীনত থকা কেইটিমান উল্লেখনীয় প্ৰকল্প হ’ল- এছিয়ান ডেভেলপমেণ্ট বেংক (এডিবি)ৰ সাহায্যপ্ৰাপ্ত অসম পথ নেটৱৰ্ক উন্নয়ন প্ৰকল্প (এআৰএনআইপি), এছিয়ান আন্তঃগাঁথনি বিনিয়োগ বেংকৰ সাহায্যপ্ৰাপ্ত অসম মাধ্যমিক পথ নেটৱৰ্ক উন্নয়ন প্ৰকল্প (এএছআৰআইপি) ইত্যাদি৷ এই সকলোবোৰ প্ৰকল্পৰে লক্ষ্য কেৱল দ্ৰুত পথ যোগাযোগ ব্যৱস্থা তথা জীৱন ধাৰণৰ মান উন্নীতকৰণেই নহয়, এই প্ৰকল্পসমূহে অসম চৰকাৰৰ কামৰ ওপৰত ৰাইজৰ আস্থা আৰু বিশ্বাসকো প্ৰতিফলিত কৰিছে৷
লোহাৰঘাট চৰকাৰী এম ভি স্কুলৰ প্ৰধান শিক্ষক হৰেণ চন্দ্ৰ নাথে চৰকাৰৰ এই কাৰ্যৰ প্ৰতি সন্তুষ্টি প্ৰকাশ কৰে৷ “এতিয়া আমাৰ ৰাস্তা-ঘাট পূৰ্বতকৈ বহুগুণে উন্নত হৈছে৷ মোৰ দৃঢ় বিশ্বাস যে চানডুবিৰ দৰে জনপ্ৰিয় পৰ্যটনস্থলীলৈ যোৱা এই পথটোৱে উন্নয়নৰ দিশত গুৰুত্বপূৰ্ণ সহযোগিতা আগবঢ়াব৷ আমি ইয়াত বিনিয়োগকাৰীসকলক ভূমিৰ সন্ধান কৰি থকা দেখিবলৈ পাওঁ৷ বহু শৈক্ষিক প্ৰতিষ্ঠানে আমাৰ অঞ্চলত তেওঁলোকৰ চৌহদ স্থাপনৰ চিন্তা-চৰ্চাও কৰিছে৷ ৰাজ্যৰ আন আন প্ৰান্ততো এনেধৰণৰ উন্নয়নমূলক কাৰ্যই থিতাপি ল’ব বুলি মই নিশ্চিত,’’ তেখেতে কয়৷
ৰাভা জনগোষ্ঠীপ্ৰধান দেওপানী গাঁওখন তামোল, আদা আৰু ঝাড়ুৰ অন্যতম প্ৰাণকেন্দ্ৰ৷ স্থানীয় বাসিন্দাৰ পৰা জানিব পৰা গৈছে যে এই অঞ্চলতো তেওঁলোকৰ আয়ৰ পৰিমাণ আৰু বিক্ৰী পূৰ্বতকৈ বৃদ্ধি পাইছে৷ এই পথটোৱে বৃহত্তৰ দেওপানী আৰু লোহাৰঘাট অঞ্চলৰপৰা বালি ভৰ্তি ট্ৰাক অন্য ঠাইলৈ লৈ যোৱাৰ ক্ষেত্ৰত কমল ৰাভা (৪০)ৰ দৰে লোকসকলক বহুপৰিমাণে সহায় কৰিছে, যি কিছু মাহ পূৰ্বে কল্পনাৰো অগোচৰ আছিল৷ একে সময়তে এখন ধাবাৰ স্বত্বাধিকাৰ ৰবিনৰো আয় প্ৰায় দুগুণ বৃদ্ধি পাইছে৷
ৰাজ্যিক লোকনিৰ্মাণ বিভাগৰ দক্ষিণ কামৰূপ ক্ষেত্ৰীয় পথ(পলাশবাৰী-মিৰ্জা) সংমণ্ডলৰ কাৰ্যবাহী অভিযন্তা কাৰ্তিক বিশ্বাসে কয় যে সমগ্ৰ পথটো অতি সাৱধানতাৰে নিৰ্মাণ কৰা হৈছে৷ তেওঁ সুখী যে স্থানীয় ৰাইজে অসম মালা প্ৰকল্পৰ ৰূপায়ণৰ ফলত যথেষ্ট উপকৃত হৈছে৷
