মুখ্যমন্ত্ৰী ড০ হিমন্ত বিশ্ব শৰ্মাই ঘোষণা কৰে যে প্ৰকৃতি সুৰক্ষা আৰু বৃক্ষ অৰ্থনীতিৰ ধাৰণাক ৰাজ্যখনত সবল কৰি তোলাৰ পদক্ষেপ অমৃত বৃক্ষ আন্দোলনৰ দ্বিতীয় সংস্কৰণৰ অংশ হিচাপে অহা ১ৰ পৰা ১৫ আগষ্টৰ ভিতৰত ৰাজ্যজুৰি তিনি কোটি গছপুলি ৰোপণ কৰা হ’ব।
অমৃত বৃক্ষ আন্দোলন দ্বিতীয় পৰ্যায়ৰ পঞ্জীয়নৰ সুবিধাৰ বাবে এটা এপ মুকলি কৰি ড০ শৰ্মাই কয় যে অসমে এই তিনি-চাৰি বছৰৰ ভিতৰত ১০ কোটি গছপুলি ৰোপণ কৰাৰ লক্ষ্য নিৰ্ধাৰণ কৰিছে। এই পদক্ষেপৰ সফলতাই ৰাজ্যখনত সেউজ আৱৰণ ২% বৃদ্ধি কৰাত সহায় কৰিব।
“এই বছৰ আমাৰ লক্ষ্য হৈছে ১ৰ পৰা ১৫ আগষ্টলৈ তিনি কোটি গছপুলি ৰোপণ কৰা। ২০২৩ চনত অমৃত বৃক্ষ আন্দোলন – প্ৰথম পৰ্যায়ত, লক্ষ্য আছিল এদিনতে এক কোটি গছপুলি ৰোপণ কৰা, কিন্তু আমি পুলিবোৰ বাচি থকাৰ ৯০% হাৰৰ সৈতে সামঞ্জস্য ৰাখিবলৈ ১.১২ কোটি গছপুলি ৰোপণ কৰিছিলোঁ,” মুখ্যমন্ত্ৰীগৰাকীয়ে কয়।
এই পদক্ষেপে অসমৰ সেউজ আৱৰণ বৃদ্ধি কৰিবলৈ আৰু বিশ্বব্যাপী পৰিৱেশ সুৰক্ষাৰ প্ৰচেষ্টাৰ ক্ষেত্ৰত অসমৰ সকলো স্তৰৰ ৰাইজৰ ব্যাপক অংশগ্ৰহণেৰে এইক্ষেত্ৰত তেওঁলোকৰ অৱদান নিশ্চিত কৰিব।
মুখ্যমন্ত্ৰীগৰাকীয়ে কয় যে ৰাজ্য চৰকাৰে ইতিমধ্যে ‘অমৃত বৃক্ষ আন্দোলন- ২.০’ অভিযানক কাৰ্যকৰী কৰিবলৈ সেনা, বায়ু সেনা, এছএছবি, চিআৰপিএফ, বিএছএফ, বিদ্যালয়, মহাবিদ্যালয়, আত্মসহায়ক গোট আৰু বেচৰকাৰী সংগঠনকে ধৰি বিভিন্ন সংস্থা আৰু কেন্দ্ৰীয় বাহিনীক নিয়োজিত কৰিছে।
“আমি দ্বিতীয় পৰ্যায়ত প্ৰায় ৫০ লাখ ব্যক্তিয়ে আমাৰ এই প্ৰচেষ্টাত অংশগ্ৰহণ কৰিব বুলি আশা ৰাখিছোঁ। আমি ৪,০০০ গছপুলি বিতৰণ কেন্দ্ৰ স্থাপন কৰিছোঁ যাতে ৰাইজে নিকটতম স্থানৰ পৰা গছপুলিসমূহ সংগ্ৰহ কৰিব পাৰে। যোৱাবাৰ আমি ব্যক্তিগত নাৰ্ছাৰী আদিৰ পৰা গছপুলিসমূহ লৈছিলোঁ যদিও এইবাৰ বন বিভাগৰ নিজা নাৰ্ছাৰীৰ পৰা গছপুলি যোগান ধৰা হ’ব।”
